[Yittirenmen yigeye]
3
Tunka duumante Alla ga da daaba su taga ɲiiɲen kanma,
samaqen ya n ɲi a su neeneliŋonten ŋa.
A ti yaxare ke da :
« Tonŋun ya ni,
xoyi Alla ti i ya : “ Xa maxa naaxo ke yittirenme su yiga ” ? »
2 Yaxaren ti samaqen da :
« Aayi,
o wa naaxon yittirenmen su yigana,
3 ma a ganta yitte ke be gaa naaxon naxaanen ŋa.
Alla ti o n maxa ken renmen yiga,
o n maxa kati a yi,
ken falle o wa kalla. »
4 Samaqe ke ti yaxaren da :
« Ken fe !
Axa nta kalla !
5 Alla na a tu ya nan ti,
axa nda yitte ke renmen yiga koota su,
axa yaaxon wa wuɲiini,
axa wa ɲaana xoyi Alla moxo,
axa yinmenu wa fo siren do fo buren bakka me yi. »
6 Bire be yaxare ke ga da a wari nan ti,
yittirenme ke faranparen ni,
a waritiyaaxen siren ni,
a wa i yigeyen tu roono i faayindaanan ŋa,
a siren xa ni ti haqilen wuɲiyen ŋa,
a da yittirenme ke yogo fata na a yiga,
na a yogo kini i kiina yi do du yi,
a xa da a yiga.
7 Ken batte su yi,
i yaaxon xosi wuɲi.
I da a tu nan ti i duurun ya ni.
I da turudarun miri me yi kuŋa,
na kun ɲa du da yiraamu yi.
8 Lellan mulaanen biren ŋa,
yugon do i yaqen da Tunka Duumante Alla rixannen mugu naaxon noxon ŋa.
I muxu a yi naaxo ke yittun noxon ŋa.
9 Tunka Duumante Alla da yugo ke gangu nan ti :
« An na minne ? »
10 A ti :
« N da an rixannen ya mugu naaxon ŋa,
n kanu,
baawo in duuron ya ni,
ken ya ni in ga muxu. »
11 Tunka Duumante Alla ti a da :
« Kon do a tuyindi an ŋa ti an duuron ya ni ?
Nke ga da an kaba yitte ke be renmen yigeyen ŋa,
an da ken ya yiga ba ? »
12 Yugon ti :
« An ga da yaxare ke be kafu in ŋa,
ken ya n da yitte ke renmen kini in ŋa,
n xa da a yiga. »
13 Tunka Duumante Alla ti yaxare ke da :
« An da ke ɲa na a soxu manne kanma ?
» Yaxaren ti :
« Samaqen ya n da in marasa,
n xa da a yiga. »
14 Ken falle,
Tunka Duumante Alla daali samaqe ke da :
« Na a saxu an da ke golle kanma,
n da an langa kaadunfoonun do gundufoonun su naxa !
An toqo xiilini an gonmen ya kanma,
an na doorijuran ya yigana an wuyin danman su yi.
15 N wa xonnaaxun sabatindini an do yaxaren naxa,
na a sabatindi an bonsonŋun do a bonsonŋun naxa.
I du baananbe wa riini an yinkollan tapi,
an xa wa riini a tanjunqon sopi. »
16 Tunka Duumante Alla daali yaxaren da :
« N wa an nuxuntaaxun xotondini an kanma,
na an jalan xa ɲa tooxe yi an kanma.
Ganta an wa mareyen muurunu an kiina kanma,
xa aken ya mareene an kanma¤. »
17 Tunka Duumante Alla daali yugon da :
« Xoyi an ga da an yaqen ya terinka,
nke ga da an kaba yitte be renmen yigeyen ŋa,
an ga da ken yiga,
ken kuŋa,
n da ɲiiɲen langa an saabu da.
Tanpiyi xoten falle,
an nta an biraadon kitana a yi an wuyun danman su yi.
18 Saasen xabiila gabe ya n riini funti ɲiiɲen ŋa,
an xa bireene ɲiiɲe ke funtifoonun ya yi.
19 An na an logoman kitta an futten ya yi bakka ɲiiɲen ŋa,
ma an kalle,
an gaa saagene katta ɲiiɲe ke yi,
an ga bogu a be yi,
an ni dooren ya yi,
an saagene katta ken doore ya yi. »
20 Haadama da i yaqen toxora Hawa,
[a wure ni :
« birante »],
baawo aken ya ni haadamarenmen su ma yi.
21 Tunka Duumante Alla da fatanyiraamun dabari Haadama do i yaqe ke da,
i nan feetufete ti i ya.
22 Ken falle Tunka Duumante Alla ti :
« Haadamarenmen faayi ga ɲa xoyi oku moxo,
a wa fo siren do fo buren bakka me yi.
Saasa,
a nan maxa ti i wa i kitten fuutunu do ŋaliyinyitten xa batte,
nan ti i wa a renmen fatana na a yiga,
ma i na bireyi duumanten kita. »
23 Ken kanma,
Tunka Duumante Alla da a xata bakka Hedeeni naaxon noxon ŋa,
kuudo a na ɲiiɲen golli,
a ga tege bakka ken be yi.
24 Bire be Alla ga da Haadama xata bakka Hedeeni naaxon ŋa,
a da xeribunu¤ wara a killen ŋa kinbakka,
i do yinbinkaafa,
a wa tiirinbene do kaaran su yi,
kuudo na ŋaliyinyitte ke tanga.