[Dingira sennen golliɲaŋaano]
31
Tunka Duumanten daali Muusa da nan ti : 2 « N faayi ga da Becaleeli xiri ti i toxon ŋa, a faaba ga ni Wuuri, ken faaba ni Huura i gaa bakka Yehuuda xabiilan ŋa. 3 N da a faga ti Allanyonkin ŋa, kuudo a na fontuwaaxun kita a do haqilisirigumaaxun do faamuye, do yaaxaranxaraaxu, 4 na a sugandi xerexereye yaaxe maxa, kuudo na kanŋen do xaalisixullen kittiragollen bangandi, a do jaxawalle, 5 ken do gidisekiyen do sollisekiye, kuudo na yokken danben su dabari. 6 N faayi ga da Hayisamaaxi renme Holiyaabu wara do a batten ŋa, a gaa bakka Daani fonlaqen ŋa, n da sondontuwaaxun ro sondomedunke su yi ya, kuudo in ga da an ɲaamari ti fo wo fo yi, i na ken dabari : 7 gemmanlenmaaxun tilliise, seedaaxun waxande, a do bipaade be gaa a yi, a do tilliisen yokken su, 8 kafiini taabalin do i yokku, a do fitilli sennen do i yokkun su, ken do sadaxanfutaadinbeelo, 9 do sadaxaxurumindifon do i yokken su, ken do waaten do i taaxaade, 10 a do begi sugandinto, do sadaxakiɲandaana Haaruna begi sennu, ken do a renmun sadaxakiɲandibeginu, 11 a do daarindite, do futaadi timi liŋe dingira sennen da. N ga da an ɲaamari ti ke be su yi, i wa a su dabarini. »[Sibitinkoota]
12 Tunka Duumanten daali Muusa da nan ti : 13 « An nan jaabi Banisirayilaganko danŋa ti : “ N sibitinkooto, xa na i tanga, baawo ken ya ni taagumansen ŋa in do axa do axa bonsonŋun do i yilleyun su naxa, kuudo a nan tuyi ti inke ya ni Tunka Duumanten ŋa, ke be gaa axa senondini. 14 Xa da sibitinkootan tanga, baawo a sennen ya ni axa da. I be xa ga na a sobindi, an kalla ya : golliɲaŋaana su ga na golli a yi, ken yonki xateene bakka i jaman naxan ŋa ya. 15 Bito tunmi noxon ŋa an ra wa gollini, xa bita ɲerundi ke ni sibitin ya, tuumayinkoota, fo sennen ya ni Tunka Duumanten da. Sere su ga na golle dabari sibitinkootan ŋa, a kaman nan kara. 16 Banisirayilaganko wa sibitinkootan tangana, i nan duume sibitinkootan kanma yi i bonsonŋun da, ken ni abadantafunden ya, 17 nke do Banisirayilagankon naxa. Taagumansen ya ni ken ŋa ma abada, baawo bito tunmi noxon ya ni Tunka Duumanten ga da kanmun taga, a do ɲiiɲe. Bita ɲerundi ke kuŋa, a tuuma, nan yonki. ” »
18 Alla do Muusa ga duguta sefene Tuurisiina giden kanma bire be, a da seedaaxun wallahon filli kini a yi, gidinwallaho, a yinme ga da i safa.