Sariya 11

[Halaalen do haraame]

[Daaba halaalun do fo haraamunto]

Tunka Duumanten daali Muusa do da nan ti : 2 « Xa digaamu Banisirayilaganko da nan ti : “ Fo yonkinto beenu axa ra gaa i yigana gelli daaba terento beenu su gaa ɲiiɲen kanma, kun ya faayi ku. 3 Daaba su korobinsen karanten ya ga ni nan taxandi fillo, a gaa yillandindini xa, axa wa ken yigana. 4 Xa ganta, ku beenu gaa yillandindini axa ga nta i yigana, ken do ku beenu korobinsen karanten ga ni axa ga nta i yigana, kun ni ku ya : ɲogome, aken wa yillandindini, xa a korobinsen karante fe. Ken sobinten ya ni axa maxa. 5 Ken do ferede, a xa wa yillandindini, xa a korobinsen karante feti. Ken xa sobinten ya ni axa maxa, 6 a do kanjaane, baawo a xa wa yillandindini, xa a korobinsen karante feti. A xa sobinten ya ni axa maxa. 7 Fo be ga ni faringijen xa yi, a sobinten ya ni axa maxa, baawo a korobinsen karanten ya ni fillo yi, xa a nta yillandindini. 8 Xa maxa i tiyun yiga. I furun xa be ga ni, xa maxa kati i ya. I sobinton ya ni axa maxa.

9 « “ Jiidufoonu beenu axa ra gaa i yigana, kun ya faayi : fo wo fo gaa jin ŋa xinikanpen gaa a yi, koromen xa gaa a yi, jiidufon ya ga ni, a gaa geejin ya yi, ma a gaa ji nooxen ya yi, axa ra wa kun yigana. 10 Xa, fo wo fo su xinikanpen do koromen ga nta a yi, a gaa geejin ya yi, ma a gaa ji nooxen ya yi, ken ga ni jiidufo xoore danbe su yi, ma gonxiila danbe su, a gaa bireene jin ken ya yi, ken kabanten ya ni axa maxa. 11 I kabanto ya ga ni axa maxa, i tiyun yigeyen do furun meemenden xa kabe axa maxa. 12 Jiidufo su xinikanpen do koromen ga nta a yi, ken kabanten ya ni axa maxa.

13 « “ Axa ga n xawa fo be ragana fo kabante yi yeliŋun xa noqu, kun ya faayi ku, i yigeyen ga kabe axa maxa : janbanxiila, janbaxuruyigaana, a do janbanbinne, 14 yellimisigope, gopinxullen do i noonen su, 15 ken do xaaxen do i noonen su, 16 ciwoone, guruguttunloxaane, a do jiidunyeliŋe be i gaa a xilli xodoore, ken do gopen do i noonen su, 17 ken do guruguttunxulle, ciliili, guruguttunbinne, 18 ciwonloxaane, ciwonxulle, kolice, 19 ken do jinme, saaxon do i noonu, a do kokkiinen do karafuune.

20 « “ Fuuɲu kanpinte su, a gaa tereene taanun naxati kanma, ken kabe axa maxa. 21 Ganta fuuɲu kanpinto beenu gaa tereene taanun naxati kanma, ta dinkanun xa gaa i ya kafiini kun ŋa, i gaa jallini ti i ya ɲiiɲen kanma, axa ra wa kun yigana. 22 Axa ra gaa ku beenu yigana, kun ya faayi ku : sankanbuuren do i noonen su, a do beren do i noonen su, kafiini firi-firin noonen su, ken do tekke-tekkaanen noonen su. 23 Xa fuuɲu kanpinte su taanu naxati gaa a yi, ken kabanten ya ni axa maxa.

24 « “ O gaa riini ku be jaate axa da, fo kabanton ya ni, i gaa axa sobindini, i be nda kati i furun ŋa, an wa sobini ma futuron bire. 25 Sere su ga na i furun wutu, a n xawa i yiraamun wanqini ya. Ayiwa a kaman sobinten ya n toqo ma futuro.

26 « “ Daaba wo daaba, korobinsen ya gaa ken ŋa, a korobinsen karante ga fe, a ga nta yillandindini xa, ken sobinten ya ni axa maxa : i be nda kati a yi xa, an wa sobiini. 27 Fo wo fo korobinse ga nta a yi, a gaa tereene i tandegerun ya kanma, taanun naxati xa ya gaa a yi, kun sobinton ya ni axa maxa. I be nda kati i furun ŋa, an wa sobiini ma futuro. 28 I furun wutundaanan wa i yiraamun wanqini, a sobinten ya ni ma futuro. I sobinton ya ni axa maxa.

