[Senoyinsadaxan dabarimoxo]
7
« “ Senoyinsadaxan sariyanun faayi : fo sennun fo sennen ya ni. 2 Yinbidunsadaxon gaa xurusiini noqu ke be yi, senoyinsadaxan xurusiini non ya, a foro ku, a na i sanpa-sanpa do sadaxaxurumindifo ke yoorindan ŋa. 3 Sadaxagume ke na kateyen su baga a yi : xoqen kateye, a do kateye be gaa xufini nuxudufoonun ŋa, 4 ken do faridinlenmun filli, kafiini kateye be gaa i kanma, a gaa do kaaron ŋa. Buttunsoome ke, a wa ken do faridinlenmu ku bakka a yi. 5 Sadaxakiɲandaana ke na i xurumindi sadaxaxurumindifon ŋa. Yinbidunsadaxan ya ni Tunka Duumanten da, senoyinsadaxan ya ni. 6 Yugo su gaa sadaxakiɲandaanon ŋa, a ra wa a yigana. A yigeene dingira senne ya yi. Ken ni fo sennun fo sennen ya. 7 Senoyinsadaxan wo, futuxiyinsadaxan wo, sariya baane ya na i da : sadaxakiɲandaana be gaa xafarigeesimuurini ti i ya, a ya fo ni ken tiye yi.8 « “ Sadaxakiɲandaana be ga na yinbidunsadaxa dabari sere da, ken sadaxa fate ke wa ɲaana sadaxakiɲandaana ke xalle yi. 9 Soxofonsadaxa su gaa gonbiini ya, ma walla a gaa soreene ginen ya yi, ma a gaa ɲaaɲeene ɲaaɲaaden ya yi, ken ɲaana sadaxakiɲandaana be ga da a sadaxi ya xalle yi. 10 Soxofonsadaxa su ga ɲaxami ti ten ya yi, walla xa a ga kaawa ya, ken ɲaana Haaruna renmun danmon su ya xalle yi. Waaxinu ku su ya n baana ken ŋa.
[Allatiigeyinsadaxan dabarimoxo]
11 « “ Allatiigeyinsadaxa ke be gaa kiniini Tunka Duumanten ŋa, a sariyan faayi : 12 selli a gaa a bagandini ti allankuufande ya yi, a na takkula lewiirintanŋen ya bagandini kapa a yi, na a deebi ten ŋa, ken do furufuru lewiirintanŋe, na ten suusa a yi, kafiini sengete lewiirintanŋe, a xootinten ga ni ti ten ŋa. 13 A na takkula lewiirintanŋe ke do buuru lewiirinman tinkondi kafiini allatiigeyinsadaxan ŋa. 14 A na i du baananbe su yin baane kiɲa Tunka Duumanten ŋa taqe yi. Sadaxakiɲandaana ke be ga da allatiigeyinsadaxa ke foron sanpa-sanpa, i na ɲaŋi a xalle yi. 15 Aken allatiigeyinsadaxa be tiyen ga sadaxi ti kuufandifo yi, a yigeene a sadaxikoota yinme ya, fo nta toxiini bakka a yi katta suxuban ŋa. 16 Xa selli tekken ya ga ni, walla xa yonki liŋu ya ga ni, a wa yigeene a sadaxikoota yinme yi, ken bita fillan ŋa, a kutten ra wa yigeene. 17 Ganta sadaxa ke tiyi kutte be nda toxo bita sikkandin ŋa, ken nan buyi yinben ŋa. 18 Ayiwa allatiigeyinsadaxa ke tiyen ga na yige bita sikkandi ke yi su, ken sadaxa bogunte ntaxa rageene. A nta jaateene fo yi a kaman maxa xa. A ɲaana fo sobinte ya. Yonkinte su nda fo yiga bakka a yi, an wa a futuxiye ke junuubun tiŋana. 19 Ken tiye ga na kati fo sobinte yi su, a ntaxa yigeene. A buyiini yinben ya yi.
