[Gemmanlenmaaxun tilliisen dabariye]
26
« Gemmanlenmaaxun tilliise ke, an wa a dabarini ti sasinkiri katunto tanmi, do sasingaari baxa xaxace, a do lankaran do fo dunbu xaxace. An na xeribunun ɲegu do a yi ti sufanden ŋa. Yaaxaranxaron ya na i golli. 2 Kiri baane giiloyen nan ɲa tanpille do sogone segu, a noxon nan ɲa sogone naxato, kiru ku su ni ken jaati baane ya. 3 Kiru karagi ya n katiini me yi baane su do i katanlenma, kiru karagi tana na kati me yi, baane su do i katanlenma. 4 An na nuxunnun dabari ti baxa xaxacen ŋa yirankiri baane ke kanben ŋa. An na ken me dabari yirankiri fillandi ke xa kanben ŋa. 5 Kiru ku karagi, an na tankarage nuxunne dabari kanba baanen ŋa, na tankarage nuxunne dabari fillandi ke xa kanben ŋa kafiini a yi, be su do i katanlenman na jonkoyi me yi. 6 An na tankarage kangeresaade dabari na kiru ku geresi me yi ti geresaadu ku yi, baane ti baane, tilliise ke na xosi ɲa yiran baanen ŋa.7 « An na suguyinten xufaaren dabari tilliise ke kanma. An na i dabari, kiru tanmi do baane. 8 Kiri baane su giiloyen wa ɲaana tanjikke sogone. Tefetoyen xa ni sogone naxato. Kiru ku tanmi do baane, an na baane su ɲaana baanen jaaten me ya. 9 An na kirun karagi katu me yi i duran ŋa, kirun tunmi xa dura. An wa kiri tunmundi ke xupu tilliisen raqen ŋa kaane. 10 An na tankarage nuxunne dabari kiri baanen kanben ŋa, fo lifinta fano ku yi. Fo lifinta fillandinu ku xa kanbe, tankarage. 11 An na tankarage jaxawallingeresaade dabari, na i geresi nuxunnu ku yi, na tilliisen katu me yi, a na ɲa baane. 12 Ke kutte be gaa wareene yanqana, ken ni kiren taxanden ya, a gaa wareene yanqana do tilliisen falle yi. 13 Sogone ti yere, sogone ti dooke, tilliise ke kire be kutten haqen gaa toqo, ken na ɲa do tilliisen kaaron ŋa, ke kaara do ken kaara.
14 « An na jaxandigifata dunbunten xufaaren dabari tilliise ke kanma, na liwongifata mosinten xufaaren dabari.
15 « An wa tilliise ke tonton dabarini ti saayinsollen ŋa, kun gaa sikki. 16 Tonte su sigen ni sogone tanmu. Tonto baane su tefetoyen xa ni sogone do taxande. 17 Sigaadu filli na ɲa tonto baane su da, be su do i katanlenman na jonkoyi me yi. An na ken ya ɲaana ti tilliise ke tonton su yi. 18 An na tilliise ke tonton ɲa tanpille tonte banboxun ŋa tayen banŋe. 19 A do tannaxate tontonsigaade, an na a dabari ti xaalisixullen ŋa tanpille ke tonten wure, sigaadu filli wa tonto baane su taanun filli wure. 20 Tilliise ke kaara fillandi, saahelin banŋe, tanpille tonte. 21 Tannaxate xaalisixullinsigaade, tonto baane su wure, sigaadu filli. 22 Tilliise ke kinxennanjunqan ŋa, an wa tonto tunmi dabarini no. 23 Tonto filli, an wa kun dabarini tilliise ke gonbonŋen ŋa, a xenpa. 24 I wa ɲaana funukirun ŋa, i yinmun na taaxu me yi kanmun ŋa godongoda baane noxo. Ken xa ɲaana xo gonbonŋe ke tonton filli ga ɲa moxo be ya. 25 Tonto segi na dabari, xaalisixullinsigaadu filli wa tonte su wure, sigaadu tanmi do tunmu, tonto baane su sigaadu filli wa a wure.
26 « An na saayinsollinxepun dabari, karago na dabari tilliise ke kaara fanan tonton da. 27 Xepu karagi na dabari tilliise ke kaara fillandin xa da. Xepu karagi na dabari tilliise ke kaara be gaa kinxennan ŋa, xenpan banŋe. 28 Naxaadunxepe ke be gaa tonton naxa, a wa dangini gelli ke yinme ma kiteeren yinme. 29 An na tonto ku gosaasini ti kanŋen ya. Godongodo ku, an na i dabarini kanŋen ya, xepu ku gaa sootini noqu be. An na xepu ku gosaasini ti kanŋen ya. 30 An wa tilliise ke sigindini xoyi in ga da a koyi an ŋa giden kanma yi moxo be.
[Yiridonun filli]
31 « An na yirankutaaden dabari, ti kirinbaxa xaxacen ŋa, a do lankaran do fo dunbu xaxace, do sasi mullu liikanten baxa xaxace, a sufanten gaa ti xeribunun ŋa, na a yaaxaranxarangolli. 32 An na a ro kangodongodon ŋa saayintonto naxati yi, na i gosaasi ti kanŋen ŋa, i gaa xaalisixullinsigaadu naxati kanma. 33 An na yirankutaade ke ro geresaadun wure. An na seedaaxun waxande ke ro non ŋa, yirankutaade ke falle. Yirankutaade ke na fatandi noqu senne me naxa, a do noqu sennun fo sennen me naxa. 34 An na bipaaden ro seedaaxun waxande ke kanma, noqu sennun fo sennen ŋa. 35 An na taabalin ro yirankutaaden sellan ŋa saahelin banŋe, fitillen wa taabalin jonkonmen ŋa, tilliisen kaaran ŋa, tayen banŋe banboxun ŋa. Taabali ke, an na a ro ti saahelin banŋe. 36 An na kirinbaxa xaxacen yiridon dabari tilliise ke roraqen ŋa xo garandindan xooren gollen moxo, a do lankaran do fo dunbu xaxace, do sasi mulli dunbu xaxace. 37 An na saayintonto karagi dabari yirido ke da, na i gosaasi ti kanŋen ŋa, i geresaadun ni kanŋen ya. An na i karagi sigaadun ɲa jaxawallen ŋa.