[Futuxiyinsadaxa]
4
Tunka Duumanten daali Muusa da kuŋa : 2 « A ko Banisirayilaganko da ti : “ Yonkinte su ga na Tunka Duumanten ɲaamarindixannun sooxi ti futuxiye yi, na kun ɲanbalinu du baananbe ɲa, an gaa ke be ɲaana ya faayi ke :3 « “ Selli sadaxakiɲandaananyinmanken ya ga na yangon kita futuxiyen ŋa, na jaman tiŋandi ti ken ŋa, a na gunbunlenme ya sadaxini Tunka Duumanten ŋa i yango ke da, lonjuuru ga nta a yi. 4 A do gunbunlenme ke na ri genmanlenmaaxuntilliisen raqen ŋa Tunka Duumanten jon me naxa. A na i sooxen saxu gunbo ke yinmen kanma, a na a xurusi Tunka Duumanten jon me naxa. 5 Sadaxakiɲandaana ke na gunbo ke foron yogo wutu kuŋa, a do i na ri genmanlenmaaxuntilliisen ŋa. 6 A na i doronmen duxumi foro ku yi, na i sanpa-sanpa noqu sennen yirankutaaden teŋon ŋa taanu ɲeri Tunka Duumanten jon me naxa. 7 Sadaxakiɲandaana ke na foro ku yogo ro sadaxanfutaadinbeelon bennun ŋa genmanlenmaaxuntilliisen di Tunka Duumanten jon me naxa. Gunbunlenme ke foron kuttu, a na i joxi sadaxaxurumindifon wureedun di, genmanlenmaaxuntilliisen raqen ŋa. 8 Gunbo ke be ga sadaxi futuxiyinsadaxa yi, a na a noqu katen su wutu bakka a yi : kateye su gaa fanemene do nuxudufoonun ŋa, 9 ken do feredinlenmun filli, a do kateye be gaa i kanma, a do buttunsoome. 10 A wa xo a gaa bakka allatiigeyinsadaxangunbon xa yi moxo be. Sadaxakiɲandaana ke na i buyi sadaxaxurumindifon kanma. 11 Na ke kutte, fate, a do tiyen su, do yinme, kafiini korobinson ŋa, a do nuxudufoonun do yaaye, 12 a na i su wuttu telle dingira senne yi daaxan falle katta kateyinxamon joxiran ŋa xamanxullundaaren ŋa, a na i buyi yinben ŋa suwon kanma, i xurumini ya.
13 « “ Selli Banisirayilaganko danman su ya ga na yangon kita futuxiyen ŋa, i ga da golle ɲa ke be gaa Tunka Duumanten ɲaamarindixannen kutana, i ga xosi yangon kita, 14 futuxiye ke ri tuyi, ken bire gunbunlenme sadaxinden waajibi jama ke kanma yi futuxiyinsadaxa yi. I do a na ri genmanlenmaaxuntilliisen jon ŋa. 15 Kafon xirisun na i kittun saxu gunbo ke yinmen kanma yi Tunka Duumanten jon me naxan ŋa, a na xurusi non ŋa. 16 Sadaxakiɲandaananyinmanke ke na gunbo ke foron yogo riiti genmanlenmaaxuntilliisen noxon ŋa. 17 A na i doronmen duxumi foro ku yi, na i sanpa do yirankutaade ke taŋon ŋa Tunka Duumanten jon me naxa, taanu ɲeri. 18 A na foro ku yogo ro sadaxanfutaadinbeelo ke bennun ŋa, Tunka Duumanten jon me naxa, genmanlenmaaxuntilliisen noxon ŋa. Sadaxaxurumindifo ke be gaa genmanlenmaaxuntilliisen raqen ŋa, a na foro ku danmon su joxi ken wureedun ŋa. 19 A na kateyen su wuttu bakka a yi ya, na a xurumindi sadaxaxurumindifon ŋa. 20 A ga da futuxiyinsadaxangunbo ke ɲa moxo ke be, ke gunbo xa ɲaana ken moxo ya.* Sadaxakiɲandaana ke na xafarigeesimuuri i danŋa, ken moxo yi xafariyen na ɲaŋi i da. 21 A do gunbo ke na bogu katta daaxan falle. A na a xurumindi xoyi a ga da gunbu fana ke xurumindi moxo be. Kafon futuxiyinsadaxangunbon ɲanmoxon ya ni ke yi.
