Tawureeta :
Sariya
[Sadaxo]
1
Tunka Duumanten da du toxo genmanlenmaaxuntilliisen ŋa na Muusa xiri ti a da : 2 « A ko Banisirayilaganko da ti : “ Sere be ga na ɲi sadaxa bagandini Tunka Duumanten da, a nan ɲa kaadundaaban ya, ken ga ni na, ma walla xa tanmise.[Yanpeyinsadaxa]
3 « “ Selli sere be gaa nan ya ɲaana yanpeyinsadaxa, a nan ɲa gunbon ya, lonjuuru ga nta a yi. An do a nan daga genmanlenmaaxuntilliisen raqen ya, kuudo Tunka Duumanten na a raga. 4 An na an kitten saxu yinbidunsadaxa ke yinmen kanma, kuudo Tunka Duumanten na a raga, an na xafariyen kita. 5 Sadaxagumen na ke gunbo xurusini tilliisen raqen ya Tunka Duumanten jon me naxa. Ken bire sadaxakiɲandaano, Haaruna bonsonŋu ku, i na a foron sanpa do sadaxaxurumindifon kaaron ŋa, genmanlenmaaxuntilliisen raqe. 6 Sadaxagumen na a xeexe, na a soorunbagandi. 7 Sadaxakiɲandaana Haaruna bonsonŋun na yinben kumu sadaxaxurumindifon kanma, na suwan ro a yi. 8 I na tiye ke do yinmen do kateyen su ya teremene suwon kanma yinben ŋa sadaxaxurumindifon kanma. 9 Sadaxagume ke na nuxudufoonun do taanun wanqini ya ti jin ŋa. Ken falle, sadaxakiɲandaano ku na i ro sadaxaxurumindifon kanma na i buyi ma i ga na n xurumi. Yanpeyinsadaxa ya ni, timiliŋen ya ni Tunka Duumanten da.
10 « “ Selli a kaman yanpeyinsadaxa ke gaa ɲaana tanmisen ya yi, jaxe ma sugo ya ga ni, a nan ɲa digen ya, lonjuuru su ga nta a yi. 11 A na a xurusi sadaxaxurumindifon saahelin di, Tunka Duumanten jon ŋa tilliisen raqe. Ken bire, sadaxakiɲandaano ku, Haaruna bonsonŋu, i na a foro ku sanpa do sadaxaxurumindifon kaaron ŋa. 12 Sadaxagumen na a soorunbagandi, sadaxakiɲandaanan na a do yinmen do kateyen ro suwan kanma yinben ŋa, sadaxaxurumindifon kanma. 13 I na nuxudufoonun do taanun wanqini ya ti jin ŋa. Ken falle, sadaxakiɲandaanan na i su buyi sadaxaxurumindifon kanma ma i ga na n xurumi. Yanpeyinsadaxan ya ni, timiliŋen ya ni Tunka Duumanten da.
14 « “ Selli a kaman yanpeyinsadaxa ke gaa ɲaana yeliŋen ya yi Tunka Duumanten da, a do kaadunbooren ya n riini, walla xa makkaboore. 15 Sadaxakiɲandaanan do a na ri sadaxindinoqun ŋa, na a yinmen doofa na ken buyi sadaxaxurumindifon kanma ma a ga na n xurumi, na foron tolli do sadaxaxurumindifon kaaron ŋa. 16 A na a jaayan do i yokkun su bogu a yi, na a sedi sadaxaxurumindifon kinbakkan ŋa, i ga kateyinxamon walla noqu ke be yi. 17 A na yeliŋe ke booxo naxaanen ŋa, xa, a nan maxa kuti fillo. Ken falle, sadaxakiɲandaanan na a ro suwon kanma yinben ŋa sadaxaxurumindifon kanma na a buyi ma a ga na n xurumi. Yanpeyinsadaxan ya ni, timiliŋen ya ni Tunka Duumanten da.