[Yanpeyinsadaxan dabarimoxo]
6
Tunka Duumanten daali Muusa da nan ti : 2 « Haaruna do i renmun ɲaamari nan ti : “ Yanpeyinsadaxan sariyan faayi : Yanpeyinsadaxan ni yinbidunsadaxan ya, a na wuron muuman su ya ɲaana sadaxaxurumindifon kanma yi, ma suxuba, yinben nan toxo kumiini a wure. 3 Sadaxakiɲandaanan wa i ganduuran rondini i faten ŋa, a do wuno, sasi ga ni. Yinbidunsadaxa ke be yinben ga da a yiga sadaxaxurumindifon kanma, a na a kateyinxamon wutu, na i saxundi sadaxaxurumindifon kaaran ŋa. 4 A na i yiraamu ku bagandi, na yiraamu tana rondi. A na xamo ku wutu, na i bagandi katta dingira senne yi daaxan falle. 5 Yinbe be gaa sadaxaxurumindifon kanma, a toqo kumiini a yi ya, a nta kalla. Suxuba wo suxuba, sadaxakiɲandaanan na suwon ŋalindi a kanma. A na yinbidunsadaxon merabatundi a kanma, na allatiigeyinsadaxan kateyun xurumindi a kanma. 6 Yinben wa kumiini sadaxaxurumindifo ke kanma yi duumaye yaaxe maxa. A nta kalla.[Soxofonsadaxan dabarimoxo]
7 « “ Ku ya ni soxofonsadaxon sariyanun ŋa : Haaruna renmun wa i bagandini Tunka Duumanten jon me naxa sadaxaxurumindifon teŋon ŋa. 8 A na i kitten gobban wutu bakka soxofonsadaxa ke juran do a ten ŋa, ken do timiliŋu ku beenu su gaa a kanma. A na timiliŋu ku futaadi sadaxaxurumindifon ŋa, sinmaado yi. Timiliŋe ya ni Tunka Duumanten da. 9 A kutte ke, Haaruna do i renmun na a lewiirintanŋen yiga. I na a yiga dingira senne yi. I na a yigana genmanlenmaaxuntilliisen yoorindan noxon ya. 10 A nta soreene ti lewiiri yi. I taqen ya ni in ga da a kini i ya bakka yinbidunsadaxo be gaa sadaxini in da. Fo sennun fo sennen ya ni xoyi futuxiyinsadaxan do senoyinsadaxan moxo. 11 Haaruna renmun yugunman su wa a yigana, abadanfarilan ya ni an bonsonŋun da. Yinbidunsadaxan ya ni Tunka Duumanten da. Fo wo fo gaa katiini ke sadaxa yi, ken nan xawa senoono ya¤. ” »
[Sadaxakiɲandaanon soxofonsadaxa]
12 Tunka Duumanten daali Muusa da nan ti : 13 « I ga na Haaruna do i renmun taaxundi koota be kuudo na sadaxakiɲanden gollen kini i ya, i gaa soxofonsadaxa be sadaxini Tunka Duumanten da duumaye yaaxe maxa, ken ya faayi ke : muuden jura mullu-mulle, ken taxande suxuba, a taxande futuro. 14 A dabarini ti ten ya yi ɲaaɲaaden kanma, an do a xootinten na ri. An na ken ya dunŋu-dunŋunten ɲaana allankuyen ŋa, timiliŋen ya ni Tunka Duumanten da. 15 Sadaxakiɲandaananyinmanke be nda sigi a batten ŋa, gelli a renmu ku yi, a wa a ɲaana ken xa kanma farila duumante yi. Ken allankuye wa ɲaana yinbidunsadaxa yi Tunka Duumanten da. 16 Sadaxakiɲandaanan soxofonsadaxan danman su ya n xurumini, a nta yigeene. »
[Futuxiyinsadaxan dabarimoxo]
17 Tunka Duumanten daali Muusa da nan ti : 18 « A ko Haaruna do i renmun da nan ti : “ Futuxiyinsadaxan sariyanun ya ni ku yi : dingira be yinbidunsadaxon gaa xurusiini, futuxiyinsadaxan xa xurusiini non ya yi Tunka Duumanten jon me naxa. Ken ya ni fo sennun fo sennen ŋa. 19 Sadaxakiɲandaana be gaa a dabarini, a ya na a yigana. A na a yiga dingira senne yi, genmanlenmaaxuntilliisen taaren noxo. 20 Fo wo fo gaa katiini tiye ke yi, ken nan xawa senoono ya. A foren ga na tolli yiraame yi, a ga tolli noqu be yi, an na a wanqi dingira senne yi. 21 Dooringine be a gaa soreene a yi, ken wa kareene. Xa selli a ga na ɲi a ga sore kirinbaraman ya yi, xa na a dosi moxo siri, na a salanqu jin ŋa. 22 Yugo su gaa kapa sadaxakiɲandaanon ŋa, a ra wa a yigana. Fo sennun fo sennen ya ni. 23 Xa futuxiyinsadaxa su, i do a foren ga ri genmanlenmaaxuntilliisen ŋa kuudo nan xafarigeesimuuri dingira sennen ŋa, ken nta xawa yigeene. A n xawa xurumini yinben ya yi.