[Yanpeyinkoota]
16
Haaruna renmun filli kara falle, bire be i [do yinbi sagatanten] ga tinko Tunka Duumanten jon me naxa*, 2 Tunka Duumanten daali Muusa da : « Ti an waaxi Haaruna da, a nan maxa ro noqu sennun fo sennen ŋa yirankutaaden falle waxatin su yi kuudo a nan maxa daga kara, baawo waxande ke bipaade, a ga ni yanpeyinnoqun ŋa, nke yinme hadarinten na tabullen noxon ŋa non ya yi. 3 Haaruna ga na ɲi roono noqu sennun fo sennen ŋa, a na gunbo ya ragana na a ɲa yangonsadaxa, a do jaxandige, a na ken ɲa yanpeyinsadaxa. 4 A na sasinyiraamun rondi : sabudooron do wuno, na i du suturi, na i naxaanen siiti ti naxaadusiitaaden ŋa, na i yinfanaaron ro i yinmen ŋa. Ku ni yiran sennun ya, a gaa i rondini i wanqiyen falle. 5 A na sugundigu filli raga Banisirayilaganko jaman ŋa, na i ɲa yangonsadaxa, a do jaxandige, ken na ɲa yanpeyinsadaxa yi. 6 Ken falle a na gunbo sadaxi i yinme yangonun da, a na yanpeyimuuri i du da, a na a ɲa i kaadunkon xa da. 7 A na sugundigu ku filli raga na i sigindi gemmanlenmaaxun tilliisen raqen ŋa Tunka Duumanten jon me naxa. 8 Haaruna na Tunka Duumanten sokken do Jajeeli¤ sokken wutu sugundigu ku filli naxa. 9 Tunka Duumanten sokken ga na gemu ke be yi, Haaruna na a koyi, na a ɲa yangonsadaxa. 10 Xa Jajeeli sokken ga na gemu ke be yi, i na ken biranten sigindi Tunka Duumanten jon me naxa nan yanpeyimuuri ti a yi, na a wara katta Jajeeli yi gunjuran ŋa.11 « Ken bire, Haaruna na yangonsadaxangunbo bagandi i yinme da, nan yanpeyimuuri i du do i kaadunkon su da. A na a xurusi. 12 A na yinbiwutifon faga yinbinxoro dunben ŋa bakka sadaxanfutaadinbeelon ŋa Tunka Duumanten jon me naxa, na kittigobbo filli futaadi jura wutu, a do a na daga yirankutaaden falle, 13 a na futaade ke ro yinben ŋa Tunka Duumanten jon me naxa. Futaade ke tiiden na saxu yanpeyinnoqu ke yi, seedaaxun waxanden kanma. Ken moxo yi, Haaruna nta kalla. 14 Ken falle a na fo wutu gunbo ke foron ŋa ti i kittindoronmen ŋa, na a sanpa-sanpa yanpeyinnoqun kinbakkan ŋa kaane banŋe, taanu ɲeru. 15 A bogu falle, a na sadaxansugundige ke xurusi jaman futuxiyun da, a do a foron na ro yirankutaaden falle xadi. A ga da gunbo ke foron ɲa moxo be, ke xa foron ɲaana kundun ya, a na fo sanpa-sanpa yanpeyinnoqun kanma do a taŋon ŋa.
16 « Banisirayilaganko ga da gemmanlenmaaxun tilliisen noqu sennun fo sennen sobindi ti i murutiyun do i yangonun su yi, Haaruna na yanpeyimuuri i da, na a senondi. Tilliise ke xa be gaa i sobinton naxan ŋa, a na a senondi ken moxo yi. 17 Sere su ma xawa ɲiini tilliise ke noxon ŋa, bire be Haaruna ga na ro a noqu sennun fo sennen ŋa, kuudo nan yanpeyimuuri, ma a ga na bogu. A na yanpeyimuuriyen dabari i du do i kaadunkon da, kafiini Banisirayila jaman su yi.
18 « Ken falle a na bogu katta sadaxaxurumindifon ŋa Tunka Duumanten jon me naxa, nan yanpeyimuuri ken xa da. A na gunbo ke foron do sugundige ke foron wutu, na fo ro sadaxaxurumindifon bennun ŋa. 19 Banisirayilaganko ga da sadaxaxurumindifo ke mexendi, a na foron sanpa-sanpa a kanma ti i doronmen ŋa taanu ɲeru, a na seno, nan ɲa fo sugandinte.
20 « A ga na duguta noqu sennun fo sennen do tilliisen do sadaxaxurumindifon senonden ŋa, a na sugundigi birante ke riiti. 21 Haaruna na i kittun filli saxu sugundige ke yinmen kanma, a na Banisirayilaganko garamajigingollun do i murutiyun su ko a yinme ke kanma, sugundige ke na yangonu ku tiŋa ken moxo yi. Ken falle, a na sere sugandi, 22 ken na daga sugundige ke deni gunjuran ŋa. Sugundige ke do garamajigingollu ku su na daga.
23 « Ken falle Haaruna na ro gemmanlenmaaxun tilliisen noxon ŋa, a do sasinyiran sennu ku be ga ro dingira sennen ŋa, a na i bagandi, na i toxo non ŋa. 24 A na i faten wanqi ti jin ŋa noqu senne yogo yi, na i yiraamun rondi nan bogu, na i yinme yinbidunsadaxan do jaman xallen bagandi. A na yanpeyimuuri i du da, na a dabari jaman da. 25 A ga da naaburu ku be kari, a na i kateyun tiidindi sadaxaxurumindifon kanma.
26 « Sere ke be ga daga Jajeeli sugundige ke deni, a xa na wanqi na i yiraamun wanqi. Ken falle, a na ro daaxan ŋa. 27 I ga da gunbo ke be do sugundige ke be xurusi yangonsadaxa yi, na i foron ɲa na noqu sennen senondi, i wa i furun bagandini daaxan falle, na i faton do i tiyun xurumindi, kafiini nuxudufoonun do yaayen ŋa. 28 Sere ke be ga da i xurumindi, a na i faten do i yiraamun wanqi. Ken falle, a na ro daaxan ŋa.
29 « Farilan faayi axa da, a ga ntaxa gilli : xasu ɲerundin tanmu, xa na a suumi, kuudo na du maxayanqa, xa maxa golle su ɲa, mukken do saarido. 30 Baawo ken koota ya ni, i gaa yanpeyimuurini axa danŋa, axa na seno bakka axa yangonun ŋa Tunka Duumanten jon me naxa. 31 Ken ni axa da tuumakoota xooren ya, axa gaa a suumini. Farilan ya ni, a ga nta gilli.
32 « Sere ke be gaa yanpeyimuuriyen gollun maxafakka, ken ni i ga da sadaxakiɲandaana be sugandi ya, na a ɲa yinmanke yi faaben batten ŋa. A xa na saage sasinyiraamun rondini, yiran sennu, 33 na noqu sennun fo sennen senondi, a do gemmanlenmaaxun tilliisen do sadaxaxurumindifo, nan yanpeyimuuri sadaxakiɲandaanon do Banisirayila jaman su da. 34 Ke ni farila duumante ya axa da, a gaa yanpeyen kanma, siine su ta baane, Banisirayilaganko yangon su yanpeyen da. »
Tunka Duumanten ga da Muusa ɲaamari ti fo wo fo su yi, ken dabari.