[Allatiigeyinsadaxa]
3
« “ Sere be gaa a mulla na allatiigeyinsadaxa bagandi Tunka Duumanten da, an do na yaxaren ya ga ri, ma gunbo, a nan ɲa na ken ya yi lonjuuru ga nta a yi de ! 2 An na an kitten saxu na ke yinmen kanma na a xurusi genmanlenmaaxuntilliisen raqen ŋa. Ken bire sadaxakiɲandaano, Haaruna bonsonŋu ku, i na a foron sanpa do sadaxaxurumindifon kaaron ŋa. 3 Kateye be gaa fanemene allatiigeyinsadaxan nuxudufoonun kanma, sadaxagumen na i bagandi, na i ɲa yinbidunsadaxa yi Tunka Duumanten da 4 kafiini feredinlenmun filli do i kateyen do buttunsoome. 5 Ken falle sadaxakiɲandaano, Haaruna bonsonŋu ku, i na a buyi kafiini fo be gaa sadaxaxurumindifo ke yi, suwon kanma yinben ŋa, na i xurumindi. Yinbidunsadaxan ya ni, timiliŋen ya ni Tunka Duumanten da.6 « “ Selli a kaman gaa tanmisen ya ɲaana allatiigeyinsadaxa yi Tunka Duumanten da, digen ya ga ni, ma yaxaren ya ga ni, lonjuuru n maxa ɲi a yi. 7 Selli jaxen ya ga ni, an na a sigindi Tunka Duumanten jon me naxa. 8 An na an kitten saxu a yinmen ŋa, na a xurusi genmanlenmaaxuntilliisen jon ŋa. Ken falle Haaruna bonsonŋun na a foron sanpa-sanpa do sadaxaxurumindifon kaaron ŋa. 9 Kateye su gaa allatiigeyinsadaxa ke yi, xoqen danman su, a do kateye su gaa fanemene allatiigeyinsadaxan nuxudufoonun kanma, i na i kafu me yi na i xurumindi Tunka Duumanten da, 10 kafiini feredinlenmun filli do kateye be gaa do i kaaron ŋa, a do buttunsoome. 11 Ken falle sadaxakiɲandaanan na a ro sadaxaxurumindifon kanma, faafon ya ni, a gaa ɲaana yinbidunsadaxa yi Tunka Duumanten da.
12-13 « “ Selli sere be gaa sugon ya ɲaana allatiigeyinsadaxa yi, an na a sigindi genmanlenmaaxuntilliisen raqen ŋa Tunka Duumanten jon me naxa, an na an kitten saxu a yinmen kanma, na a xurusi no. Ken falle sadaxakiɲandaano, Haaruna bonsonŋu ku, i na a foron sanpa-sanpa do sadaxaxurumindifon kaaron ŋa. 14 Kateye su gaa fanemene nuxudufoonun ŋa, i na a ɲa yinbidunsadaxa yi Tunka Duumanten da, 15 kafiini feredinlenmu ku filli do kateye be gaa i kaaron ŋa, do buttunsoome. 16 Ken falle i na dunŋu ku xurumindi sadaxaxurumindifon ŋa. Faafon ya ni, a gaa ɲaana yinbidunsadaxa yi, a timen ga n liŋi. Kateyen su ni Tunka Duumanten ya fo yi.
17 « “ Ke ni farila ya yi, a ga nta gilli axa maxa, gelli axakun ma axa renmun renmu, axa ga na ɲi dingira su yi : fo wo fo ga ni kateye do fore, xa maxa ken yiga. ” »