[Soxofonsadaxa]
2
« “ Yonkinte su ga na ɲi soxofo ya sadaxini Tunka Duumanten da, a n xawa ɲaana jura mullu-mullen ya, ken gaa ɲaana a kaman sadaxan ŋa, a na ten joxi a kanma, a na timiliŋen ro a yi. 2 A kaman na a deni katta Haaruna renmun ŋa, sadaxakiɲandaano ku, a na kittigobba gobba bakka jura ke do te ke yi, kafiini timiliŋe ke su yi gelli non ŋa. Sadaxakiɲandaana ke na a tiidindi sinmaado yi sadaxaxurumindifon ŋa yinbidunsadaxa yi. Timi liŋen ya ni Tunka Duumanten da. 3 Soxofonsadaxa jura ke kutte, ken ni Haaruna do i renmun ya fo yi, fo sennun fo sennen ya ni ke yinbidunsadaxa yi Tunka Duumanten da.4 « “ Selli an ga na ɲi soxanfon ya ɲaana fo gonbinten ŋa, a n xawa ɲaana jura mullu-mullen ya yi, xoyi tufulle, lewiiri ga nta a yi, na a xooti ti ten ŋa, ma walla xa sengete, lewiiri ga nta a yi, na ten suusa a yi.
5 « “ Selli soxofon ya ga ni kuŋa, a gaa ɲaaɲeene mexenfaatan ya kanma, a nan ɲa jura mullu xootinten ya yi ti ten ŋa, lewiiri ga nta a yi. 6 An na a dunŋu-dunŋu, na ten joxi a kanma, allankuyen ya ni.
7 « “ Selli an allankuye ke ga ni sadaxa ɲaaɲanten ya yi xa ɲaaɲandifon kanma, a n xawa ɲaana jura mullu-mullen ya, na a ɲaaɲa ten ŋa.
8 « “ An do ke soxofonsadaxa dabarinte kundu na ri katta Tunka Duumanten ŋa na a kini sadaxakiɲandaanan ŋa, aken na a tinkondi sadaxaxurumindifon ŋa. 9 Sadaxakiɲandaana ke na sadaxa ke yogo wutu sinmaado yi, a na ken xurumindi sadaxaxurumindifo ke kanma yi. Ken ni yinbidunsadaxan ya, kani liŋen ya ni Tunka Duumanten da. 10 Soxofonsadaxa ke kutte, Haaruna do i renmun ya fo ni. Tunka Duumanten yinbidunsadaxan ya ni, fo sennun fo senne.
11 « “ Soxofonsadaxa su gaa kiniini Tunka Duumanten ŋa, lewiiri nta roono ken ŋa, baawo lewiiri gaa fo be yi, a do yaage, ken nta xurumiini Tunka Duumanten da. 12 I sadaxiini xoyi fateyifanon sadaxon moxon ya yi, axa wa i kinni Tunka Duumanten ŋa, xa, ikun nta wareene sadaxaxurumindifon kanma nan ɲa tiidi timiliŋe yi. 13 Soxofonsadaxan su, an na sapen ya roono a yi na a sapindi, maxa faareti ken ŋa, sapen ni an kaman laayidun taagumansen ya kafiini an soxofonsadaxan ŋa. Axa gaa sadaxa su sadaxini, axa na sapen roono a yi ya.
14 « “ An ga na ɲi fateyifanon soxofonsadaxan bagandini Tunka Duumanten da, a jogodonman ya n buruburini yinben ŋa, na a funsen yinsi, na a ɲa fateyifanon soxofonsadaxan ŋa. 15 An na ten jogu a kanma, na lubaaninfutaaden jogu a kanma. Ken ni soxofonsadaxan ya. 16 Sadaxakiɲandaanan na fo yinsinte ke yogo do te ke yogo do lubaaninfutaade ke su tiidindi sinmaado yi. Yinbidunsadaxan ya ni Tunka Duumanten da.