[Annabi Muusa xanjonde]
33
Tunka Duumanten daali Muusa da : « Giri yere, an do ke jama be an ga da segendi bakka Misira jamaanen ŋa. Sege katta in ga da jamaane be laayidun wutu Ibirahiima do Isiyaaxa, do Yaaxuba da, n ga ti i da : “ N da a kini an soxoodin ya. ”* 2 N na maliikan wara an kaane, na Kanaanagankon do Hamoorikaarankon xata, a do Heetiganko, Perijinu, Hiiwikaaranko, a do Yebuusikaaranko. 3 Sege katta xattin do tamarileeman waranlaqen jamaanen ŋa. Nke yinme ra nta segene do axa yi, baawo an jaman ni xandunxoton ya, n wa kanna in nan maxa axa buruxa killen ŋa. »4 Jaman ga da ke xibaari bure mugu, i da a sunnun raga. Sere su ma yanbanfo rondi. 5 Tunka Duumanten daali Muusa da : « A ko Banisirayilaganko da ti jama xandunxoton ya ni. N gan n ɲi axa noxon ŋa, hari san baane, n ɲi axa ɲamana ya. Saasa xa da axa yanbanfoonun boora, n na a tu n gaa fo be ɲaana axa yi. » 6 Banisirayilaganko xosi i yanbanfoonun boora gelli Tuurisiina giden ŋa.
7 Bire su Muusa nda tilliisen wutu na a banba daaxan laatoyen ŋa, na a xiri « genmanlenmaaxuntilliise », sere be ga na ɲi a mulla i na Tunka Duumanten muuru, an bakka nan daga ken tilliise ya yi, daaxan falle. 8 Muusa ga na ɲi dagana tilliise ke yi, jaman su wa gilli nan daga sigi i tilliisun raqun ŋa na Muusa faayi, ma a ga na ro tilliisen wure. 9 Muusa ga na ro bire be, tabullen na ri tilliisen raqen ŋa, Muusa do Tunka Duumanten gaa sefene. 10 Jaman ga na tabullen wari tilliisen raqen ŋa, baane su na giri, nan sujudi i tilliisen raqen ŋa. 11 Tunka Duumanten do Muusa wa sefene xo seron filli moxo¤. Ken falle Muusa na ri daaxan ŋa. Xa a xidimandaana Yuusawu, ken ga ni Nuunu ren yugon ŋa, aken na toxo tilliisen wure.
12 Muusa ti Tunka Duumanten da : « A faayi ! An yinme ya n ti in da : “ Ke jama segendi. ” Xa an ma in tuyindi sere be gaa dagana do in ŋa. Ken xa an yinme xa ya n ti : “ N da an sugandi. ” a fillandi : “ N da an xanu. ” 13 Saasa, selli tonŋu, n xanuyen gaa an ŋa, an ŋanniyen koyi in ŋa in na a tu. Ken moxo, n na an deemanden kita. Xadi, an na a tu ti ke xabiila na an ya jama yi de ! » 14 Tunka Duumanten daali : « Nke ya n telle do an ŋa na an tuumandi. » 15 Muusa ti : « An yinme ga nta riini, maxa o segendi bakka yere yi. 16 A tuwiini kan moxo ti inke do an ku sero da an xanuyen kita ? O do an gaa do me yi ya fe, o ra gaa a tuunu nan ti sere su gaa ɲiiɲe ke yaaxen kanma, o do a nta baana ? » 17 Tunka Duumanten daali Muusa da : « An ga da ke be ko saasa, n wa a ɲaana, baawo an da in xanuyen kita, n da an sugandi xa. »
18 Muusa ti : « N da an ɲaaga, an na an nooron koyi in ŋa ! » 19 Alla daali : « N wa dangini an kaane, na in siroyen su koyi an ŋa, na in toxon ko an da, a ya ga ni Tunka Duumante. N ga hinne sere be, n hinne an ŋa, n ga da sere be neema, n da an neema. 20 An ra nta inke faayini, baawo sere ra nta in jaatin walla, an gaa toqo bireene. 21 Sigi in kaaran ŋa ken noqu yi giden kanma. 22 N nooron danginte, n wa an roono gide ke kareyen naxan ŋa, na in kitten bifi an kanma katta in gaa dangini. 23 Ken falle, n na in kitten bogu a yi, an na in falla koyinten wari. Xa sere ra nta in jaatin walla. »