[Laayidu bononten kurunbaaxuye]
[Gunbunlenmen xibaare]
32
Jaman ga da a wari Muusa ga leele yanqana bakka giden kanma, i da me ɲi Haaruna noqu nan ti a da : « Giri an na kamane¤ dabari o da, fo be gaa ɲaana o kaane ! Baawo aken Muusa be ga da o segendi bakka Misira jamaanen ŋa, o ntaxa a tu fo be ga da a kita. » 2 Haaruna ti i da : « Kanŋu be gaa axa yaqun do axa renmun tarun ŋa, axa da i boora, axa do i nan ri katta in ŋa. » 3 Jaman da kanŋun boora bakka tarun ŋa, nan ri i kini Haaruna yi. 4 A ga da kanŋun kita i ya, a da i xaja na i ɲa gunbunlensawuran ŋa, na a ɲegu ti ɲegaaden ŋa.Ken bire i ti : « Isirayila, an kaman faayi, ke be ga da an segendi bakka Misira jamaanen ŋa ! » 5 Haaruna ga da ken wari, a da sadaxindinoqun dabari sawura ke jon ŋa. Ken falle a da i xannen do a wutu nan ti : « Xunbane ni sallen ya ke Tunka Duumante da. » 6 A yillakara, i furute gilli na sadaxa xuruminten bagandi, a do allatiigeyinsadaxa. Jaman taaxu i yige, nan mande, nan fesexi.
7 Tunka Duumanten daali Muusa da : « Yanqa ! Baawo an jaman da du bonondi, an ga da jama be segendi bakka Misira jamaanen ŋa. 8 I jewo laatono bakka in ga da kille be waajibi i kanma. I da gunbunlensawuran ya dabari nan sujudi a da, i sadaxindi a da, nan saage tini : “ Isirayila, an kaman faayi, ke be ga da an segendi bakka Misira jamaanen ŋa. ” »
9 Tunka Duumanten saage daalini Muusa da : « N wa ke jama tu de, xa a siro ! Jama xandunxoton ya ni ! 10 Saasa ke in wara in na i yanganxata, n na i buruxa, n na xabiila xoore tana bangandi bakka anken ŋa. » 11 Xa Muusa da Tunka Duumanten xanjo, a Alla, nan ti a da : « Ee, Tunka Duumante ! Manne saabu da an butten gaa bakka katta an jama be, an yinme ga da i bagandi Misira jamaanen ŋa ti an senbe deren do an kitti senbenten ŋa ? 12 An ga na ken ɲa, Misiranko wa tini bureyen ya n sigi an ga da i bagandi, ti an nan daga i kari do gidun ŋa, kuudo an na i buruxa bakka ɲiiɲen kanma ! An butten yanqandi, an nan maxa fo bure ɲa an jaman ŋa. 13 Sinme do an komo ku beenu an ga kuna ti an yinme yi i danŋa, kun ga ni Ibirahiima, Isiyaaxa, do Isirayila, an ga ti i da : “ N wa axa bonsonŋun gabondini xo kanmun saanun moxo, a do in ga da jamaane ke be xa ko, n wa a kinni axa bonsonŋun ŋa, a gaa ɲaana i da duudan xalle yi ma abada. ” »* 14 Tunka Duumanten saage fiidumaxanyillene.
15 Muusa fete Tunka Duumanten ŋa, a do Yuusawu, nan yanqa bakka giden ŋa, seedaaxun wallahon filli wa a kitten ŋa. Baane su kaaron filli safanton ya ni, gelli ke kaara ma kiteeren kaara. 16 Wallaho ku ni Alla ya wallaha dabarinto yi, safandu ku ni Alla ya safandi nooninto yi i wallaho ku kanma.
17 Yuusawu ga da jaman geejexanne mugu, a ti Muusa da : « Gajanxannen wa daaxan ŋa ! » 18 Muusa ti :
« Ke feti niyindinsuuge yi,
niyintamaxansuuge xa fe,
n taron gaa ke be yi,
feteduwaseyinxannen ya ni. »
19 Muusa gaa tinkoono daaxan ŋa, ma a yaaxen ga nta gunbunlenmen ŋa, jaman gaa regeene. Muusa butu nan kiɲe i xenpan ŋa. Wallaho ku beenu gaa a maxa, a da i sedi giden wure ma i gaa kareene. 20 A da gunbunlenme ke wutu na a ro yinben ŋa, ma a gaa ɲaana juran ŋa, na a ro jin ŋa, na a minindi Banisirayilaganko yi.
21 Muusa ti Haaruna da : « Ke jama da manne ɲaŋi an ŋa, ma ken gaa a sababunu an gaa ke junuubu xoore kiɲana i ya ? » 22 Haaruna ti : « Yelli in kaman gan nta butu ! Anken yinme wa a tu ti ke jama na bonoyen ya noxon ŋa. 23 I ti in da ya : “ Kamane¤ dabari o da, a gaa ɲaana o kaane, baawo ke Muusa be ga da o segendi bakka Misira, o ntaxa a tu fo be ga da a kita. ” 24 N xa ti i da kuŋa : “ Kanŋe na ko maxa ? ” I da i boora bakka i tarun ŋa na i kini in ŋa. N ga da i sedi yinben ŋa tan, ke gunbunlenme xosi bogu. »
25 Muusa da a tu nan ti jama ke waranten ya ni. Haaruna da jaman toxo xonnosogaaxun noxon ŋa. 26 Muusa sigi daaxan raqen ŋa nan ti : « Sero beenu gaa do Tunka Duumanten ŋa, xa tinko in ŋa. » Leewi fonlaqen su da me ɲi a kaaran ŋa. 27 A ti i da : « Tunka Duumanten ya n daali, Isirayila Alla, ti : “ Sere su na i kaafan wutu, axa n ro do daaxan ŋa, fonlaqe ti fonlaqe, axa n daganansaage do axa waaxinun do axa xananun ŋa, a do axa tinkanlenmo, axa na i kari. ” » 28 Leewi renmun da Muusa ɲaamarindixannen dabari, wujunu sikki (3 000) sere me ya n kara daaxan ŋa ken koota. 29 Muusa ti : « Axa da axa sugandiyen sigan kita Tunka Duumanten da. Baane ma jiixijaaxa i renmen do i waaxin karinden ŋa. Alla da bareke ro axa yi ti axa lenki ke golle yi. »
30 Ken yillakara, Muusa ti jaman da : « Axa da junuubu xoore dabari. Xa saasa, n wa segene katta Tunka Duumanten ŋa, a me wa du, a na duŋe in da nan yanpa axa maxa. »
31 Muusa saage katta Tunka Duumanten ŋa nan ti : « Ayiwa, ke jama da junuubu xoore dabari : i da kanŋen taga na a ɲa du da kamane yi. 32 Saasa ke, n da an ɲaaga an nan yanpa i maxa, ken ga nta a yi xa, an na inke toxon buruxa bakka an lowolimanfuujin wallahon ŋa. » 33 Tunka Duumanten daali Muusa da : « Sere be ga da junuubun dabari, n na ken ya toxon buruxa bakka in wallahon ŋa. 34 Daga jaman geesu dagana in ga ti noqu be ! An da a wari de, n maliikan ya n tereene an kaane keeta ! Xa inke ga na giri do i ya koota be, n na i yanganxatana ti i junuubun ya. »
35 Tunka Duumanten da jaman yanganxata na a sababun ɲa Haaruna ga da gunbunlensawura be dabari i da.