22 « “ Yinmanke ya ga na fi baane kuta bakka Tunka Duumanten ɲaamarindixannun ŋa futuxiye kanma, a yinme Alla, ke be ga n nta xawa ɲaana, a xosi yangon kita, 23 ma a ga da futuxiye ke be ɲa, a ga ri tuyi ti a yi, a na sugundige ya riitini lonjuuru ga nta a yi. 24 A na i kitten saxu sugundige ke yinmen ŋa, na a xurusi dingira ke be yinbidunsadaxan gaa xurusiini Tunka Duumanten jon me naxa. Futuxiyinsadaxan ya ni. 25 Sadaxakiɲandaana ke na sadaxanforo ku yogo wutu ti i doronmen ŋa, na i ro sadaxaxurumindifo ke bennun ŋa. A na foron kuttun joxi do sadaxaxurumindifo ke wureedun ŋa. 26 A kateyen danman su, a na a xurumindi sadaxaxurumindifon ŋa, xo allatiigeyinsadaxa ke kateyen moxo. Sadaxakiɲandaana ke na xafarigeesimuuri yinmanke ke danŋa gelli a futuxiyen ŋa, ken moxo yi xafariyen na ɲaŋi a da.
27 « “ Yonkinte tana su ga na junuubu golle gooli futuxiye kanma, ti golli baane sooxinden ŋa bakka Tunka Duumanten ɲaamarindixannu ku yi, a kaman xosi yangon kita, 28 a ga na tuyi ti i junuubu ke be i ga da a golli, a na sugu yaxare riiti sadaxa yi i kuteye ke junuubun da, lonjuuru ga nta a yi. 29 A na i kitten saxu futuxiyinsadaxa ke yinmen kanma, na a xurusi yinbidunsadaxon xurusindiran ŋa. 30 Sadaxakiɲandaana ke na a foron yogo wutu ti doronmen ŋa, na i ro sadaxaxurumindifon bennun ŋa. Foro ku danmon su keeta, a na i joxi do sadaxaxurumindifo ke wureedun ŋa. 31 Kateyen danman su, a na a su bogu a yi, xo allatiigeyinsadaxan kateyen ga bogu moxo be.* Sadaxakiɲandaanan na a xurumindi sadaxaxurumindifon ŋa. Kani liŋi tenkunten ya ni Tunka Duumanten da. Sadaxakiɲandaana ke na xafarigeesimuuri a da, ken moxo yi xafariyen na ɲaŋi a da.
32 « “ Selli a do jaxen ya gaa riini futuxiyinsadaxa yi, a do jaxa yaxare ya n riini, lonjuuru ga nta a yi. 33 A na i kitten saxu a yinmen ŋa, na a xurusi futuxiyinsadaxa yi yinbidunsadaxon xurusiran ŋa. 34 Sadaxakiɲandaana ke na sadaxanforo ku yogo wutu ti i doronmen ŋa, na i ro sadaxaxurumindifo ke bennun ŋa. Foro ku kuttun danmon su, a na i joxi do sadaxaxurumindifo ke wureedun ŋa. 35 Sadaxagume ke na kateyen danman su bogu a yi, xo allatiigeyinsadaxanjaxandigen kateyen ga bogu a yi moxo ke be. Sadaxakiɲandaana ke na i xurumindi kafiini yinbidunsadaxan ŋa Tunka Duumanten da. A na xafarigeesimuuri sadaxagume ke danŋa ti i kuteye ke junuubun ŋa, ken moxo yi xafariyen na ɲaŋi a da.