[Sadaxanfutaadinbeelo]
30
« An wa sadaxanfutaadinbeelo dabarini, futaaden gaa futaadini fo be yi. An na a dabarini ti saayinsollen ya. 2 A nan ɲa jungunnaxaton ya, a tan ni sogone, a noxon ni sogone, a sigen ni sogone fillo, a do i bennun gaa tokkiini me yi. 3 An na a gosaasini ti kan hooren ya yi : a kanmun do a kaaro, do a bennu. An wa kanŋen fanaaron roono do a kaaron ŋa. 4 An na kangodongodo filli dabari a da a kaaro ku filli yi fanaaro ke wure. An na i roono kaaro ku filli yi ya kuudo na a wutu ti i ya. 5 An wa berenberu ku dabarini ti saayinsollen ŋa, na i gosaasi ti kanŋen ŋa.6 « An na sadaxanfutaadinbeelo ke ro yirankutaaden jon ŋa, seedaaxunwaxanden gaa noqu ke be, bipaade be gaa waxande ke kanma yi jo, noqu ke be in gaa an genmanlenmaaxunu. 7 Haaruna wa timiliŋen futaaden suxubanfutaadini a kanma yi. Suxuba su ya ni a ga na ɲi fitillun moxo sirondini, a na a futaadi. 8 Bire be Haaruna ga na ɲi fitillun segendini futuron biren ŋa, a nan toxo futaaden futaadini Tunka Duumanten jon me naxan ŋa axa bonsonŋun su da, ma abada. 9 Xa maxa futaadi sagatante wara a kanma, a do sadaxa xuruminte, ken do sadaxa juruminte, xa maxa resendolonsadaxa xa deela a kanma. 10 Haaruna na alikafaarabaganden ɲa a bennun kanma yi siinen ŋa gelli futuxiyensadaxa bogunto ku foron ŋa. A wa alikafaarabagandini a kanma yi axa bonsonŋun danŋa ma abada, siine su ta baane. Fo sennun fo senne, ken ni Tunka Duumanten ya da. »
[Maxawaseyen muso]
11 Tunka Duumanten daali Annabi Muusa da : 12 « An ga na ɲi Banisirayilaganko jaaten wuttu an gaa i yirigana, i du baananbe¤ su n xawa i yonkin maxawasana Tunka Duumanten da i yirigaye ke xanne maxa, kuudo taawoone n maxa yanqa i ya yirigande ke taara. 13 I be su gaa ke be kinni an duguta falle yirigeene, a faayi ke ; godoxullen taxandi tanmu, ken gaa genme tilliisi sennen xaalisin xiiman ŋa. 14 Yinme su yiriganden sokken ga xenu an ŋa, na a wutu tanpille siine renme nan sege, a kaman wa Tunka Duumanten taqen kinni. 15 Bannan nan maxa jiidindi, misikiinen nan maxa kontondindi ke xaalisinduubali baane maxa bire be axa ga na ɲi Tunka Duumanten taqen tugana kuudo na axa yonkinun maxawasa. 16 An wa ke yonkijonko ragana Banisirayilagankon ŋa, na a ro genmanlenmaaxuntilliisen gollen ŋa. A na ɲa Banisirayilaganko da sinmaado yi Tunka Duumanten jon me naxa ti yonkinun maxawasayen ŋa. »
[Jaxawallinwanqiwaate]
17 Tunka Duumanten daali annabi Muusa da nan ti : 18 « An na jaxawallinwanqiwaate dabari, a taaxaaden ga ni jaxawallen ŋa, an na a ro genmanlenmaaxuntilliisen do sadaxindinoqun naxa, an na jin ro a yi no. 19 Haaruna do i renmun na i kittun do i taanun wanqi ti a yi. 20 I royinto genmanlenmaaxuntilliisen ŋa, walla xa i ga na ɲi tinkoono sadaxindinoqun ŋa kuudo nan xidime ti yinbidunsadaxa sadaxinden ŋa Tunka Duumanten da, i na wanqi, i n maxa daga kara. 21 I na i kittun do i taanun wanqi i n maxa daga kara, ken wa ɲaana i da abadanfarilan ŋa, a do i bonsonŋun do i yilleyu. »
[Daarindite]
22 Tunka Duumanten daali Muusa da nan ti : 23 « Anken kuŋa, an na timiliŋen yinmi-yinme wutu an du da, timiliŋaadinkanbarillen kallanken duuro, kilonu karagi, timiliŋaadinkurume, ken taxande, ken wa genme kilonu filli do taxande, timiliŋaadinsokke, kilonu filli do taxande, 24 xiida¤, kilonu filli do taxande, ken gaa genme tilliisi sennen xensenden xiiman ŋa, a do jayituunante, liitaranu naxati¤. 25 An na i ɲa daarindite sennen ŋa, fo sonqinten ya ni xoyi sonqindaana be gollen ga ni. A na ɲa daarindifo sennen ŋa. 26 An na genmanlenmaaxuntilliisen daari ti a yi, a do seedaaxunwaxande, 27 a do taabalin do i yokku, do fitillen do i yokku, kafiini sadaxanfutaadinbeelon ŋa, 28 ken dosadaxaxurumindifondo i yokkun su, a do waaten do i taaxaade. 29 An na i senondi, i na ɲa fo sennun fo sennen ŋa, i meemenda su na seno. 30 Haaruna do i renmu, an na i daari na i senondi, i na xidime in da. 31 An na digaamu Banisirayilaganko da nan ti : “ Ke ɲaana in da daarindite sennen ya yi, katta axa bonsonŋun do i yillayun ŋa. 32 A nta maaseene seren su faten ŋa, xa nta a me xa dabarini, a sennen ya ni, a ɲaana axa da fo senne ya. 33 Sere be ga na a me sonqi, a do i be ga na a ro seranmalla yi, an wa xateene bakka an seron ŋa. ” »
[Futaade]
34 Tunka Duumanten daali annabi Muusa da : « Futaadi timiliŋu wutu du da, kanbarinlenme, selexitaane, a do helibaani sennen do lubaani, i nan ɲoro, baane ti baane, 35 an na i dabari futaadi sonqinte yi xoyi sonqindaanan moxo, sapinma laabante, a senne. 36 An na fo juri bakka a yi, an na a wara seedaaxunwaxanden jon ŋa genmanlenmaaxuntilliisen noxo, n gaa an genmanlenmaaxunu noqu ke be, a na ɲaŋi fo sennun fo sennen ŋa axa da. 37 An gaa futaade ke be dabarini, xa maxa a me duran dabari axa yinmenu da ; fo sennen ya ni axa maxa Tunka Duumanten da. 38 Sere be ga na a me dabari, kuudo na an du timiliŋi ti a yi, an wa kutiini bakka an jaman ŋa. »