Sariya 13

[Fatanwattu]

Tunka Duumanten daali Muusa do da kuŋa nan ti : 2 « Fatanbiribillen ga na ɲi haadamarenme be faten ŋa, ma fanxalaale, walla tebedu tana, ken xosi ɲa fatanwatten ŋa, i na a joofa Haaruna yi, sadaxakiɲandaana, walla xa a renmu ku yogo tana, sadaxakiɲandaano ku. 3 Sadaxakiɲandaana ke ga na tebeden faayi faten ŋa, tebede ke waritiyaaxen ga jufo diina faten kutten ŋa, a yinten ga saage xurana, ken ni fatanwatten ya. Sadaxakiɲandaanan na a faayi, na a sobintaaxun ko. 4 Xa, selli tebede ke ga na xura, a waritiyaaxen ga ma jufo diina faten kutten ŋa, yinten ga ma saage xurana, sadaxakiɲandaanan na watunte ke koso noqu yi bito ɲeri. 5 Sadaxakiɲandaana ke na a faayi bita ɲerundin ŋa, watten gaa i batten ya yi a yaaxon kaane, tebede ke ma sanqi do faten ŋa, sadaxakiɲandaana ke na a koso ta fillandi yi xadi, bito ɲeri. 6 Sadaxakiɲandaana ke na yille a faayini ken koyi fillandi xa bita ɲerundin ŋa. Tebede ke ga na fuuri, a ga maxa sonqi do faten ŋa, ken ni fanxalaalen ya. Sadaxakiɲandaanan na a senontaaxun ko, a na i yiraamun wanqi a na seno. 7 Xa, selli fanxalaale ke ga na sanqi nan sonqi do faten ŋa a senoyen falle ti sadaxakiɲandaanan konŋen ŋa, a na yille du koyini sadaxakiɲandaana ke ŋa ta fillandin ŋa. 8 Sadaxakiɲandaana ke na a faayi kuŋa : selli fanxalaale ke ga sonqi do faten ŋa, ken ni fatanwatten noone yogo ya. Sadaxakiɲandaanan na a sobintaaxun ko.

9 « Haadamarenme su fatanwatten ga na ɲi an ŋa, an dagana katta sadaxakiɲandaanan ya yi. 10 Sadaxakiɲandaana ke na a faayi. Funbuunen ya gaa an faten ŋa, yinten ga saage xurana, fati birante ke gaa delexiteene ya, 11 ken bire ke, ken ni fatanwatti saxunten ya yi an faten ŋa. Sadaxakiɲandaanan na an sobintaaxun ko, kosonden ntaxa an ŋa keeta, baawo an sobintaaxun banganten ya ni. 12 Xa, selli fatanwatte ke ga na xosi sonqi do faten su ya yi, nan giri gelli an yinme ma an taanu, na an faten su kutu, na a xufaari, sadaxakiɲandaanan yaaxarawallu maxa, 13 sadaxakiɲandaana ke ga da a wari nan ti fatanwatte ke da an faten danman su ya xufaari, a na an senontaaxun ko. Baawo an faten su ya ga saage nan xura ke, ken ni watte ke ɲamanten ya. 14 Xa, koota be an faten ga na delexite, tiyindunban biranten ga wari, an sobiini ya. 15 Sadaxakiɲandaanan ga na ken tiyindunba birante wari keeta, a na an sobintaaxun ko. Tiyindunba biranten sobinten ya ni. Ken ni fatanwatten ya. 16 Ma ganta, tiyindunba birante ke ga na yille saagene xurana xadi, ken ŋa, an na yille katta sadaxakiɲandaanan ŋa. 17 Sadaxakiɲandaana ke na a faayi xadi. Selli fatanwatte ke ga saage xurana ya xadi, sadaxakiɲandaana ke na an senontaaxu ko. An sennen ya ni.

