[Allanbatikan do Alla hadariye do Banisirayilaganko yi]
25
Tunka Duumanten daali Muusa da : 2 « A ko Banisirayilaganko da, i du baananbe su na deemanden wutu in da, ku beenu ga ni fonnansiru, i na a kini an ŋa. 3 Axa gaa fo be muurunu in da, i ya faayi : kanŋe, xaalisixulle, jaxawalle¤, 4 baxa xaxace, lankaran do fo dunbe xaxace, sasi, xaasa, 5 kafiini jaxandigifata dunbunte, a do liwongifata mosinte, do saayinsolle, 6 a do kumiteenu, daarinditetimiliŋaadun do futaade, 7 a do gidi ŋaalinto, i gaa xilli “ onkisi ”, do gidi kaananko tananu, kun gaa roono sadaxakiɲandaanon yinmanken batibanjangaran do a gijinlanŋen kanma. 8 I na allanbatika yiranma senne dabari in da, n na ɲaŋi i naxa. 9 N wa allanbatika yiranma ke do i nuxudufiinun su dabarimoxon koyini an ŋa, axa na a dabarini xo ken moxo yinme ya.[Laayidunwaxande]
10 « I na waxande dabari ti saayinsollen ŋa, na a tan ɲa sogone fillo do taxande, a noxon ga ni sogone do taxande, a taaxunten na ɲa sogone do taxande. 11 An na a noxon do a sellan su gosaasini ti kan hooren ya, an na a yoori ti kanŋen fanaaron ŋa. 12 An na tarun taga, kangodongodo naxati, na i ro a jungunun naxati yi. An na taru filli ro ke kaara yi, na taru filli ro kiteeren kaara xa yi. 13 An na saayinberenberun dabari, na i gosaasi ti kanŋen ŋa. 14 An na kun berenberu ya sollo taru ku yi, na i ɲa wutaadu. 15 An na kun gumo toqo waxande ke tarun ŋa ya, i ntaxa bakka. 16 N gaa sarati ke seeda be kinni an ŋa, an na a ro waxande ke noxon ŋa. 17-18 Ken falle, na kan hooren katu, na bipaaden¤ dabari, xeribunun¤ filli sawuran gaa a yinmun filli yi, a tan gaa sogone fillo do taxande, a noxon gaa sogone do taxande. 19 An na xeribu baane dabari ke yinme yi yere, na xeribu baane dabari ke yinme yi dooke. Xa na xeribunu ku taŋandi me yi taaxaade ke kanma. Baane su jonkoyinten wa i kapanlenman ŋa taaxaade ke kanma. 20 Xeribunun kanpon banbanton gaa kanmun ŋa, kuudo i na taaxaade ke tanga ti i kanpon ŋa. Baane su jonkoyinten wa i kapanlenman ŋa bipaade ke kanma. 21 N gaa seedaaxunwallaho be kinni an ŋa, an na i ro waxande ke noxon ŋa na a texe. 22 N wa an seedaaxunwaxande ke kanmun ŋa, xeribunu ku filli naxa, sariyanu beenu gaa in maxa katta Banisirayilaganko yi, n na i tuyindi an ŋa.
[Sadaxanbuuruntaabali]
23 « An wa taabali dabarini ti saayinsollen ŋa, a tan giiloye, sogone fillo, noxon xooroye, sogone baane, a sige, sogone do taxande. 24 An na a gosaasi ti kan hooren ŋa. An na kanŋen fanaaron yoori do a kanbon ŋa. 25 An na xaɲen dabari do a kanbon ŋa degere haqe, na kanŋen fanaaron ro do a yi. 26 An na kantaru naxati dabari a da, na i ro a kooɲun naxati yi, a taanu ku naxati jonkonmen ŋa. 27 Taru ku na xaɲe ke kaaron ya yi, berenberun gaa roono i ya taabali ke wutunden xanne maxa. 28 An na saayinsollen berenberun ya dabarini na i gosaasi ti kanŋen ŋa, taabali ke wutiini ti kun ya yi. 29 An na a yokkun dabari : A waatu, a beelunu, jindomo, do a selebenŋu, joxinden¤ gaa ɲaana ti ku beenu yi. An na i dabarini ti kan hooren ya. 30 An na toxo sadaxanbuurun roono taabali ke kanma yi, n jon me naxa.
[Fitille]
31 « An na kan hooren fitillen dabari ti fuluman ŋa. Fitille ke yinme do i taaxaade, a xare, a gubu, a xudu, do a fuugu, i su nan ɲa a yi fo baane. 32 Kittu tunmi wa bakka fitille ke kaaron ŋa : kittun sikki wa a dan ke kaara yi, kittun sikki wa a dan ken kaara baane yi. 33 Gubu sikki wa ke kitti baane yi, i gaa xo duyittifuugen moxo, a do xudu. Gubu sikki wa kitti baane tana xa yi, i gaa xo duyittifuugen moxo, a do xudu. Ken moxo ya ni kittu ku tunmi su bogumoxon ŋa gelli fitille ke yi. 34 Fitillinxare ke yinme kanma, gubu naxati wa a yi, a do xudun do fuuge, xoyi duyittifuugen moxo. 35 Xudu wa a ku kingu filli wure, xudu wa a kun kingu filli wure, xudun wa a ku kingi baanu xa filli wure. Kingu ku tunmi su bogu kundun ya yi gelli fitille ke yi. 36 I xudun do i kittun su ɲaana ti kan hooren taganten ya yi me yi fo baane yi. 37 An na a kumisoomon ɲeri dabari. Kumisoomo ku na jongi, moxo be a gaa i kaane banŋe xurandini. 38 A xanpanu, a do yinbiwutifo, kan hooren ya ni. 39 Komo segi do tankarage menqalle ya na ku yokku kundu su dabarini. 40 An na a faayi, na a dabari xo xawaara ke be ga koyi an ŋa giden kanma.