Sariya 17

[Senoyen sariyanu]

[Foren senoye]

daali Muusa da nan ti : 2 « A ko do i renmun do Banisirayilaganko danman su da, nan ti inke Tunka Duumanten ga ɲaamarindi ti fo be yi, ken ni : 3 Sere wo sere ga ni Banisirayilaganken ya, a gaa gunbo xurusini sadaxa yi daaxan ŋa, ma jaxe, walla xa sugo, ma walla a gaa a xurusini daaxan falle ya, 4 a do a ga ma ri gemmanlenmaaxun tilliisen raqen ŋa kuudo na a ɲa kuye yi Tunka Duumanten danŋa a dingira sennen jon me naxa, a wa tirindiini foro ku yi. A jaatene xoyi a ga da haadamarenmen foren ya joxi. Ken sere wa xateene bakka i jaman noxon ŋa. 5 Ken moxo ya ni, Banisirayilaganko ga na ɲi a mulla na sadaxa be xurusi gunnen ŋa, i do a na ri Tunka Duumanten da katta sadaxakiɲandaanan ŋa gemmanlenmaaxun tilliisen raqen ŋa. I na a ɲa allatiigeyinsadaxa yi Tunka Duumanten da. 6  na foron joxi Tunka Duumanten sadaxaxurumindifon kanma yi tilliisen raqen ŋa. A na kateyen tiidindi timi liŋe yi Tunka Duumanten da. 7 Ken moxo yi, i ntaxa i xurusindifoonun xurusini ku sugundiginmunon danbu da, nan fillakafi ti i ya. Ke ni farilan ya yi i danŋa abada, a do i bonsonŋun su yi i falle.

8 « Ken kuŋa, an na ti i danŋa : sere wo sere an ga ni Banisirayilaganken ya, ma mukke ya ga ni an ŋa, an ga ri taaxu i noxo, an ga na yinbidunsadaxa sadaxi, ma sadaxa tana, 9 an do a ga ma ri gemmanlenmaaxun tilliisen raqen ŋa, na a sadaxi Tunka Duumanten da, an wa kutiini bakka an xabiilan ŋa.

10 « Sere wo sere, Banisirayilaganke ya ga ni an ŋa, ma mukke su an ga kafi i ya nan taaxu i noxo, an ga na fore moxonma su yiga, anken be ga da fore ke yiga, n wa gilli ti an xanne maxa. An wa kutiini bakka an jaman ŋa, 11 baawo fo birante su yonkin na a foren ya yi, ken ya n sigi, in ga da ken fore kini axa yi na a dabari sadaxindiran ŋa kuudo nan yanpeyimuuri axa yinmenu da. Bireyen ni foren ya, a wa yanpana yangon ŋa. 12 Ken kanma ya ni, n ga daali Banisirayilaganko da nan ti axa dubaananbe su n maxa foren yiga, mukke xa su taaxunten gaa axa noxon ŋa, a n maxa foren yiga. 13 Sere wo sere ga ni Banisirayilaganken ya, ma mukke ya ga ni taaxunu i noxon ŋa, an ga na xaɲefo xaɲa, gundufo ma yeliŋe, a gaa yigeene, an na a foron joxi ɲiiɲen ŋa, na i bulu ti dooren ŋa. 14 Tagefo biranten su yonkin na a foren ya yi. N da ken ya ko Banisirayilaganko da nan ti : “ Xa nta yonkinte su foren yigana, baawo yonkinten su yonkin na a foren ya yi. ” I be nda a yiga, an wa booxeene bakka an xabiilan ŋa.

15 « Yonkinte su nda jiiba yiga, walla fonyaatu ga da ke be kari, mukken ya ga ni an ŋa ma saaridon ya ga ni an ŋa, an wa an yiraamun wanqini, an yinme na wanqi ti jin ŋa. An sobinten ya n toqo ma futuro, ken bire an na seno. 16 Xa an ga ma wanqindi, an ma an faten xa wanqi, an wa an garamajigingollen tiŋana. »