18 « Funbuune ga na bogu sere be faten ŋa, a ga selle, 19 funbuune ke tebeden xosi yiti, walla xa a noqu ke xura, ma a dunbun-dunbu, an na du koyi sadaxakiɲandaanan ŋa. 20 Sadaxakiɲandaanan ga na a wari a ga jufo diina faten kutten ŋa, a yinten ga saage xurana, sadaxakiɲandaana ke na an sobintaaxun sefen ko. Ken ni fatanwatten ya a ga jope ti funbuunen ŋa. 21 Xa selli sadaxakiɲandaanan ga na a faayi, a ma yinti xulle ɲi a yi, jufoye nta faten ŋa, a batten xa fuuri, ken bire sadaxakiɲandaana ke na an koso bito ɲeri. 22 Selli a ga na sonqi do an faten ŋa xa, ken bire sadaxakiɲandaanan na an sobintaaxun ko nan ti fatanwatten noone yogo ya ni. 23 Xa selli tebedi xullen ga na toxo a wure yi batten ŋa, a ma sonqi do faten ŋa, ken ni funbuunen batten ya. Sadaxakiɲandaanan na an senontaaxun ko.

24 « Yinbinbuyen ga na ɲi sere be faten ŋa, noqu delexitante ke ɲa tiyindunban ŋa, ma a batte ke ga ŋaali ya, 25 sadaxakiɲandaanan na a faayi. A ga na a ɲi yinten ga saage xurana tebedi xulle ke yi, a waritiyaaxen ga jufo diina faten kutten ŋa, ken ni fatanwatten ya yi a ga bange biyinbiye ke yi. A na a sobintaaxun ko. Ken ni fatanwatten tebeden ya. 26 A ga na a wari nan ti yinti xulle nta tebede ke yi, jufoye nta fate ke xa yi, a batten xa fuuri, a na an koso bito ɲeri. 27 Bita ɲerundin ŋa, sadaxakiɲandaanan na a faayi xadi. Selli a ga sonqi do an faten ŋa, a na an sobintaaxun ko. Ken ni fatanwatten ya. 28 Xa selli tebede ke gaa i moxon ya yi, a ga ma sonqi do faten ŋa, a fuurinten ya ga ni, sadaxakiɲandaanan na an senontaaxun sefen ko, ken ni buyin-buya ke taagumansen ya yi.

29 « Selli tebede nda bogu yinme yi ma sinqe yi, ken ga ɲa yugo ya yi ma yaxare ya ga ni, 30 sadaxakiɲandaanan na tebede ke faayi : a ga na yingi jufoye yi faten ŋa, yinten ga makkajinyaaxe nan miso, sadaxakiɲandaanan na an sobintaaxun ko. Ken ni fiiten ya yi, fatanwatten ya ni an yinmen ŋa, ma walla xa an sinqen ŋa. 31 Xa sadaxakiɲandaanan ga na faayi na a segesege, a ga ma jufo faten ŋa, yintinfina xa nta a yi, ken bire sadaxakiɲandaana ke na fiitinte ke koso bito ɲeri. 32 Bita ɲerundin ŋa sadaxakiɲandaana ke na a faayi xadi. Selli a ga na a wari fiite ke ga ma neenu, yinten xa ma makkajinyaaxe, tebede ke ma jufo xa diina faten kutten ŋa, 33 an yinme na an yinmen siyi, an nta fiite ke tebeden siyini de, sadaxakiɲandaanan na an koso bito ɲeri tana. 34 Sadaxakiɲandaanan na fiite ke faayi bita ɲerundin ŋa. Selli a ga ma neenu do faten kanma yi, a ma jufo faten xa yi, ken bire sadaxakiɲandaanan na dantaxi ti an senontaaxun ŋa. An na an yiraamun wanqi, ken ŋa an na seno. 35 Xa ganta senontaaxun dantaxi falle fiiten ga xosi neenu do faten kanma yi, 36 sadaxakiɲandaanan na a faayi. Selli fiite ke ga neenu faten kanma yi ya, sadaxakiɲandaana ke ntaxa hari yinten makkajinyaaxeyen koroosini keeta, an sobinten ya ni. 37 Xa selli a ga na a wari nan ti fiite ke sigi, yinti binnen funti, ken ŋa fiiten saha. An sennen ya ni. Sadaxakiɲandaanan na dantaxi ti an senontaaxun ŋa.

38 « Selli xurayen tapolli ŋaalinton ya ga na bogu yugo fanten ŋa ma yaxare, 39 sadaxakiɲandaanan na a faayi selli fatantiye ke tapollun fuurinton ya ga ni, ken ni tapollu kundun ya yi a faten ŋa tannu, a sennen ya ni.

