[Yangonsadaxan sababunu]
5
« “ Yonkinte su ga bara seedene ti fi ya, na a ɲi an da a wari, walla xa an da a mugu, ma an tuwaaxun wa a yi, an wa a garamajigingollen likken tiŋana. 2 Ken moxo ya ni xadi, yonkinte be ga na kati fo sobinte yi, ken ga ɲa gundufo sobinte kuurunkuura yi wo, a ga ɲa kaadufo sobinte kuurunkuura yi wo, ma walla xa ɲiiɲedufo sobinten kuurunkuura, ken ga ɲa ti sankuyen ya yi, a kaman sobi, a da jalagin kita : 3 ken moxo ya ni xadi, an ga na kati haadamarenme fo sobinton ya yi, an gaa sobiini ti ku beenu su yi, ken ga ɲa ti sankuyen ya yi, an xosi ri tuyi ti a yi, an da jalagin kita. 4 Ken do xadi, sere be su ya ga da i soomon bogu me yi nan battarankuna sankuyen ŋa, ti finbononde ya yi, ma finsironde yinme ya ga ni, a ga battarankuna gelli kun fiinu danmon su yi, a ga na ri tuyi ti i ya, a da jalagin kita. 5 I be ga na ɲi an ga da jalagin kita ti ku fi jaatanto dubaananbe yi, an nan xiire ti fon ŋa an ga da yangon kita ti ke be yi. 6 An do yangonsadaxan na ri Tunka Duumanten da, ti yango ke be an ga da a golli. An na tanmisa yaxare ya bagandini an yango ke da, jaxe walla xa sugo. Sadaxakiɲandaanan na yanpeyimuuri an danŋa gelli an yango ke yi.7 « “ Selli an ra ga nta jaxe kitta an kitten ŋa, an do kaadunbooru filli na ri katta Tunka Duumanten ŋa yangonsadaxa yi walla xa makkaboori renmu filli, baanen na ɲa yangonsadaxa yi, baanen na ɲa yanpeyinsadaxan ŋa. 8 An do i na ri katta sadaxakiɲandaanan ŋa. Ke be ga ni futuxiyen xallen ŋa, a na ken fina sadaxi, a na a kofonxotten doofa, xa yinmen nan maxa fate bakka a yi. 9 A na foro ku yogo tolli do sadaxaxurumindifon tageyen ŋa, na sadaxanfore ke kutten tolli sadaxaxurumindifon wureedun ŋa, yangonsadaxan ya ni. 10 Fillandi ke, a na ɲa yanpeyinsadaxa yi xo a kiiten ga n xawa moxo be. Sadaxakiɲandaanan na yanpeyimuuri an danŋa gelli an yango ke yi, ken moxo yi yanpeyen na ɲaŋi an da.
11 « “ Selli an ga ma kaadunboorun filli kita an kitten ŋa, an ma makkaboori renmun filli xa kita, an do muuden farijura mullu-mullen na ri sadaxa yi an yango ke da. An nta te saqa a kanma, an nta timi liŋe roono a yi, baawo yangonsadaxan ya ni. 12 An do a na ri katta sadaxakiɲandaanan ŋa, sadaxakiɲandaana ke na kittigobba wutu bakka a yi. Ken kittigobba ni sinmaado ya, an na a xurumindi sadaxaxurumindifon ŋa kafiini Tunka Duumanten yinbidunsadaxan ŋa, yangonsadaxan ya ni. 13 Sadaxakiɲandaana ke na yanpeyimuuri an danŋa ti an yango ke be an ga futuxi ti a yi, gelli ku fi koninto dubaananbe yi. Ken moxo yi, yanpeyen na ɲaŋi an da. Kutten wa ɲaana sadaxakiɲandaana ke taqen ŋa xoyi soxofonsadaxan moxo. ” »
[Senoyinsadaxa]
14 Tunka Duumanten da sefen taŋandi Muusa yi nan ti : 15 « Sere be ga na faareti bakka Tunka Duumanten fi sennun maxa na i banta, an ga n xawa senoyinsadaxa be bagandi Tunka Duumanten da faayi : an na jaxandige ya ragana bakka tanmison ŋa Tunka Duumanten da, loojuru ga nta jaxe be yi, a xiiman do dingira sennen godoxullen¤ xiiman gaa me wuttu¤, ken ni senoyinsadaxan ya. 16 An ga da fi sennu ku xa be banta, an wa ken xa tugana, na fi bononten xiiman taxandi karagandin me kafi a yi, na a do a kini sadaxakiɲandaanan ŋa. Ken bire, sadaxakiɲandaanan na yanpeyimuuri an da ti senoyinsadaxanjaxandige ke yi, ken moxo yi, Alla na yanpa an maxa.
17 « Selli sere be ga na yango golle dabari, an ga da Tunka Duumanten ɲaamarixannun ya sooxi munguyen kanma, an garamajigaaxu, an wa a garamajigingollen likken tiŋana. 18 Ken kuŋa an nan xawa jaxandige ya ragana bakka an tanmison ŋa, loojuru ga nta ke be yi, na a kini sadaxakiɲandaanan ŋa, a xiiman gaa senoyinsadaxa bakka. Bire be sadaxakiɲandaanan ga na yanpeyimuuri an da, Alla na yanpa an maxa. 19 Senoyinsadaxan ya ni, na a sababun ɲa ke kaman ga da Tunka Duumanten xosen dabari. »
[Senoyinsadaxan sababunu]
20 Tunka Duumanten daali Muusa da nan ti : 21-23 « Yonki su ga na janbe na i yinme dunken xaliifefon nakkari, ma roxondifo, walla xa na i dunken fayi, ma nan xudandi a maxa ti senben ŋa, ma walla xa a da fo ya sagara, a xosi nakkari nan yille kunana gaaren kanma yi ti ku fiinu kundu yi, ku be dubaananbe su ra gaa seren ɲaana yangoburugume yi, a kaman ɲa allankutaana yi, a da Tunka Duumanten kuta. Fayifo ke be a ga da a fayi, walla fo xudante ke be a ga da a xuda, ma xaliifefo xaliifante ke be gaa a maxa, walla fo sankunte ke be a ga da a sagara, a na a saagandi. 24 A ga kuna fo wo fo xa kanma yi ti gaaren ya, ken fi ga na sigi a yi koota be, a na fo ke tinmanten ya tugana, na a taxandi karagan kafu a yi fongumen da, na i kini a yi. 25 A do jaxandigi tinmante ya n riini bakka i tanmison ŋa katta Tunka Duumanten ŋa, ma a xiiman me, sadaxakiɲandaanan na a xiima senoyinsadaxa yi. 26 Sadaxakiɲandaanan na yanpeyimuuri a danŋa Tunka Duumanten jon me naxa. Fo wo fo su ga da yango ke kiɲa a yi, ken na yanpe an maxa. »