[Saareforon wanqiye]
12
Tunka Duumanten daali Muusa da nan ti : 2 « A ko Banisirayilaganko da nan ti : “ Yaxare be ga na warijaxi nan saare ti renyugo yi, a wa sobiini bito ɲeri, xoyi a gaa sobiini ti laadanforon ŋa moxo be. 3 Bita segundin ŋa, renme ke murunfaten na kuti. 4 Yaxare ke na alihiddan taaxu, tanjikke do bito sikki. Fo senne su, a n maxa kati a yi. Dingira sennen xa be ga ni, a n maxa daga no, ma a senoyen kooton ga na tinme bakka foron ŋa. 5 Selli a ga na yaxaren ya saara, a wa sobiini koyu filli xo laadanforon moxo, na tandume do bito tunmi taaxu saareforon senoyen da.6 « “ A senoyen biton ga na tinme bire be keeta, renyugo ya ga ni ma renyaxare ya ga ni, a do jaxanlenme ya n riini a gaa i siinen ŋa, kuudo na a ɲa yanpeyinsadaxa yi, ken do kaadunboore, walla xa makkaboore, na i ɲa yangonsadaxa yi. A do i na daga katta sadaxakiɲandaanan ŋa gemmanlenmaaxun tilliisen raqen ŋa. 7 Sadaxakiɲandaana ke na a sadaxo ku tinkondi Tunka Duumanten ŋa, a na yanpeyimuuri a da, a na seno bakka saareforo ku yi. Ke ya ni saareyen sariyan ŋa saarayaxaren kanma ti renyugun do renyaxarun su yi. 8 Selli jaxe ga nta a kitten ŋa, a na booru filli wutu, walla xa makkaboorinlenmu filli. Baanen na ɲa yanpeyinsadaxa, baanen xa na ɲa yangonsadaxa. Sadaxakiɲandaanan na yanpeyimuuri a danŋa kuŋa, ken bire a na seno. ” »