[Laayidun kurunbaaxunde]
34
Tunka Duumanten daali Muusa da : « An yinme na gidinwallaho filli seku du da, xo wallaha fano ku be an ga da i kara, digaamu beenu ga ɲi wallaha fano ku kanma, n na kun me safa ku xa kanma. 2 An na an moxo sirondi katta xunbane suxuba, an na furute segene Tuurisiina giden kanma, an na sabati in kaane, gide ke tonben ŋa. 3 Sere su nan maxa sege do an ŋa, sere yinme nan maxa wari gide ke kanma, hari naabure nan maxa tinko a kaaran ŋa. »4 Muusa da gidinwallaha fano ku filli me seku, nan furute gilli xo Tunka Duumanten ga da a ko a da moxo be, gidinwallaho ku filli wa a kitten ŋa, nan sege Tuurisiina giden kanma. 5 Tunka Duumanten yanqa, a gaa tabullu xooren noxon ŋa, nan sigi do a yi, ken falle nan gangundi ti Tunka Duumanten toxon ŋa. 6 A dangi a kaane, a gaa tini : « Tunka Duumante ! Tunka Duumante ! Alla hinnaana, neemandaana, nooxe, fonnansire. A duntenŋaaxu, xenpa nta a yi. 7 Alla be fonnansiraaxun gaa duumene do bonsonŋun ŋa ma wujunun wujunun haadamarenmu, a gaa futuxiyen do murutiyen do junuubun muɲini, xa, a nta mungunu junuububuruɲaŋaanan junuubun ŋa, a wa faabe junuubun duumandini do a renmun ŋa, ma a buru sikkandi katta naxata. »
8 Muusa xosi tusi ɲiiɲen ŋa nan sujudi, 9 nan ti : « An ga ti an da in neema, n Kama, ri do o batten ŋa kuŋa. Baawo jama xandunxoton ya ni, xa an na yanpa o murutiyun do o junuubunun ŋa. An na o raga an sero yi. »
10 A ti : « N wa laayidun tinmandini. N wa kaawafin gaben dabarini an seron su jon ŋa, fiinu be me ga ma tage ɲiiɲen kanma, sigaali xabiila tana yi. Jama ke be su gaa do an ŋa, a wa a tuunu inke Tunka Duumante, n gollen dare ga ni moxo be, na a saxu in gaa ke be ɲaana an da. 11 N ga da an ɲaamari ke be yi lenki, tigiti a yi siri, nke wa Hamoorikaarankon xatana bakka an kaane, a do Kanaanagankon do Heetiganko, kafiini Perijinun do Hiiwikaarankon ŋa, a do Yebuusikaaranko. 12 Du koroosi, an gaa dagana jamaane ke be yi, an do i n maxa laayidu tafu me naxa, a nan maxa ɲa an danŋa selleqe yi. 13 Xa, xa na i sadaxindinoqunun guruja, xa na i gidi siginton kutu, xa na i munu yaxare Haseera gondoma siginton xoso. 14 Ken moxo, axa ntaxa kamane tana batta, baawo Tunka Duumante be toxon ga ni suuxaana, a ya ni Alla ke be gaa suuxunu.
15 « Maxa sarati tafu an do jamaane ke seron naxa. Ken ga fe, i ga da i munonun yaxi moxo be, i ga na ɲi i musunu, i na an xilli ya, an gaa i musundonu ku yigana. 16 An ga na i ren yaxare yaxi an ren yugon da, i ren yaxarun yaxinton gaa i munonun ŋa moxo be, an ren yugon xa riini i allanu ku yaxi kundun ya.
17 « Maxa fo su sawuran dabari du da ti mexe buudante yi, na a ɲa kamane.
18 « An na buuru lewiirintanŋen sallen salli. Bito ɲeri noxo, an na buuru lewiirintanŋen ya yigana. N da an ɲaamari ken ya yi Habiibunxason ŋa, baawo axa bogu Misira jamaanen ŋa ken xaso ya yi.
19 « Sooman su ni inke ya xalle yi, seron do naaburun su, nan do tanmise.* An na toxo sinmeene ti a yi. 20 Xa, an na farun ren fanon maxawasa ti jaxe yi. Selli an ga nta i maxawasana, an na i xannun xoso. An na an ren yugu sooman su maxawasana ya.*
« Sere su kitti duuron maxa ri in wari, sadaxa ga nta an maxa.
21 « An na bito tunmi golli, xa bita ɲerundi, an na tuuma. Ken ga na ɲa hari soxen biren ya, ma sanjaanen ya yi.
22 « An na Fateyifanon koyinsallen dabari sanjaanen fananŋun ŋa, a do Fateyilagaren salle siinen lagaren ŋa. 23 Siine su, an yugun su na hadari Kamanen jon ŋa taanu sikki, Tunka Duumante, Banisirayila Alla. 24 Bire be an ga na ɲi segene ta sikko siinen ŋa katta Tunka Duumanten ŋa, an Alla, maxa kanu ! N gaa xabiilanu beenu xatana bakka an kaane, na an yuruwandi an ɲiiɲen ŋa, i yaaxe nta bakka do ɲiiɲe ke yi.
25 « An ga na sadaxa xurusi na a foron joxi in da, maxa buuru buukunte ro a yi. Pesaxansallen sadaxantiyen nta taaxiini ma bita fillan suxuba.
26 « Fateyifanon sallen ŋa, an na an ɲiiɲen soxanfo siri fanon su riiti Tunka Duumanten kan ŋa, an Alla.
« Maxa sugunlenmen soro ti i ma xattin ŋa¤. »
27 Tunka Duumanten daali Muusa da : « Ku digaamu safa, baawo in do an do Banisirayilaganko ga da sarati be tafu, a sabatini ku digaamu ya kanma. »
28 A do Tunka Duumanten da tannaxate wuro do tannaxate kiye ɲa doome, a ma yige, a ma mini. A da saratixannu ku tanmi safa wallahon kanma.
[Muusa yeeson nooroye]
29 Muusa yanqante nan giri Tuurisiina giden kanma, seedaaxunwallaho ku filli gaa a maxa, jaaxa a yeeson nooro na a do Tunka Duumanten toxo sefene, aken Muusa yinme ma a tu. 30 Haaruna do Banisirayilaganko yaaxen gaa a yi ŋaalini, i kanu tinkoono a yi. 31 Muusa ga da i xiri ya ni, Haaruna do Banisirayilaganko yinmankon ga saage katta a yi, Muusa sefe i da. 32 Ken falle ya ni Banisirayilaganko su ga tinko. Tunka Duumanten ga da ɲaamarindixannu be kini a yi Tuurisiina giden kanma, a da i kiɲandi jaman ŋa. 33 Muusa do i ga duguta sefen ŋa, a da jeeren ro i yeeson ŋa. 34 A do Tunka Duumanten ga na ɲi sefene, a na jeeren bogu i yaaxon ŋa, ma a ga n nan bogu. A bogu falle, a ga da ɲaamarindixannu be kita, a na kun ko jaman da. 35 Banisirayilaganko yaaxen ga na ɲi Muusa yeeson gaa ŋaalini, a na jeeren ro a yi, ma a ga na ɲi saagene katta Tunka Duumanten ŋa xadi.