[Teleŋontaaxu]
23
« Maxa mugun laxami. Maxa an kitten kini munaafaxin ŋa ti seedanjuuraaxu. 2 Maxa ɲa do jaman gaboyen batten ŋa ti fi buren ŋa ; an nan maxa ɲumi do jaman gaboyen batten ŋa ti miileyen ŋa bakka tonŋun maxa kiitikutiran ŋa. 3 Maxa miile do misikiinen xa yi kiiten ŋa. 4 An ga na ware an xonnen gunbon ŋa, ma walla xa a fare, a riiti a danŋa. 5 An ga na an besenxonnen faren wari, a ga xenu likkun wure, maxa a wanga, an kapa a yi ya na a deema.6 « Maxa an kapanlen misikiinen tonŋun goori kiiten ŋa. 7 An nan laato bakka gaaren ŋa. Maxa seri baarinte kari, maxa seri sire kari, baawo inke nta seri bure baarini. 8 Maxa kiitimuson raga, baawo kiitimuson na yaaxanten ya finkindini, na tonŋunten digaamun buruxa. 9 Maxa mukken roxo, axakun yinmenu wa mukken moxon tu, baawo axa ɲi mukkaaxun ŋa Misira jamaanen ŋa.
[Tuumayinsiinen do tuumayinkoota]
10 « Siino tunmi, an na an ɲiiɲen soxo, na a kiteyun kafu me yi. 11 Ɲerundin ŋa, an na a tuumandi, an na a wara kuudo an jaman misikiinun na yige. I yigandi kuttu, gundufoonun na i yiga. Ken moxo saanan ya ni, an gaa a ɲaana ti an reesengooren do an jayituunangooren ŋa.
12 « An na an gollun golli bito tunmi ; an na tuuma bita ɲerundin ŋa. Maana an gunbon na tuuma, a do an fare. An tunbaari yaxaren renmen do an mukkunun xa na yonki. 13 Ke be su in ga da i ko axa da, axa wa i tangana. Alla tanan toxo, xa maxa finkoni ti a yi. A n maxa mugi an raqen ŋa yinme.
[Salli xooro]
14 « Siinen ŋa, an na sallun ɲaxa dabari in danŋa ti hiijun ŋa taanu sikki. 15 Buuru lewiirintanŋen salle, xa na a tanga. Xa na buuru lewiirintanŋen ya yigana bito ɲeri, xoyi in ga da axa ɲaamari moxo be Habiibunxason waxatin ŋa, baawo an ri bakka Misira yi ken ya yi. An kitti duuro n maxa ri sigi in jon me naxa, 16 ken do an ga da teenu beenu soxo gunnen di, i soxanfoonun fateyifanon waxatin salle, kafiini fateyilagaren salle siinen legeren ŋa, bire be an gaa an kiteyun kapa me yi gilli teenun ŋa. 17 Taanu sikki siinen ŋa, an yugon su wa riini sigi Kamanen jon me naxa¤, Tunka Duumante. 18 Maxa sadaxan foron joxi in da kafiini buurun ŋa lewiirin gaa a yi. N sallen sadaxankateyen nta taaxiini ma bita fillan suxuba. 19 An ɲiiɲen fateyifano, an na i riiti Tunka Duumanten kan ŋa, an kama. Maxa sugunlen tollan soro ti i ma xattin ŋa.
[Kanaana royen moxosironde]
20 « N yinme faayi gaa maliikan xayini an kaane, kuudo a na an tanga do killen ŋa. A na an kiɲa dingira be in ga da a gemundi. 21 An du koroosi a kaaran ŋa, an na a terinka xa. Maxa sooxindi a maxa, a nta yanpana an fi burun ŋa, baawo a na ti in toxon ya yi. 22 An ga na a xannen mugu, n ga da fo wo fo koni an da an ga da a ɲa, n na an xonnon xoni, na an gajanlenmon gaja. 23 Baawo in maliikan wa tereene an kaane, nan joofa Hamoorikaarankon ŋa, kafiini Hiiwikaarankon do Heetigankon do Perijinu, ken do Kanaanagankon do Yebuusikaarankon ɲiiɲe. N wa i ɲamallexunu xa. 24 Maxa sujudi i allanu da, maxa i batu, maxa i ɲangollun ɲa, xa ganta, an na i gidinmunonu ku xenundini ya, na i xosoxoso. 25 An na Tunka Duumanten batu, axa Alla, a na an logoman barekindi, a do an ji. A na watten wurugi bakka axa yi. 26 Boroge do xosondindaana ntaxa ɲiini axa ɲiiɲe ke yi. N na axa wuyinun maxafaga.
27 « N wa in kanumaxandaraaxun xayini axa kaane. N wa hawujeyen warandini katta jama be su axa gaa riini katta a yi, na axa xonnon kofon koyi an ŋa. 28 N wa jaaminbinnen xayini axa kaane¤, a na Hiiwikaarankon xata gilli an kaane, Kanaanaganko, a do Heetiganko. 29 N nta i xatana bakka an kaane siina baane yi de ! Kuudo ɲiiɲe ke n maxa ɲa fo gurujante yi, gundufoonun gaa gaboono an xanne maxa. 30 N na i xatana gilli an kaane fonne fonne ya, an na moonike, na jamaanen kamanaaxu. 31 N wa an gingun karana gelli Xulunjuumufanŋen ŋa, ma Mediteraanigeeji¤ ; gelli gunjuran ŋa xadi, ma Furaatafanŋe waranlaqe. Baawo in na ɲiiɲe ke taaxaanon roono an kitten ŋa ya, na i xata gilli an kaane. 32 Maxa sarati tafu an do i naxa, maxa a tafu an do i allanu naxa. 33 I n maxa taaxu an ɲiiɲen ŋa kuudo i n maxa an janba in ŋa, an gaa i allanu batta, i gaa ɲaana an da selleqen ŋa. »