[Sadaxakiɲandaanon sigan roye i kittun ŋa]
[Sadaxakiɲanden dokkon kininde Haaruna do i renmun ŋa]
8
Tunka Duumanten daali Muusa da kuŋa nan ti : 2 « Haaruna renmun wutu kafiini a yi, kafiini yiraamun ŋa, a do daarindite, a do futuxiyinsadaxangunbo, do jaxandigu ku filli, kafiini buuru lewiirintanŋen kande. 3 An na kafo ke danman su kafu me yi genmanlenmaaxuntilliisen raqen ŋa. »4 Annabi Muusa da a ɲa xo Tunka Duumanten ga da a ɲaamari moxo be : a da kafon kafu me yi genmanlenmaaxuntilliisen raqen ŋa. 5 Muusa jaabi kafon da : « Ku ya ni fiinu beenu Tunka Duumanten ga ɲaamarindi ti i ɲanŋen ŋa. » 6 Muusa da Haaruna do i renmun tinkondi kuŋa, i nan wanqi jin ŋa. 7 A da sasinsabudooron rondi Haaruna yi, na naxaadusiitaaden siiti a yi, na ganduuran rondi a yi, na batibanjangaran rondi a yi, na a siiti a yi ti batibanjangara ke siitaaden ŋa. 8 A da kiitigijinlanŋen saxu a kanma, na Wuriimun do Tumiimun¤ ro gijinlanŋe ke noxo. 9 A da yinfanaaron saxu a yinmen ŋa, na kanŋen dufuugen nafaadi sennen ro a taŋon ŋa kaane yi. Taagumansi sennen ya ni, xoyi Tunka Duumanten ga ɲaamarindi Muusa maxa moxo be.
10 Muusa da daarinditen wutu kuŋa, na a ro tilliise ke do fo wo fo su gaa a yi, na i senondi. 11 A da a tolli sadaxaxurumindifo ke kanma yi taanu ɲeri. A da a ro sadaxaxurumindifo ke do i yokken su yi, ken do waaten do i taaxaade, kuudo na i senondi. 12 A da daarindite ke yogo joxi Haaruna yinmen ŋa na a sugandi Tunka Duumanten da. 13 Muusa da Haaruna renmu ku tinkondi, na sabudooronun rondi i ya, na kirinnaxaadusiitaaden siiti i ya, na yinfanaaronun ro i ya xo Tunka Duumanten ga da Muusa ɲaamari moxo be. 14 A da futuxiyinsadaxangunbon tinkondi, Haaruna do i renmun da i kittun saxu gunbo ke yinmen kanma. 15 Muusa da a xurusi, na a foro ku wutu, na i ro sadaxaxurumindifo ke bennun do a kaaron ŋa ti i doronmen ŋa, na a senondi. A ga da a senondi bire be, a da foro ku joxi a wureedun ŋa, na a senondi kuudo nan xafarigeesimuuri a kanma. 16 Kateye su gaa nuxudufoonun kanma, a da a su wutu, a do buttunsoome, kafiini feredinlenmun filli do i kateyun ŋa. A da i xurumindi sadaxaxurumindifon ŋa. 17 Xa ganta gunbo ke faten ken ke, do a tiye, kafiini a yaayen ŋa, a da i buyi yinben ŋa daaxan falle xo Tunka Duumanten ga da a ɲaamari moxo be.
18 A da yanpeyinsadaxanjaxandige ke tinkondi. Haaruna do i renmun da i kittun saxu jaxandige ke yinmen ŋa. 19 Muusa da a xurusi, na a foron sanpa do sadaxaxurumindifon kaaron ŋa. 20 Jaxandige ke, Muusa da a kutu dunŋu-dunŋe, na yinme ke xurumindi, a do dunŋun ku, kafiini kateyen ŋa. 21 Xa nuxudufoonu ku do korobinso, a da i wanqi jin ŋa. A ga da jaxandige ke muuman su buyi sadaxaxurumindifon ŋa, a ɲa yinbidunsadaxan ŋa Tunka Duumanten da, timiliŋen ya ni. Tunka Duumanten ga da a ɲaamari moxo be, Muusa da a ɲa ken moxo yi.