« “ Fo be gaa xo ken sadaxantiyi senne yi, sennanyenmen su wa a yigana. 20 Ayiwa yonki su gaa sobintaaxun ŋa, a kaman ga na Tunka Duumanten allatiigeyinsadaxan tiyen yiga, a wa kutiini bakka i xabiilan ŋa. 21 Yonkinte be ga na kati fo sobinte su yi sobintaaxun ŋa : haadama ya ga ni, ma kaadundaaba sobinte, walla fo xoninte danbe su, a sobinten ya ga ni, na Tunka Duumanten allatiigeyinsadaxan tiyen yiga, ken yonki wa kutiini bakka i xabiilan ŋa. ” »
[Tiyen noqu haraamunto]
22 Tunka Duumanten daali Muusa da nan ti : 23 « A ko Banisirayilaganko da ti : “ Kateye su, na wo, jaxe wo, sugo wo, xa maxa a yiga. 24 Xa, jiiban kateye, a do fonyaaten ga da fo be kari, i wa ɲaana gollen danben su yi, xa, fo be ga ni yigeyen ya, xa maxa i yiga. 25 Daaba be ga bogu yinbidunsadaxa yi Tunka Duumanten da, yonkinte be nda kateye yiga bakka ken ŋa, ken kaman wa kutiini bakka i xabiilan ŋa. 26 Axa ga ɲa noqu su taaxaano yi, foren fo wo fo su, xa maxa a yiga. Ken ni yeliŋen do tannaxaton su ya. 27 Foren danben su, yonkinte su ga na a yiga, ken kaman wa kutiini bakka i xabiilan ŋa. ” »
[Sadaxakiɲandaanan taqu]
28 Tunka Duumanten daali Muusa da nan ti : 29 « A ko Banisirayilaganko da nan ti : “ Sere be gaa allatiigeyinsadaxa bagandini Tunka Duumanten da, an do an allatiigeyinsadaxa ke yogo na ri katta Tunka Duumanten ŋa. 30 An do Tunka Duumanten yinbidunsadaxa ke na ri an kitten ŋa, a kateyun do a gijinme. An na gijinme ke yigi-yigi Tunka Duumanten jon me naxa. 31 Sadaxakiɲandaanan na kateye ke xurumindi sadaxindinoqun ŋa. Xa gijinme ke ɲaana Haaruna do i renmun ya xalle yi. 32 Axa allatiigeyinsadaxon togi tayu, xa na i wutu bakka a yi taqe yi, na i kini sadaxakiɲandaanan ŋa. 33 Haaruna renme be gaa allatiigeyinsadaxa ke foron do a kateyen sadaxini, togi taye ke ni a ya taqen ŋa. 34 Baawo gijin yigi-yiginte ke do togi wutunte ke, n da i wutu bakka Banisirayilaganko allatiigeyinsadaxon ŋa, na i kini sadaxakiɲandaana Haaruna do i renmun ŋa taqe. Ke ni abadanfarila ya yi Banisirayilaganko maxa. ” »
35 Ku ya ni Haaruna do i renmun taqun ŋa bakka Tunka Duumanten yinbidunsadaxon ŋa gelli i daarikoota* sadaxakiɲanden xanne maxa yi Tunka Duumanten da. 36 Tunka Duumanten da Banisirayilaganko ɲaamari gelli a koota ti i na ku taqu ya kini i ya. Abadanfarilan ya ni ke yi i bonsonŋun maxa.
[Sadaxo ku su kafumanto]
37 Ku kundu ya ni yanpeyinsadaxan sariyanun ŋa, a do soxofonsadaxa, kafiini futuxiyinsadaxan ŋa, ken do senoyinsadaxa, a do sadaxakiɲandaanan taaxen sadaxan do allatiigeyinsadaxa, 38 Tunka Duumanten ga da annabi Muusa ɲaamari Tuurisiina giden kanma yi koota be, a da Banisirayilaganko ɲaamari ti i sadaxon sadaxinden ŋa Tunka Duumanten da Tuurisiina yi gunjuran ŋa.