[Sadaxakiɲandaanon gollen jopeye]
9
Bita segundin ŋa Muusa da Haaruna do i renmun xiri, ken do Isirayila xirisu. 2 A jaabi Haaruna da : « Nanlengunbo raga du da futuxiyinsadaxa yi, na jaxandige xa raga yanpeyinsadaxan xanne maxa, lonjuuru ga nta i ya, an na i tinkondi Tunka Duumanten jon me naxa. 3 An na a ko Banisirayilaganko da ti : “ Xa na sugo raga futuxiyinsadaxa yi, sugundige. Xa na siinabaananwudanlenme raga yanpeyinsadaxa yi, gunbo ga ni, a do siinabaananjaxanlenme, lonjuuru ga nta i ya, 4 ken do allatiigeyinsadaxa, gunbo do jaxandige, i na sadaxi Tunka Duumanten jon me naxa, ken do jura mullu-mulli xootinte ti ten ŋa, soxofonsadaxa yi. Baawo lenki ke koota, Tunka Duumanten wa bangeene axa da. ” » 5 A ga ɲaamarindi ti ke be yi Muusa maxa, i da a su wutu katta genmanlenmaaxuntilliisen raqen ŋa. Jaman danman su ri sigi Tunka Duumanten jon me naxa. 6 Muusa jaabi : « Tunka Duumanten ɲaamarindi ti ke ya, axa gaa a ɲaana, kuudo a nooron na bange axa da. » 7 Muusa jaabi Haaruna da ken falle : « Tinkosadaxaxurumindifon ŋa, an na an futuxiyinsadaxan dabari, a do an yanpeyinsadaxa, nan xafarigeesimuuri anken yinme do jaman da. Ken falle na jaman sadaxan bagandi, nan xafarigeesimuuri i da xo Tunka Duumanten ga ɲaamarindi moxo be. »8 Haaruna tinko sadaxaxurumindifon ŋa kuŋa, na futuxiyinsadaxa ke gunbon xurusi i yinme junuubunun da. 9 Ken falle, Haaruna renmun da foro ku tinkondi katta a yi, a da i doronmen duxumi i ya, na a ro sadaxaxurumindifo ke bennun ŋa, na foro ku kuttun joxi sadaxaxurumindifo ke wureedun ŋa. 10 Futuxiyinsadaxa ke kateyen do feredinlenmu ku kuŋa, a do buttunsoome ke, a da i xurumindi sadaxaxurumindifon ŋa xoyi Tunka Duumanten ga da Muusa ɲaamari moxo be. 11 Xa tiye ke do fate ke kuŋa, a da i xurumindi yinben di daaxan falle.
12 Ken falle a da yanpeyinsadaxa ke xa xurusi. Haaruna renmun daga foron wutu riiti katta a yi. A da i sanpa-sanpa sadaxaxurumindifo ke yi do kaaron ŋa.* 13 I saage na yinbidunsadaxa ke yinme dunŋun do yinmen wutu katta a yi, a da i xurumindi sadaxaxurumindifon kanma. 14 A da nuxudufoonun do korobinson xa wanqi, na i xurumindi sadaxaxurumindifon kanma kafiini yinbidunsadaxa ke yi.
15 A saage na jaman xa sadaxan tinkondi : a da sugundigen ya raga futuxiyinsadaxa yi jama ke da. A da a xurusi, na a ɲa futuxiyinsadaxa yi xo fana ke moxo. 16 A da yanpeyinsadaxa ke xa tinkondi, na a dabari xoyi a kiiten ga n xawa moxo be. 17 Ken falle a da soxofonsadaxa ke tinkondi, na i kitten gobba bakka a yi, na a xurumindi sadaxaxurumindifon kanma yi kafiini suxuba ke yinbidunsadaxan ŋa. 18 A ri gunbo ke do jaxandige ke xurusi jaman da allatiigeyinsadaxa yi. Haaruna renmun daga foro ku wutu katta a yi, a da i sanpa-sanpa sadaxaxurumindifo ke yi do kaaron ŋa. 19 Gunbo ke do jaxandige ke noqu kato, xo xoqe, a do kateyinfaara be gaa nuxudufoonun kanma, a do feredinlenmun do buttunsoome, 20 i da kun saxundi gijinmu ku kanma. Haaruna da i xurumindi sadaxaxurumindifon ŋa. 21 Gijinmu ku do togi taye ke kuŋa, Haaruna da i yigi-yigi Tunka Duumanten jon me naxa xo Muusa ga ɲaamarindi moxo be.
22 Haaruna da i sooxun banba jaman kanma ken falle, nan duwa i da. A ga duguta futuxiyinsadaxan do yanpeyinsadaxan do allatiigeyinsadaxan dabarinden ŋa bire be, a yanqa. 23 Ke su falle, Muusa do Haaruna ro genmanlenmaaxuntilliisen ŋa, i saage bakka nan duwa jaman danŋa. Tunka Duumanten bange jaman danman su da ti i nooron ŋa. 24 Yinben bogu Tunka Duumanten jon me naxa, na yinbidunsadaxa ke do kateyu ku yiga sadaxaxurumindifon kanma. Jama ke su da ken wari, i sonqo ti sewoyen ŋa, nan xenu i taŋon kanma.