[Tawureeta kinne]
24
Alla daali Muusa da ti : « Sege katta Tunka Duumanten ŋa, an do Haaruna do Nadaabu, a do Habiiyu¤, kafiini Banisirayilaganko tanɲere xirise. Axa segento, axa na sujudi gelli laatoyen ŋa. 2 Xa Muusa baane ya n tinkoono Tunka Duumanten ŋa, ikun kuttu ku nan maxa tinko, jaman xa nan maxa sege do i ya. »3 Muusa ri Tunka Duumanten ɲaamarindixannun do a kiitun su kiɲandi jaman ŋa. I da a jaabi xan baane nan ti : « Tunka Duumanten ga da o ɲaamari fo wo fo yi, o wa a ɲaana ! »
4 Muusa da Tunka Duumanten ɲaamarindixannun su safa. Ken falle, a furute gilli na sadaxindinoqun taga, na gidu tanmi do fillo sigindi Banisirayila xabiilanun tanmi do fillon da gide ke wure yi. 5 Ken falle a da Banisirayilaganka maxanbaanun xayi, i daga sadaxa xuruminten dabari, na gunbunun xa sadaxi Tunka Duumanten da, a na ɲa allatiigeyinsadaxa. 6 Muusa da foron taxanden wutu na i ro xollon noxon ŋa. Foro be ga toxo, a da i sanpa-sanpa sadaxindinoqun kanma. 7 A da laayidu ke kitaaben wutu na a xara jaman da. I ti : « Tunka Duumanten ga da fo wo fo ko o da, o wa a su ɲaana. O wa a mukku xa mene. » 8 Muusa da foron wutu na i sanpa-sanpa jama ke xa yi nan ti : « Tunka Duumanten ga da sarati be kutu i do axa naxa, a taagumansen ya ni ku foro yi, kuudo na laayidu ke sabatindi. »
9 Ken falle Muusa do Haaruna sege, a do Nadaabu, do Habiiyu, kafiini Banisirayila tanɲeren yinmanken ŋa. 10 I da Isirayila Alla wari, a gaa sikki du gidinfeena meleqen kanma, a baxanman gaa xo kanxotte, a taanun wure. 11 Isirayila ku xirisi wulluliŋonto, a ma fo ɲaŋi i ya. I da Alla wari na a laaba, i yige nan mini.
12 Tunka Duumanten daali Muusa da : « Sege katta in ŋa giden kanma, an nan toxo in kaaran ŋa. N ga da sariya be do ɲaamarindixannu beenu safa gidinwallahon kanma, n na i kini an ŋa, kuudo na i xaranŋundi. » 13 Muusa do i xidimandaana Yuusawu giri nan sege Alla giden kanma. 14 Ken da a ɲi a ti yinmanko ku da : « Axa da o dugu yere ma o ga na saage riini katta axa yi. Haaruna do Huura wa toqo do axa yi, fi be ga na ɲi sere be yi, an na a koyi i ya. »
15 Muusa sege giden kanma. Tabullen da giden xufu. 16 Tunka Duumanten nooron ɲa Tuurisiina giden kanma. Tabullen da bito tunmi ɲa xufiini gide ke kanma. Bita ɲerundi, a da du toxo tabullen noxon ŋa na Muusa gangu. 17 Tunka Duumanten nooron bange Banisirayilaganko danŋa giden tonben ŋa, xo yinbi xoore. 18 Muusa ro tabulle ke noxon ŋa, nan sege gide ke kanma, na tannaxate kiye do tannaxate wuro ɲa non ŋa.