[Fatanwattun sahandiye]
14
Tunka Duumanten daali annabi Muusa da nan ti : 2 « Sariya be ga n xawa wurunu fatanwattigumen kanma yi a senokoota, a faayi ke : a wa kiɲeene sadaxakiɲandaanan ŋa, 3 sadaxakiɲandaanan na bogu daaxan falle, na a faayi. A ga na a wari nan ti a fatanwatte ke selle, 4 a na ɲaamarindi, i na yelin biranta sennu filli raga senomaxayenme ke da, a do hereejinsolle, a do fetela dunbu xaxace, do tulunbannen kinge. 5 Sadaxakiɲandaana ke na ɲaamarindi, i na yelin baane ke xurusi katta ji biranten ŋa dooringinen noxo. 6 A na yelin birante ke wutu, a do hereeji ke solle, ken do fetela dunbu xaxace ke, kafiini tulunbanne ke kingen ŋa, na i duxumi yelin xurusinte ke foron di ji birante ke noxon ŋa. 7 Sadaxakiɲandaana ke na a sanpa-sanpa sere ke kanma taanu ɲeri, ke be gaa senoono bakka fatanwatten ŋa. A na dantaxi ti a senontaaxun ŋa. A na yelin birante ke wara taŋeene gunnen ŋa.8 « Sere ke be gaa senoono, a na i yiraamun wanqi, na yinten su siyi, nan wanqi jin noxon ŋa, a na seno. Ken falle, a na daga daaxan ŋa, nan taaxu i tilliisen sellan ŋa bito ɲeri. 9 Bita ɲerundin ŋa, a na i yinten su siyi, yinme, sinqe, do a yaaxangungunmu. A na i yinten su ya siyini. A na i yiraamun wanqi, na i faten wanqi jin noxo, a na seno.
10 « Bita segundin ŋa, a na jaxanlenmu filli wutu, leebu ga nta i ya, a do jaxanlen baane tana ken ni siinibaananyeeren ya, leebu ga nta a yi, a do muudu sikki¤ yilli jura mullu-mulle, soxofonsadaxa, na a do ten ɲaxami, ken do ten liitaran taxandi sikka. 11 Sadaxakiɲandaana ke be gaa senonden gollun dabarini, a na ke sere be gaa senoono do i sadaxan sigindi genmanlenmaaxuntilliisen raqen ŋa, Tunka Duumanten jon me naxa. 12 Sadaxakiɲandaana ke na jaxanlen baanen raga, nan tinko, a na senoyinsadaxan bagandi ti a yi, a do liitaran taxandi sikkan te. A na i yigi-yigi Tunka Duumanten jon me naxa. 13 A na jaxanlenme ke xurusi dingira sennen ŋa, noqu be i gaa futuxiyinsadaxan xurusini, a do yinbidunsadaxa, baawo sadaxakiɲandaanan xallen ya ni senoyinsadaxan ŋa xoyi futuxiyinsadaxan moxo : fo sennen ya ni.
14 « Sadaxakiɲandaanan na senoyinsadaxa ke foron wutu, na i ro senomaxayenme ke tarunlenbi tayen ŋa, a do a kitti tayen doronyugo, a do a ta tayen doronyugo. 15 Ken falle sadaxakiɲandaanan na ten liitara ke taxandi sikkandin yogo wutu, na fo joxi i noogen degeren ŋa. 16 A na i tayen doronsaaken duxumi te ke yi i noogen degeren ŋa, na te ke sanpa ti i doronmen ŋa Tunka Duumanten jon me naxa taanu ɲeri. 17 Te ke kutten be gaa toqo a degere ke yi, aken sadaxakiɲandaana na fo ro senomaxayenme ke tarunlenbi tayen ŋa, na fo ro a kitti tayen doronyugon ŋa, na fo ro a ta tayen doronyugon ŋa, senoyinsadaxa ke foron kanma yi. 18 Ken te toxinte be gaa a degere ke yi, aken sadaxakiɲandaana na a ro senomaxayenme ke yinmen ŋa, nan xafarigeesimuuri a danŋa Tunka Duumanten jon me naxa.
19 « Ken falle sadaxakiɲandaana ke na futuxiyinsadaxan bagandi, nan xafarigeesimuuri senomaxayenme ke danŋa ti a fi sobinton ŋa. Ken falle a na yinbidunsadaxan xurusi. 20 Sadaxakiɲandaanan na yinbidunsadaxa ke rosadaxaxurumindifon kanma, a do soxofonsadaxa. A na xafarigeesimuuri sere ke danŋa, a na seno.
21 « Ganta selli korinta kitti duuron ya ga ni kuŋa, a na jaxanlen baane wutu senoyinsadaxa yi, na a yigi-yigi, kuudo nan xafarigeesimuuri a danŋa. A na muude jura mullu-mulle wutu soxofonsadaxa yi, a ga xooti ti ten ŋa, ken do liitara ke taxandi sikkandin te, 22 a do kaadunbooru filli, ma makkaboorinlenmu filli, fo be gaa a kitten ŋa, baanen na ɲa futuxiyinsadaxa yi, baanen na ɲa yinbidunsadaxa yi.