29 « “ Gonxiilo beenu sobinton ga ni axa maxa yi, kun gaa xiilini ɲiiɲen kanma, i ya faayi ku : maɲa, ɲiiɲe, bakkaanen do i noonen su, 30 ken do xixisaane, jiidunxaana, doŋadunxaana, balaxa, a do ɲange. 31 Ku ya ni fo sobinton ŋa bakka axa maxa, gelli ɲiiɲedufoonun ŋa. Sere su nda kati i furun ŋa, an wa sobiini ma futuro. 32 Fo wo fo su danbe i furun ga na xenu a kanma, ken wa sobiini. Ken ni yokke su danben ya, a sollinma, a yiraame, fate, a gafaqa, ma yokke wo yokke gollen gaa ɲaana ti a yi : ken roono jin ya yi, a sobinten xa ya ni ma futuro, ken bire a na seno. 33 Gonxiilon ga na yere roono doorinyokke danbe su noxon ŋa, a nuxudufon sobiini ya. Yokke ke yinme kareene ya. 34 Yigefo su gaa yigeene ya, yokke ke jin ga na ro ken xa yi, a sobiini ya. Minifo su gaa miniini ya, ken gaa yokke su yi, a nda ro ken xa yi, ken xa sobiini ya. 35 Ku du baananbe su furen ga na yere fo wo fo danben kanma, ken sobiini ya. A ga na ɲa benŋen ya yi ma doorinsingo, kun kare-kareene ya. I sobinton ya ni. I ɲa fo sobinto yi axa maxa. 36 Xa ganta, i nda yere jinyaaxen ŋa, a do geden do guufa, kun sennun ya n toqo. Xa sere be nda kati i furun ŋa, an sobiini ya. 37 I du baananbe furen ga na yere soxoodin kanma, ken sennen ya n toqo. 38 Xa ganta, jin ga na ro soxoodi ke yi, i du baananbe furen ga yere a kanma, ken sobi axa maxa.

39 « “ Ku daabanu be yinme yigeyen daganten ga ni axa maxa, i baananbe ga na kara, i be nda kati a jiibante ke yi, a kaman wa sobiini ma futuro. 40 A jiibante ke yigaanan wa i yiraamun wanqini, a kaman sobinten xa ya ni ma futuro. A furen wutundaanan xa wa i yiraamun wanqini. A xa sobinten ya ni ma futuro.

41 « “ Ɲiiɲedufo su gaa minixi-manaxana ɲiiɲen kanma, a kabanten ya ni. Ken nta yigeene. 42 Fo wo fo gaa xiilini i gonmen ya kanma, fo wo fo gaa tereene naxato ya kanma, ma ɲiiɲedufo su ga ni ta gabagume ya, ŋuɲuxu-ŋaɲaxaana ga ni ɲiiɲen kanma, xa maxa i yiga, baawo i kabanton ya ni. 43 Xa maxa axa du ro kabanden ŋa ti ɲiiɲedufo yi, minixi-manaxante ga ni, nan maxa xa du sobindi ti i ya, axa gaa du ɲaana sobinto yi. 44 Nke saanan ya ni Tunka Duumanten ŋa, axa Alla. Xa da du senondi ya, xa na seno, baawo inke sennen ya ni. Xa maxa du sobindi ti ɲiiɲedufoonu ku danmon su yi dillene ɲiiɲen kanma. 45 Nke ya ni Tunka Duumanten ŋa, axa segendindaana bakka Misira yi, nan ɲaŋi axa da kamane yi. Xa ɲa seri sennu yi, baawo inke sennen ya ni. 46 Ku ya ni daabanun do yeliŋun sariyan ŋa, a do tagefo yonkinto, i gaa dillene jin noxo, ken do ɲiiɲedufo yonkinte su gaa minixi-manaxana ɲiiɲen kanma. 47 Kuudo axa na fo sennen do fo sobinten fatanpansi bakka me yi, a do fo biranton duurun do me naxa, fo birante be gaa yigeene, a do fo birante be gaa nta yigeene. ” »