2
Kanmun do ɲiiɲen do i nuxudufoonun su taganden ɲeme ke moxo yi.
2 Alla tuuma¤ bita ɲerundin ŋa bakka i gollen ŋa.
3 Alla da bareke ro bita ɲerundi ke yi,
na a ɲa koota senne yi,
baawo,
a da a ɲa tagandiwarekoota yi i du da.
[Haadamarenmen tageye]
4 Kanmun do ɲiiɲen nuxudufoonun xibaaren faayi,
i dabari waxati.
Bire be,
Tunka Duumante Alla ga da kanmun do ɲiiɲen taga,
5 yitte su ma ɲi ɲiiɲe ke kanma,
sokke xa ma funti,
baawo Tunka Duumante Alla ma kanme riiti ɲiiɲen kanma.
Sere xa ma ɲi du yi na ɲiiɲe ke soxo.
6 Xa,
ji funti gilli ɲiiɲen ŋa,
na ɲiiɲe ke su xumaari.
7 Tunka Duumante Alla da seren taga ti dooren¤ ŋa,
na yonkin fuute roono a nuxunboton ŋa,
seren xosi ɲa tagefo birante yi.
8 Ken falle,
Tunka Duumante Alla da naaxo ro Hedeeni kinbakkan ŋa.
A ga da sere ke be taga,
a da a wara a noxon ŋa.
9 Tunka Duumante Alla da yittinnooni gabe funtindi ɲiiɲen kanma,
i waritiyaaxon faranparon ni,
i renmun liŋun ni.
A da ŋaliyinyinte,
a do fo siren do fo buren tuwaaxun yitten funtindi naaxo ke naxaanen ŋa.
10 Fanŋe yogo giri Hedeeni jamaanen ŋa na naaxo ke xumaari.
A dangi falle non ŋa,
a taxandi kittu naxati.
11 Kitti fana toxon ni Pisooni,
a gaa Haawila jamaanen su goorinkatta,
kanŋen gaa no.
12 Ɲiiɲe ke kanŋen ni kan hooren ya yi,
hanbari timi liŋen xa wa no,
a do luuluyin danbe yogo,
i gaa a xilli « onkisi ».
13 Kitti fillandin toxo ni Gihooni,
a xa da Kuusi jamaanen goorinkatu.
14 Kitti sikkandin toxon ni Hiidekeli¤,
a wa wurunu do Hasuura kinbakkan ŋa.
Kitti naxatandin ni Furaata.
15 Tunka Duumante Alla da sere ke wara Hedeeni naaxon ŋa,
kuudo a na a soxo na a golli.
16 Tunka Duumante Alla da ɲaamariyen kini a yi nan ti :
« Naaxo ke yittirenmen su yiga ti an sagon ŋa,
17 ma a ganta fo siren do fo buren tuwaaxun yitte,
maxa kati ken ŋa.
An ga na ken yiga koota su,
an kalla ya. »
18 Tunka Duumante Alla ti du da :
« Sere ke nan toxo i baane yi sire fe,
n wa deemandaana tagana a da,
ken gaa ɲaana a katanlenman ŋa. »
19 Tunka Duumante Alla ga da ɲiiɲen daabanun taga bakka dooren ŋa,
a do kanmun yeliŋu,
a do i su riiti katta sere ke yi,
kuudo na a tu,
a gaa i toxorana moxo be.
Sere ke ga na toxo be saxu tagefo be yi xa,
ken na toxo xiriini ti ken toxo yi.
20 Sere ke da toxon saxu kadufoonun su yi,
a do kanmun yeliŋun su,
do gundufoonun su.
Xa,
a ma katanlenma kita,
ke be gaa xoyi a yinme moxo.
21 Tunka Duumante Alla da xenqo xote wara sere ke yi,
na a xenqendi.
Ken bire,
a da a saxabanxotti baane wutu,
na a batten beexi.
22 Tunka Duumante Alla ga da saxabanxotte ke be wutu,
a da a taga yaxare yi,
na a riiti katta sere ke yi.
23 Sere ke da du toxo :
« Keeta ken ke,
ke xotte bogu in xotten ya yi,
ke fatantiye bogu in fatantiyen ya yi.
A wa toxoreene “ yaxare ”,
baawo a tege bakka yugon¤ ya yi. »
24 Ken ya saabu da,
yugon gaa fatene bakka i ma do i faaba yi,
nan kafi i yaqen ŋa,
nan ɲa baane yi.
25 I filli su duurun binnun ya n ɲi ken bire,
yugon do i yaqe,
xa i ma ɲi ken tu saxamofi yi.