23 « Bita segundin ŋa, a do i na ri ti i senonden ŋa katta sadaxakiɲandaanan ŋa genmanlenmaaxuntilliisen raqen ŋa, Tunka Duumanten jon me naxa. 24 Sadaxakiɲandaana ke na jaxe raga senoyinsadaxa yi, ken do liitara ke taxandi sikkandin te, a na i yigi-yigi Tunka Duumanten jon me naxa. 25 A na jaxe ke xurusi, ken ga ni senoyinsadaxa ke, sadaxakiɲandaana ke na ken senoyinsadaxa foron wutu, na i ro senomaxayenme ke tarunlenbi tayen ŋa, a do kitti tayen doronyugo, do a ta tayen doronyugo. 26 Sadaxakiɲandaana ke na ten ro i noogen degeren ŋa. 27 Te ke be gaa a noogen degeren ŋa, a na tayen doronsaaken ɲa, na a sanpa-sanpa Tunka Duumanten jon me naxa taanu ɲeri. 28 Te ke kutten be gaa a degeren ŋa, a na fo ro senomaxayenme ke tarunlenbi tayen ŋa, senoyinsadaxa ke foron batten kanma yi, a do kitti tayen doronyugo, do a ta tayen doronyugo. 29 Te toxinta kutte ke be gaa sadaxakiɲandaana ke kittindegeren ŋa, a na a ro senomaxayenme ke yinmen ŋa, kuudo nan xafarigeesimuuri a danŋa Tunka Duumanten jon me naxa.
30 « A na booru ku du baananbe wutu, ken ga na ɲa makkabooru ku ya yi ma kaadunbooru ku, fo be gaa a kitten ŋa tannu. 31 Baanen ni futuxiyinsadaxan ya, baanen ni yinbidunsadaxan ya yi kafiini soxofonsadaxan ŋa. Sadaxakiɲandaana ke na xafarigeesimuuri senomaxayenme ke danŋa Tunka Duumanten jon me naxa. 32 Ku beenu fatanwatten gaa i ya fo ga nta i kitten ŋa nan seno, i sariyanun ni ku ya. »
[Tageyen do laxa]
33 Tunka Duumanten daali Annabi Muusa do Haaruna da nan ti : 34 « Axa ga na daga Kanaana ɲiiɲe be in gaa a kinni axa yi taqe, n ga na laxan selleti ka be yi axa ken taqi ɲiiɲe kanma, 35 kaagume ke na ri, na a ko sadaxakiɲandaanan danŋa nan ti : “ A na xo laxa ya ga bange in ka ke yi de ! ” 36 Sadaxakiɲandaana ke na ɲaamarindi ti i na ka ke duuraaxundi saado i gaa roono na tebede ke segesege, kuudo yokku ku beenu gaa ka ke yi, i su n maxa sobi. Ken falle ya ni, sadaxakiɲandaanan na ro, kuudo na ka ke segesege. 37 A ga na tebede wari ka ke yi, selli tebede ke gaa kan tageyun ya yi, a wariyun ga molloderijinyaaxe, ma a ga dunbun-dunbu, a warinte jupen ga ni do tageyen ŋa, 38 sadaxakiɲandaana ke na bogu kan ŋa katta kan ganlaqen ŋa, a na ka ke raqen texe bito ɲeri.
39 « Sadaxakiɲandaanan na saage bita ɲerundin ŋa na a faayi xadi : tebede ke ga na sonqi do tageyun ŋa, 40 a na ɲaamarindi, tebeden gaa gidintuufo ku beenu yi, i na i bogu a yi na i sedi deben falle katta dingira sobinte yi. 41 A na ka ke noxon tageyun yoorindan koosi, koosindi doore ke be gaa bakka a yi, a na joxi dingira sobinte yi deben falle. 42 I na gidintuufo tana wutu, na i riiti gidintuufo ku batten ŋa, na doore tana wutu, na ka ke sapi. 43 Selli tebede ga na yille bangeene gidun bagandi falle do tageyun koosinden do i sapinden falle, 44 sadaxakiɲandaanan na daga a faayi : selli tebede ke ga neenu do kan ŋa, ken ni jangiro buuren ya yi ka ke noxo, a sobinten ya ni. 45 I na ka ke guruja, a giden do a solle, kafiini ka ke dooren su, na i bagandi deben falle katta dingira sobinte yi. 46 Na ka ke soxonten toxo saado a gaa gurujeene, sere be nda ro, an wa sobiini ma futuro. 47 Sere be ga na saxu ka ke noxo, an wa an yiraamun wanqini ; sere ba ga na yige ka ke noxo, an xa wa i yiraamun wanqini.
48 « Xa selli sadaxakiɲandaanan ga ro na a faayi, tebede ke ga ma sonqi do kan ŋa ka ke sapi falle, a na dantaxi ti kan senontaaxun ŋa, baawo jangiro ke selle. 49 A na yeliŋu filli raga ka ke senonden xanne maxa gelli a sobintaaxun ŋa, a do hereejinsolle, do fetela dunbu xaxacen do tulunbannen kinge, 50 a na yelin baane ke xurusi roono dooringinen noxon ŋa katta ji biranten ŋa. 51 A na hereeji ke sollen wutu, a do tulunbanne ke kinge, ken do fo dunbu xaxace, kafiini yelin biranten ŋa, a na i duxumi yelin xurusinte ke foron do ji birante ke yi. A na i sanpa-sanpa do ka ke yi taanu ɲeri. 52 Ke moxo saanan ya ni a gaa ka ke senondini bakka i sobintaaxun ŋa ti yeliŋe ke foron do ji birante ke yi, ken do yelin birante ke do hereejin solli dunŋe ke do tulunbannen kingen ŋa, kafiini fetela dunbu xaxacen ŋa. 53 A na yelin birante ke wara deben falle yi taŋeene gunnen ŋa, a na xafarigeesimuuri ka ke danŋa, ka ke na seno.
[Senoyinsariya sefe lagaru]