[Allanbatika yiranman dabariye]
[Tuumayinkootan do ɲaamarixannu]
35
Muusa da Banisirayilaganko su kafu me yi nan ti i da : « Tunka Duumanten ga da fiinu beenu ko nan ti o na i dabari, i ya faayi ku : 2 bito tunmi noxon ŋa, an ra wa gollini, xa bita ɲerundi, ken nan ɲa Tuumayinkootan ŋa, a sennen ya ni Tunka Duumanten da. Sere su ga na golle dabari ken koota, a kaman nan kara. 3 Axa ga na ɲi noqu su, axa n maxa hari yinbe kumu Tuumayinkootan ŋa. »4 Muusa ti Banisirayilaganko da : « Tunka Duumanten da ke ya ko i ɲaamarinden ŋa : 5 Axa dubaananbe su na deemanden wutu Tunka Duumanten da. Fo be gaa sere su maxa, an na a bagandi ti nuxudunxullaaxu yi Tunka Duumanten da, na a wutu kanŋe, xaalisixulle, jaxawalle, 6 baxa xaxace, lankaran do fo dunbu xaxace, sasi xote, xaasa, 7 kafiini jaxandigifata dunbunte, a do liwongifata mosinte, do saayinsolle, 8 a do kumiteenu, daarinditetimiliŋaadun do futaade, 9 a do gidi ŋaalinto, i gaa i xilli “ onkisi ”, do gidi kaananko tananu, kun gaa roono sadaxakiɲandaanon yinmanken batibanjangaran do a gijinlanŋen kanma.
10 « Tunka Duumanten ga da o ɲaamari ti fo wo fo yi, sere su ga ni yaaxaranxare yi, an nan ri a dabari : 11 allanbatika yiranman do a gemmanlenmaaxun tilliise, a xufa, a geresaadu, a tontonsaaxenu, a xepu, a tilliisintonton do i sigaadu, 12 waxanden do i wutaadu, waxanden bipaade, a do yirankutaade be gaa a do seron naxa, 13 taabalin do i wutaadu, kafiini a yokkun su yi, sadaxanbuuru¤, 14 fitillen do i yokkun su, a kumisoomon do a kumiteenu, 15 sadaxanfutaadinbeelon do i wutaadu, daarinditen do futaade, do gemmanlenmaaxun tilliise ke fonlaqinyirido, 16 sadaxaxurumindifon do tiyibiyimexe jaxawallinma be gaa a noxo, a wutaadun do i yokkun su, waaten do i taaxaade, 17 allanbatika yiranman yoorindaadun do i tonton do i sigaadun do i fonlaqinyirido, 18 gemmanlenmaaxun tilliisen tonton do a beran yoorindaadun tontaadu, a do i kacu, 19 a golliɲaŋaanon yiraamu, Haaruna yiraamu, sadaxakiɲandaana ke, do a renmun gaa yiraamu be rondini, i ga na ɲi sadaxindini. »
20 Banisirayilaganko su giri na Muusa toxo. 21 Duusugandinton do haqili siri gumun do Tunka Duumanten kuyen ri, na allanbatika yiranman gollun dabari ti i ya, kafiini sadaxakiɲandiyokkun do sadaxakiɲandaanon yiraamu. 22 Yugun do fo ri, yaxarun xa do fo ri : nuxundunkanŋu, tarudunkanŋu, doronmo, a do fo wo fo su ga ni ɲaagaare, kanxunturo, be su senben haqen ga ni fo be, a duumaxayanqanten da ken bagandi Tunka Duumanten da. 23 Fo be ga ɲi sere su maxa, na a wutu gaari baxa xaxace, a do lankaran do fo dunbu xaxace, sasinyiraame, xaasa, jaxandigifata dunbunte, a do liwongi fata mosinte, i do a su ri. 24 Sere su ga da xaalisixullen do jaxawallen kuyi Tunka Duumanten da, saayinsolle gaa a kaman maxa, a do a ri, i na allanbatika yiranman dabari ti a yi.
25-26 Yaxaru beenu gaa monjollen tu, i da suguyinten wurundi, do a nan ri kafiini gaari baxa xaxace, lankara, fo dunbu xaxace, a do sasi xote. 27 Gidu be gaa roono sadaxakiɲandaanon batibanjangaran gijinlanŋun do i kunkun ŋa, i gaa i xilli « onkisi », yinmankon do i ri 28 kafiini timiliŋaadun do kumiteenun ŋa, a do daarinditeenun do futaade. 29 Fo wo fo su gaa roono golle ke yi, Tunka Duumanten ga ti Muusa na a ko Banisirayilaganko da, yugon do yaxare, sere su ŋanniyen sire ga ni, a do a ri ti nuxudunxullaaxu yi Tunka Duumanten da.
30 Muusa ti Banisirayilaganko da : « Xa da a wari ! Tunka Duumanten da Becaleeli xiri ti i toxon ŋa, a faaba ga ni Wuuri, ken xa faaba ga ni Huura, i gaa bakka Yehuuda xabiilan ŋa. 31 A da a faga ti Allanyonkin ŋa, kuudo a na fontuwaaxun kita a do haqilisirigumaaxun do faamuye, do yaaxaranxaraaxu. 32 A xosi kanŋen do xaalisixullen do jaxawallen kittiragollen bangandi, 33 na gidun seku, na sollen seku, kuudo na yokken danben su dabari ti kittiragollen ŋa. 34 Alla da a xaranŋunden xa kini a yi, a na a toŋo Hayisamaaxi renyugo Holiyaabu yi, Daani fonlaqen ŋa. 35 A da i su ɲa yaaxaranxaron ŋa, na a wutu kutunden do ɲegunde, kafiini baxa xaxacen do lankaran do fo dunbu xaxacen garandinden ŋa, do sasinyiraamen mirinde. Kittiragollen danben su, i ra wa a yi. »