22 Ken falle a da jaxandigi fillandi ke tinkondi, taaxen sadaxanjaxandige. Haaruna do i renmun da i kittun saxu dige ke yinmen ŋa. 23 Muusa da a xurusi, na a foron yogo wutu, na i ro Haaruna tarunlenbi tayen do a kittindoron yugu tayen ŋa, a do tandoron yugu taye. 24 Muusa da Haaruna renmu ku xa tinkondi, na foren ro i tarunlenbi tayun ŋa, a do kittindoron yugu tayun do i tandoron yugu tayu. Ken falle na foro ku kuttun sanpa do sadaxaxurumindifon kaaron ŋa. 25 A da kateyen wutu, a do xoqen do kateye be gaa nuxudufoonun kanma, buttunsoome, feredinlenmun filli do i kateye, a do togi taye. 26 Buuru lewiirintanŋe ke kanden be gaa Tunka Duumanten jon me naxa, a da buuruyin lewiirintanŋi baane wutu bakka a yi, a do furufuru tenma baane do takkula baane, na kun saxu kateyu ku do togi taye ke kanma. 27 A da ku su ro Haaruna degeren ŋa, na i ro a renmun degerun ŋa, i na i yigi-yigi Tunka Duumanten jon me naxa. 28 Muusa da i wutu bakka i degerun ŋa, na i xurumindi yinbidunsadaxa ke kanma yi sadaxaxurumindifon ŋa. Kun ni taaxen sadaxon ya yi, timiliŋen gaa a yi. Tunka Duumanten yinbidunsadaxan ya ni. 29 Muusa da taaxen sadaxanjaxandige ke gijinmen xa wutu, na a yigi-yigi Tunka Duumanten jon me naxa yigi-yiginde yi. Ken ɲa taqe yi Muusa da xo Tunka Duumanten ga ɲaamarindi aken Muusa maxa moxo be.
30 Muusa yille daarindite ke yogo wuttu xadi, foro ku beenu gaa sadaxaxurumindifon kanma, a da kun xa yogo wutu, na i tolli Haaruna do i yiraamun ŋa, kafiini a renmun do i yiraamun ŋa. A da Haaruna do i yiraamun senondi, kafiini a renmun do i yiraamun ŋa, na i duran sugandi Tunka Duumanten da. 31 Muusa jaabi Haaruna do i renmun da : « Xa da tiye ke barabara genmanlenmaaxuntilliisen raqen ŋa, xa na a yiga non ŋa ken do taaxen sadaxanbuuru ke be gaa kanden ŋa, xoyi in ga ɲaamarindi moxo be, nan ti Haaruna do renmun na a yiga. 32 Xa buuru kutte ke do tiyi kutte ke, an na i xurumindi yinben ŋa. 33 Fo be ga ni xo genmanlenmaaxuntilliisen raqen ŋa, xa maxa giri non ŋa bito ɲeri noxo ma axa taaxen waxatin ga na tinme koota be. Baawo bito ɲeri noxon ya ni axa taaxen gollun gaa tinmeene. 34 Ke be ga ɲaŋi kundu yi lenki, Tunka Duumanten ɲaamarindi ti xafarigeesimuuriyen nan ɲaŋi axa kanma yi ken moxo ya. 35 Axa wa ɲaana genmanlenmaaxuntilliisen raqen ŋa bito ɲeri, kiyen do wuro na Tunka Duumanten ɲaamarindixannun tanga, axa n maxa daga kara, baawo ke ɲaamariye ya n kini in ŋa. » 36 Tunka Duumanten ga da ɲaamarindixanne su kini Muusa yi, Haaruna do i renmun da a su ɲa.