[Nadaabu do Habiiyu junuubu]
10
Haaruna renmu be ga ni Nadaabu do Habiiyu, i du baananbe su da i futaadindifon wutu na yinbinxoren ro a yi, na futaaden saxu a kanma. I da i tinkondi Tunka Duumanten jon me naxa. Yinbi sagatanten ya ni, ke be Tunka Duumanten ga ma i ɲaamari ti a yi. 2 Yinben bogu Tunka Duumanten jon me naxa kuŋa, na i yiga. I kara Tunka Duumanten jon me naxa.* 3 Muusa jaabi Haaruna da: « Ke ya ni fo be Tunka Duumanten ga daali ti a yi, nan ti : “ N na in senontaaxun ya bangandini sadaxakiɲandaanon da, nan bange ti in nooron ŋa jaman danman su jon me naxa. ” » Haaruna toxo kuurunu.4 Ken falle, Muusa da Miseeli do Yelicafaani xiri, kun ni Wujeeli ren yugun ya. Ken Wujeeli ni Muusa do Haaruna su faaba tugunne ya. A jaabi i da : « Xa tinko xa na axa waaxi furu ku wutu bakka dingira sennen ŋa katta daaxan falle. » 5 Xo Muusa ga da a ko moxo be, i tinko na i wutu ti i dorokon ŋa katta daaxan falle. 6 Muusa jaabi Haaruna do i renmun da, kun ga ni Lajaari do Yittimaara yi nan ti : « Axa maxa suno na axa yinmu ku jaxafitanton wara, na axa yiraamun booxo, axa n maxa daga kara, a butten yanganxatan gaa jaman danman su kitana. Tunka Duumanten ga da buyinde ke be dabari, Isirayila kaadunkon danman su ya na ken baaden taaxunu, axa waaxinu ku. 7 Xa ganta, axa maxa giri bakka genmanlenmaaxuntilliisen raqen ŋa, axa n maxa daga kara. Baawo Tunka Duumanten seri sugandinton ya ni axa yi. » Muusa ga da a ko moxo be, i da a ɲa ken moxo yi.
[Sadaxakiɲandaanon Sariya]
8 Ku fiinu dangi falle, Tunka Duumanten daali Haaruna da nan ti : 9 « Kuudo axa n maxa kara, reesendolo, a do xonsi, anken yinme, nan kafi an renmun ŋa, xa maxa a mini bire be axa ga na ɲi roono genmanlenmaaxuntilliisen ŋa. Farila ya ni ke yi axa bonsonŋun kanma abada. 10 Ken moxo yi kuŋa, xa na fatanpansindi halaalen do haraamen naxa, a do fo sennen do fo sobinten naxa, 11 na Banisirayilaganko xaranŋundi farilanu beenu su Tunka Duumanten ga da i daali i da Muusa kitten ŋa. »
12 Muusa jaabi Haaruna do i ren kuttu ku da, kun ga ni Lajaari do Yittimaara yi nan ti : « Xa da soxofonsadaxa ke kutten wutu Tunka Duumanten yinbidunsadaxan ɲanfalle, xa na a lewiirintanŋen yiga sadaxaxurumindifon kaaran ŋa, baawo fo sennun fo sennen ya ni. 13 Axa na a yiga dingira senne yi, baawo an taqen ya ni, an renmun xa taqen ya ni ke kundu yi bakka Tunka Duumanten yinbidunsadaxan ŋa. Nke Muusa ɲaamari ti ken ya. 14 Gijin yigi-yiginte ke do togi wutunte ke kuŋa, axa wa i yigana dingira senne yi, anken yinme do an ren yugun do an ren yaxaru. Baawo an taqen ya ni ke yi, an renmun taqen ya ni, a gaa bakka Banisirayilaganko allatiigeyinsadaxon ŋa. 15 Togi wutunte ke do gijin yigi-yiginte ke, kun na ri kafiini yinbidunsadaxankateyu ku yi, kuudo na i yigi-yigi Tunka Duumanten jon me naxa. Ken na ɲaŋi anken do an renmun taqen ŋa. Taqi duumanten ya ni xoyi Tunka Duumanten ga ɲaamarindi moxo be. »
16 Muusa da futuxiyinsadaxan sugundige ke muuru. A ga da a muuru bire be, jaaxa ken da a ɲi a xurumi. A butu Haaruna ren kuttu ku wure, Lajaari do Yittimaara, nan ti : 17 « Manne ni axa ga ma futuxiyinsadaxa ke yiga dingira senne yi ? A xa ni fo sennun fo sennen xa ya yi. A kini axa yi ya kuudo na jaman junuubunun wutu bakka i kanma, nan xafarigeesimuuri i danŋa Tunka Duumanten jon me naxa. 18 Baawo a foron ga ma ri genmanlenmaaxuntilliisen noqu sennen ŋa, axa ɲi xawa a yigana dingira senne yi xoyi in ga ɲaamarindi moxo be. » 19 Haaruna ti Muusa da : « E ! Lenki ke koota kundu, i da i futuxiyinsadaxon do i yanpeyinsadaxan sadaxi Tunka Duumanten jon me naxa, ke bono da in kita kundu. N nan yille futuxiyinsadaxan yigana lenki ke koota yi, yaala ken wa liŋoono Tunka Duumanten da ba ? » 20 Muusa ga da a jaabun mugu kuŋa, a da a faamu.