36
Muusa ti kuŋa : « Tunka Duumanten da Becaleeli do Holiyaabu do seri tananu haqilen sirondi na allanbatika yiranman golliɲanmoxon tuyindi i ya. A ga da fo wo fo ko, i na a ɲa. »[Allanbatika yiranman golle]
2 Ken falle, Muusa da Becaleeli do Holiyaabu xiri kafiini sere su Tunka Duumanten ga da a sondomen ŋalindi, a do du sugandinto, nan ro allanbatika yiranman gollen ŋa, i na a dabari. 3 Banisirayilaganko ga da deemandifo su riiti golle ke yi, i da a su wutu bakka Muusa noqu, nan daga gollen jopa. Xa koota su, seron wa finna i deemandun riitini. 4 Golliɲaŋaanon su toxo baanan-baanan telle katta Muusa yi 5 nan ti a da : « Tunka Duumanten ga ti o na allanbatika yiranma be dabari, jaman do ke deemande be gaa riini kundu, ken nan gaba a da. » 6 Muusa xosi ɲaamariyen kini daaxan ŋa, ti yugon do yaxare, sere su do fo n maxa ri keeta, i nan toxo a walla. 7 Ke deemande be ga bogu, a da gollen dabari ma a kutten gaa toqo.
[Gemmanlenmaaxun tilliisen dabarinde]
8 Haqilisirigumen su da gemmanlenmaaxun tilliise ke gollen dabari : sasinkiri katunto tanmi, sasingaari baxa xaxace, a do lankaran do fo dunbu xaxace. Xeribunun dabarinton wa do a yi, yaaxaranxaron ga da i golli do a yi. 9 Kiri baane su giiloyen ni tanpille do sogone segu ya. A noxon ni sogone naxato. Kiru ku danmon su ni xensendi baane ya. 10 Kiru ku karagi kati me yi, baane ti baane. Karago baane ke xa kati me yi, baane ti baane. 11 A da baxa xaxacen nuxunnun dabari yirankiri baane ke kanben ŋa, na ken me dabari yirankiri fillandi ke xa kanben ŋa. 12 A da tankarage nuxunne dabari yiran fana ke kanben ŋa, na tankarage nuxunne dabari yiran fillandi ke xa kanben ŋa, na baane su do baanen jonkoyi me yi. 13 A da tankarage kangeresaade dabari, na kiru ku geresi me yi ti geresaadu ku yi, baane ti baane, tilliise ke xosi ɲa yiran baanen ŋa.
14 Ken falle na suguyinten xufaaren dabari tilliise ke kanma, a da i dabari, kiru tanmi do baane. 15 Kiri baane su giiloyen ɲa tanjikke sogone. Tefetoyen ni sogone naxato. Kiru ku tanmi do baane, ken jaate ya ni baane su da. 16 A da kirun karagi katu me yi i dura. Kirun tunmi xa wa i duran ŋa. 17 A da tankarage nuxunne dabari yiran fana ke kanben ŋa, na tankarage nuxunne dabari yiran fillandi ke xa kanben ŋa. 18 A da tankarage jaxawallingeresaade dabari, kuudo na tilliise ke katu me yi, na a ɲa baane. 19 A da jaxandigifata dunbunten xufan dabari tilliise ke kanma, a do liwongifata mosinten xufa.
20 A da saayinsollen tonto siginton dabari tilliise ke da. 21 Tonto baane su sigen ni sogone tanmu, a noxon ni sogone do taxande. 22 Sigaadu filli wa tonto baane su yi. Baane su do baanen malinten wa me yi. Tilliise ke tonton su ɲa ken moxo ya. 23 A da tilliise ke tonton ɲa tanpille tonte yi banboxun ŋa, tayen banŋe. 24 A da tannaxate tontonsigaade dabari xaalisixullen ŋa tanpille ke tonten wure, sigaadu filli wa tonte su taanun filli wure. 25 Tilliise ke kaara be gaa ti saahelin xa yi, a da tanpille tonte dabari non da, 26 kun do i tannaxaten xaalisixullinsigaadu ; sigaadu filli filli wa tonto baane baane su wure. 27 A da tonto tunmi dabari tilliisen kinxennanjunqan da, 28 na tonto filli dabari tilliise ke gonbonŋen ŋa, a xenpa. 29 I ɲa funukirun ŋa, i yinmun taaxu me yi kanmun ŋa godongoda baane noxo. A da ken xa ɲa xo gonbonŋe ke tonton filli ga ɲa moxo be ya. 30 Tonto segi do i xaalisixullinsigaadun tanmi do tunmu, tonte su sigaadu filli wa a wure.
31 A da saayinsollinxepu karagi dabari tilliise ke kaara baanen da, 32 a kaara baanen xa, karago. Tilliise ke kinxennanjunqan tonton xa, xepu karagi. 33 A da naxaadunxepen ro tonto ku yi, gelli yin baane ma yin baane. 34 Tonto ku, a da i gosaasi ti kanŋen ŋa, godongodo ku be gaa tonto ku faadana me yi, a da i xa dabari ti kanŋen ŋa, a da naxaadunxepu ku xa gosaasi ti kanŋen ŋa.
35 A da yirankutaaden dabari ti kirinbaxa xaxacen ŋa, a do lankaran do fo dunbu xaxace, do sasi mullu liikante, a sufanten gaa ti xeribunun ŋa. A da a yaaxaranxarangolli ya. 36 A da saayintonto naxati dabari a da, na i gosaasi ti kanŋen ŋa, kafiini i kangeresaadun ŋa, na xaalisixullinsigaadu naxati dabari i da.
37 A da yiridon dabari gemmanlenmaaxun tilliise ke roraqen ŋa ti kirinbaxa xaxacen do lankaran ŋa, a do sasi mulli dunbu xaxace, garandindan xooren gollen ŋa, 38 ken do a tonton karagi do i geresaadu, na i yinmun do i naxaadufanaaronun su gosaasi ti kanŋen ŋa, i sigaadu ku karagi ga ni jaxawallen ŋa.