40 « Telu gaa yugo be yin naxaanen ŋa, yintun ya yere tannu, xa a sennen ya ni. 41 Selli telu gaa taŋen ya yi, yintun ya yere tannu, a sennen ya ni. 42 Xa selli tebede ga na bogu kofen ŋa ma taŋe, tebede ke ga ɲa marasa dunben ŋa, ken ni fatanwatten ya a ga bogu kofe ke yi, walla xa taŋe. 43 Sadaxakiɲandaanan wa a faayini : selli kofe ke noqu watunten ga xura ma walla taŋe ke, nan marasadunbu xoyi fatanwatten warimoxo, 44 ken kaman ni fatanwattigumen ya. A sobinten ya ni. Sadaxakiɲandaanan na dantaxi ti a sobintaaxun ŋa, fatanwatten ya ni a kaman yinmen ŋa.

45 « Sere be ke fatanwatte gaa an ŋa, an yiraamun nan xawa booxeene ya, yinmanyinten jaxafitante, an na an soomon fanama, an na toxo gangundini nan ti : “ Fo sobinte ! Fo sobinte ! ” 46 Na fatanwatten toxo an ŋa, an sobinten ya ni waxati su ; na a toxo an sobinten ya ga ni, an bibireene durannoqu ya yi daaxan falle.

[Yiran xuufinte]

47 « Xuufiyen ga na ɲi yiranlifinte yi, ken ga ni xaasan ya yi ma sasin ya ga ni, 48 walla xa geesinbolla ma fallinbolla, ken ga ɲa sasi ma xaasa, walla xa fate, fo wo fo su faten ya ga ni, 49 tebede ke xosi molloderijinyaaxe, ma a dunbun-dunbu yiranlifinte ke yi, walla xa fate ke yi, ma geesinbolla ke yi ma fallinbolla ke yi, ma fatansurumaade su keeta, ken ni xuufiyen ya yi. I na a koyi sadaxakiɲandaanan ŋa. 50 Sadaxakiɲandaanan na tebede ke faayi, a na fo ke koso bito ɲeri. 51 A na tebede ke faayi bita ɲerundin ŋa xadi, selli tebede ke ga na neenu do yiranlifinte ke yi ma bolla ke, ma fate ke, walla fatansurumaade ke yi, ken ni xuufiyi buuren ya, a sobinten ya ni. 52 A na yiranlifinte ke buyi, walla bolla ke, xaasa ya ga ni ma sasi, ma fate, ma fatansurumaade ke be xuufiye ke gaa a yi, an na i buyini ti yinben ya yi, baawo ken ni xuufiyi buuren ya yi. 53 Xa selli sadaxakiɲandaanan ga na a faayi, tebede ke ga ma neenu do yiranlifinte ke yi, ma bolla ke yi, ma fatansurumaade ke, 54 sadaxakiɲandaanan na i ɲaamari, tebede ke gaa ke be yi, i na a wanqi. A na yille a kosono xadi bito ɲeri. 55 Sadaxakiɲandaanan na tebede ke faayi a wanqi falle. Selli tebede ke moxon ga ma yille, hari a ga ma neenu, a sobinten ya ni, a na a buyini ya. A ɲa keeta a bansiren ya n bono wo, a banburen ya n bono wo, yinben ɲa an na a buyi. 56 Xa selli sadaxakiɲandaana ke ga na a wari nan ti wanqinde ke falle tebeden fuuri, a na a booxo bakka yiranlifinte ke yi, ma fate ke, walla xa bolla ke. 57 Selli a ga na bange yiranlifinte ke yi xadi, ma bolla ke, walla fatansurumaade su keeta, ken ni xuufiyen ya yi fillanjiidini, ken kuŋa tebede ke gaa fo wo fo su yi, i na yinben ɲa na a buyi. 58 Yiranlifinte ke kuŋa, ma bolla ke, ma fatansurumaade su keeta, fo be ga na wanqi ya, tebede ke ga sanku bakka a yi, a wa yillene wanqini ta fillandin ŋa, a na seno.

59 « Ke ya ni yiran xuufinton sariyan ŋa, yiranlifinton do bollon kanma, sasi ga ni ma xaasa ga ni, kafiini fatansurumaade su yi, i senontaaxun do i sobintaaxun gaa dantaxini ti a yi. »