[Yugunwatten kiitu]
15
Tunka Duumanten daali Muusa do Haaruna da nan ti : 2 « Xa digaamu Banisirayilaganko da na a koni i da ti : “ Yugo wo yugo, yugunwatten ga na an raga, motten gaa bakka an ŋa, a na an sobindini ya. 3 Motte ke gaa joqo do a yi ya ma a ga suti ya, ken ga ɲa moxo su keeta, a kaman ken sobinten ya ni. 4 Saxa su a kaman ga na saxu a kanma, ken xa wa sobiini ; yokke su a ga na taaxu a kanma, ken xa wa sobiini. 5 Sere be ga na kati a saxuraxe ke yi, a kaman wa i yiraamun wanqini, a yinme wanqi, a sobinten ya n toqo ma futuro. 6 I be nda taaxu yokke kanma, watunte ke ga ɲi taaxunu ke be kanma, an wa an yiraamun wanqini, an yinme na wanqi, an sobinten ya n toqo ma futuro. 7 I be nda kati ken watunte faten ŋa, an wa an yiraamun wanqini, an na wanqi. An sobinten ya n toqo ma futuro. 8 Watunte ke ga na beexi seri sennen kanma, an wa an yiraamun wanqini, an na wanqi. An sobinten ya n toqo ma futuro. 9 Setufo su watunte ke ga taaxu a kanma, ken wa sobiini. 10 Fo wo fo ga ɲi watunte ke wure, sere su nda kati ken fo yi, an wa sobiini ma futuro. Sere su ga na ken fo wutu, an wa an yiraamun wanqini, an na wanqi. An sobinten ya n toqo xa ma futuro. 11 Watunte ke ga kati sere su yi kittun wanqinto ga fe, an nan xawa an yiraamun wanqini ya, an yinme na wanqi. Ayiwa an sobinten ya toqo xa ma futuro. 12 Yokke su ga ni dooringinen ya, watunte ke ga na kati a yi, ken nan xawa kareene ya. Yokke su ga ni sollen ya, ken salanqiini ya.13 « “ Watunten ga na seno, motte ga ntaxa bakka a yi, a na bito ɲeri jaate senoyen da, a na i yiraamun wanqi, na i faten wanqi ji biranten ŋa, a na seno. 14 Bita segundin ŋa, a na kaadunbooru filli raga, walla xa makkaboorinlenmu filli, a na ri Tunka Duumanten jon me naxa katta genmanlenmaaxuntilliisen raqen ŋa, a na i kini sadaxakiɲandaanan ŋa. 15 Sadaxakiɲandaana ke na baanen na ɲa futuxiyinsadaxa yi, baanen na ɲa yinbidunsadaxa yi. A na xafarigeesimuuri watunte ke da Tunka Duumanten jon me naxa.
16 « “ Yugo be manin ga na bogu ti du yi, an na an faten danman su ya wanqini. An sobinten ya n toqo xa ma futuro. 17 Mani ke ga joxi na yiraame su ɲi an ŋa, ma fate, ken wa wanqiini ti jin ŋa. A sobinten ya n toqo ma futuro. 18 Yugo ga na saxu do yaxare yi, manin ga joxi, i wa wanqini jin ŋa. I sobinton ya n toqo ma futuro.
[Yaxarinwatten kiitu]
19 « “ Yaxare be laadanforon gaa a yi, a wa bito ɲeri ɲaana sobintaaxun ŋa. I be nda kati a yi, an wa sobiini ma futuro. 20 A ga saxu fo wo fo kanma, ma a ga na taaxu fo wo fo su kanma na a toxo sobintaaxu ke noxon ŋa, ken fo xa wa sobiini. 21 Sere su ga na kati a saxa ke yi, an wa an yiraamun wanqini, an yinme wa wanqini, an sobinten xa ya n toqo ma futuro. 22 A ga na taaxu fo be kanma, sere su nda kati ken fo yi, an wa an yiraamun wanqini, an yinme wa wanqini, an sobinten ya n toqo xa ma futuro. 23 Selli yokke gaa saxa ke kanma ma fo tana, a ga taaxu a kanma, an ga na kati ken ŋa, an sobinten ya n toqo ma futuro. 24 Yugon ga na saxu do a yi, laadanforon xosi ro yugo ke yi, yugo ke sobinten ya ni bito ɲeri. Yugo ke ga na saxu saxa su yi, ken xa wa sobiini.
25 « “ Foronjoqen gaa yaxare be yi bita gabu, laadan waxatin dangi falle, ma laadan wucen ya ga giilo, kun wucu noxon su n baana, a sobinten ya ni xoyi a gaa laadan noxon ŋa moxo be. 26 Na foranjoqe ke toxo a yi, saxa su a ga saxu a yi, ma a ga taaxu yokke su ya kanma, ken wa sobiini xoyi a ga na ɲi laadanwaxati noxon ŋa. 27 Sere su xa nda kati i ya, an wa sobiini. An wa an yiraamun wanqini, nan wanqi. An sobinten ya n toqo xa ma futuro.
28 « “ A ga na seno bakka foranjoqe ke yi, a na bito ɲeri jaate taaxunu, ken falle a na seno. 29 Bita segundin ŋa, a na kaadunbooru filli raga, walla xa makkaboorinlenmu filli, a na i riiti katta sadaxakiɲandaanan ŋa genmanlenmaaxuntilliisen raqen ŋa. 30 Sadaxakiɲandaanan na baanen ɲa futuxiyinsadaxan ŋa, na baanen ɲa yinbidunsadaxan ŋa. A na xafarigeesimuuri a danŋa ti foranjoqe ke sobintaaxun ŋa Tunka Duumanten jon me naxa.
[Sefe lagare]
31 « “ Ke moxo saanan ya ni, axa gaa Banisirayilaganko kisiini sobintaaxun ŋa, kuudo in dingira senne ke be gaa i naxa, i n maxa daga a sobindi, i gaa kalla.
32-33 « “ Yugo be motten gaa bakka a yugaaxun ŋa, manin ga na bogu yugo be yi, a ga da a sobindi, ken do yaxare be gaa laadan ŋa, walla yugo be ma yaxare be motten gaa bakka a yi, ken do yugo be ga na saxu do yaxarin sobinten ŋa, ke ya ni sariyan ŋa. ” »