[Xaabila do Haabila]
4
Haadama do i yaqe Haawa wuyi,
a da noxon wutu nan saare ti Xaabila¤ yi.
A ti :
« Ee !
N da renyugo kita ti Tunka Duumanten yideyen ŋa ! »
2 Ken falle,
a saare ti a yaaxidon ŋa,
Haabila.
Haabila ɲa nagaana yi,
Xaabila ken ɲa soxaana yi.
3 Waxati falle,
Xaabila da i soxofoonun yogo ɲa allankuye yi Tunka Duumanten da.
4 Haabila xa da i tanmison ren fanon ɲa allankuye yi,
na i tiyen fo katen kini Tunka Duumanten ŋa.
Tunka Duumanten da Haabila sadaxan raga,
5 xa,
a ma Xaabila xallen raga.
Ken digi Xaabila yi na a diinan finandi.
6 Tunka Duumanten daali Xaabila da :
« An butu manne yi na an diinan finandi ?
7 An ga na fo siren ɲa,
an wa wurugini.
An ga ma fo sire ɲa xa,
yangon ya n daaxene an raqen ŋa de,
na an jaarabi.
Xa,
anken ya n xawa a niini. »
8 Ken falle,
Xaabila ti i waaxi Haabila da :
« O n daga teenun ŋa.
» Bire be i ga kiɲe teenun ŋa,
Xaabila xenu i waaxin ŋa na a kari.
9 Tunka Duumanten daali Xaabila da kuŋa :
« An waaxi Haabila na minne ?
» A ti :
« Nke ya na a nagaanini ba ?
N nta a noqu tu. »
10 Tunka Duumanten daali a da :
« An da manne dabari kundu ?
An waaxin foren sonqo xannen kiɲe in ŋa gilli ɲiiɲen ŋa,
ti i tanbon nan tuge.
11 Saasa,
an ga da an waaxin kari ti an kitten ŋa,
ɲiiɲen da a foren sugu,
an lange,
ɲiiɲe ke ntaxa duŋene an da.
12 Bire su,
an ga na a soxo,
a ntaxa duŋene i soxofoonun kinni an ŋa.
An wa ɲaana sabatinbali yi,
a do langa-langante ɲiiɲen kanma. »
13 Xaabila ti Tunka Duumanten da :
« N garamajigingolle ke xoto in kanma moxo buru.
14 An faayi ga da in xata bakka ɲiiɲa siren ŋa lenki,
n wa riini muxu an ŋa,
nan ɲa sabatinbali yi,
a do langa-langante ɲiiɲen kanma,
sere be nda in wari,
a na in karini ya de ! »
15 Tunka Duumanten daali a da :
« N da a faamu.
Sere be nda Xaabila kari,
a tanbon wa tugeene a kaman ŋa taanu ɲeru.
»
Ken moxo yi,
Tunka Duumanten da maara ro Xaabila yi,
kuudo sere be nda a wari, a nan maxa a kari.
16 Xaabila laato Tunka Duumanten ŋa.
A daga taaxu Noodi¤ jamaanen ŋa,
Hedeeni kinbakka.
17 Fi falle,
Xaabila do i yaqen wuyi,
a da noxon wutu nan saare ti Hanooxi yi.
Xaabila da debe taaxundi na a toxora i renyugo Hanooxi yi.
18 Hanooxi da Yiraadi saara,
Yiraadi xa da Mehuuyeli saara,
Mehuuyeli da Metuseeli saara,
Metuseeli da Lemeexi saara.
19 Lemeexi da yaxaru filli yaxi.
Fanan toxon ni Haada,
fillandin toxon ni Cilla.
20 Haada saare ti Yaabali yi,
ken ya ni nagaanaanon seri fanan ŋa,
tilliisigumun do daaba maraano.
21 A xoxonen toxon ni Yuubali,
ken ga ni ganbaritimaanon do fuulutimaanon seri fanan ŋa.
22 Cilla xa saare ti Tuubali-xaabila yi,
ken ɲa tage yi,
a wa jaxawallen¤ do mexen gollini.
Tuubali-xaabila waaxi yaxaren toxon ni Naama.
23 Koota yi Lemeexi ti i yaqu ku filli da :
« Haada,
an do Cilla,
xa da in terinka moxo siri !
N yaqu,
xa da axa taron sigindi do in sefe koninton ŋa !
Nke na yugo ya karini in joogiyen batte,
na fonnanxaye kari in gurungaasiyen batte.
24 Xaabila tanbon wa tugeene ta ɲeru,
xa Lemeexi tanbon tugeene tanɲere do taanu ɲeri ya. »
25 Haadama do i yaqe ke wuyi xadi,
a saare ti renyugo yi,
na a toxora Seeti,
[a wure ga ni « kuye »],
a ti :
« Alla da funtifo tana kini in ŋa Haabila batten ŋa,
Xaabila ga da a kari. »
26 Seeti xa da renyugo kita,
na a toxora Henoosi.
Ken waxatin ya ni,
seron ga jope Alla xilli ti i toxo :
Tunka Duumante.