Tawureeta :
Jopaye
[Kanmun do ɲiiɲe do i nuxudufoonu]
(Soora 1-11)
[Duna tagemoxo]
1
Joŋaarun ŋa,
Alla da kanxotten do ɲiiɲanxotten taga.
2 Ken da a ɲi,
ɲiiɲen muntunqulun ya ni.
Bitanbinnen wa xufiini ji jupen ŋa.
Alla fanken wa yonkeene jin kanma.
3 Alla daali kuŋa :
« Xurayen nan bange !
» Xurayen bange ken moxo yi.
4 Alla seedaaxu ti xurayen siren ni,
a da xurayen fata bakka biten ŋa.
5 Alla da xurayen xiri « kiye »,
na biten xiri « wuro ».
Wuro ro,
yille kare,
ken ɲa koota fanan ŋa.
6 Alla daali xadi :
« Bara duuro nan bange jiinun naxa,
jiinun nan fate bakka me yi xa ! »
7 Alla da bipe yanba,
na ji kanmuranken do ji wureeranken fata bakka me yi.
Ken ɲa ken moxo yi.
8 Alla da bipe ke xiri « kanmu ».
Wuro ro,
yille kare,
ken ɲa bita fillandin ŋa.
9 Saage Alla daali :
« Jiinu be gaa kanmu ke wure,
i nan kafi me yi dingira baane,
doŋa nan bange !
» Ken ɲa ken moxo yi.
10 Alla da doŋa ke xiri « ɲiiɲe »,
na ji kafumante ke xiri « geeji ».
Alla seedaaxu ti ken siren ni.
11 Ken falle Alla daali :
« Ɲiiɲen nan xufaari ti funtifo xallun ŋa.
Sokke su na i soxoodin bangandi,
yitten noone su na i renmen bangandi,
na i soxoodin bangandi ɲiiɲen kanma !
» Ken ɲa ken moxo yi :
12 ɲiiɲen da funtifo xallun bangandi,
sokken noone su do i soxoodi,
yitten noone su do i renmen do i soxoodi.
Alla seedaaxu ti ken siren ni.
13 Wuro ro,
yille kare,
ken ɲa bita sikkandin ŋa.
14 Saage Alla daali :
« Xurayu nan bange kanmun ŋa,
kuudo,
kiyen do wuron nan fate bakka me yi.
I na ɲa taagumansu yi :
sallun do kooton do siinon da.
15 I nan ɲa xurayu yi kanmun ŋa,
kuudo na ɲiiɲen xurandi.
» Ken ɲa ken moxo yi.
16 Alla da xurayi xooro filli dabari :
fo xoori-xooren na kiiti kiyen kanma,
fo xoorinnen na kiiti wuron kanma.
A da saanun xa dabari,
17 na i wara kanmun ŋa,
kuudo i na ɲiiɲen xurayindi,
18 i na kiiti kiyen do wuron kanma,
i na xurayen do biten fata bakka me yi.
Alla seedaaxu ti ken siren ni.
19 Wuro ro,
yille kare,
ken ɲa bita naxatandin ŋa.
20 Saage Alla daali :
« Fo yonkinton nan guuji jiinun ŋa,
yeliŋun xa nan kanpi do kanmun ŋa ! »
21 Alla da jiidufo xooren su taga,
na jiidufon kutten su taga,
baane su do i noone,
na yeliŋun xa taga,
baane su do i noone.
Alla seedaaxu ti ken siren ni.
22 Alla da bareke ro i yi nan ti :
« Xa saare,
axa nan gabo,
axa na jiinun faga.
Yeliŋun xa nan gabo ɲiiɲen kanma. »
23 Wuro ro,
yille kare,
ken ɲa bita karagandin ŋa.
24 Saage Alla daali :
« Ɲiiɲen na fo yonkinton saara,
baane su do i noone :
kaadufoonu,
gundufoonu,
a do ɲiiɲedufoonu,
baane su do i noone !
» Ken ɲa ken moxo yi :
25 Alla da gundufoonun do kaadufoonun taga,
a do ɲiiɲedufoonu,
baane su do i noone.
Alla seedaaxu ti ken siren ni.
26 Saage Alla daali :
« Seren nan tage o yinme sawuran do o xawaaran ŋa,
a na jin ɲexon mara,
na kanmun yeliŋun mara,
na daabanun mara,
na ɲiiɲen kanma su mara,
a do fo wo fo ga ni ɲiiɲedufo yi ! »
27 Alla da seren taga i yinme sawuran ya yi,
Alla yinme sawuran ya ni,
a ga da a taga,
a da a taga yugo do yaxare.
28 A da i barekindi nan ti :
« Xa saare,
axa nan gabo na ɲiiɲen kanma faga,
na ɲiiɲen mara.
Axa na jin ɲexon do kanmun yeliŋun mara,
a do ɲiiɲedufon su ! »
29 Alla daali i da :
« Ɲiiɲen kaara su sokke do i soxoodi nan kini seron ŋa,
na yittirenmaana su do i soxoodin kini i ya,
i na i ɲa biraado yi.
30 Sokkinxayen nan ɲa biraado yi ɲiiɲen daaban su da,
a do kanmun yeliŋun su,
a do ɲiiɲedufo su,
yonkin gaa a yi.
» Ken ɲa ken moxo yi.
31 Alla seedaaxu ti i golli dabarinten su siro moxo siri !
Wuro ro,
yille kare,
ken ɲa bita tunmundin ŋa.