Sariya 18

[Kapanlenmaaxu kabanto]

Tunka Duumanten daali Muusa da nan ti : 2 « An na a ko Banisirayilaganko da nan ti : “ Nke ya ni Tunka Duumanten ŋa, axa Alla. 3 Misiranko ɲiiɲe be axa ga ɲi taaxunu a yi, i gaa ɲangollu beenu dabarini, xa maxa kun me dabari. Kanaana ɲiiɲe ke xa be in gaa axa rondini no, i ɲangollu ku, xa maxa i me ɲa. Xa maxa i farilanun killun tera. 4 Xa da in kiiten gollen ya golli, xa na in farilanun tanga, na i tera. Nke ya ni Tunka Duumanten ŋa, axa Alla. 5 Xa da in kiiten do in farilan tanga : sere be ga na ken dabari, ken kaman wa bireene ti i ya. Nke ya ni Tunka Duumanten ŋa.

6 « “ Sere wo sere do i buru tinken nan maxa tinko kuudo na a lawuran farasa. Nke ya ni Tunka Duumanten ŋa. 7 Maxa an ma saqanlenmaaxu an gaa an faaba yaagundini. An ma ya ni, maxa a lawuran farasa ! 8 Maxa an faaba yaqen saqanlenmaaxu, ken ni an faaba lawuran ya. 9 An waaxi yaxare, ken ga ɲa saaxanbaane ya ma a ga ɲa faabanbaane ya, axa gaa xoorono ka baane noxo, ma a ga xooro sellan ŋa, maxa a saqanlenmaaxu. 10 An ren yugon ren yaxare, walla an ren yaxaren ren yaxare, maxa a saqanlenmaaxu, ken ni an yinme lawuran ya. 11 Maxa an faaba yaqen ren yaxaren lawuran farasa, an faaba ren yaxarin saarante, ken ni an waaxi yaxaren ya. 12 Maxa an faaba waaxi yaxaren saqanlenmaaxu, baawo an faaba sunpun ya ni. 13 Maxa an ma waaxi yaxaren saqanlenmaaxu, baawo an ma sunpun ya ni ken ŋa. 14 Maxa an faaba waaxi yugon lawuran farasa, nan tinko a yaqen ŋa, baawo an faxarin ya ni. 15 An kallu yaxarin tugunne, maxa a saqanlenmaaxu, an ren yugon yaqen ya ni. Maxa ken lawuran farasa. 16 Maxa an waaxin yaqen saqanlenmaaxu, ken ni an waaxin yaagun ya. 17 Maxa yaxare do i ren yaxare saqanlenmaaxu, an nta a do i ren yaxaren ren yaxare saqanlenmaaxu, an nta a do i ren yugo ren yaxare saqanlenmaaxunu. Kun do a su ni fori baanen ya. Ken ni sankuntaaxun ya.

18 « “ Maxa an yaqen waaxi yaxaren wutu yaqe yi, ti an wa a lawuran farasana kafiini a yi ti tayinnaaxu yi, na a toxo bireene. 19 Yaxaren ga na ɲi xasun ŋa sobintaaxun di, maxa tinko a yi ti an wa a saqanlenmaaxunu. 20 An do an maarenmen yaqen nan maxa saxu, an gaa an du sobindini.

21 « “ Maxa an funtifon yinbidunsadaxi Moleexi yi kuudo an nan maxa an Alla toxon roxo. Nke ya ni Tunka Duumanten ŋa.

22 « “ Maxa saxu do yugo yi, xoyi yaxare. Ken ni fo haraamunten ya. 23 Maxa ri saxu do daaba su yi, an gaa an du sobindini ti ken ŋa. Yaxare su n maxa sigi daaba wure, do a nan kafi. Ken ni fo haraamunten ya.

24 « “ Xa maxa du sobindi ti ku yi, baawo jamo ku beenu in gaa i xatana bakka axa kaane, i da du sobindi ti ku danmon su ya yi. 25 Ken kanma ɲiiɲen sobi, n da a raga ti i yangon ŋa, ɲiiɲe ke xa da i taaxaanon goxi. 26 Axakun kuŋa, xa da in kiitun do farilanun tanga, xa maxa ku fo sobinto kundu fo wo fo dabari, saaridon do mukku yanqanten su kafiini axa yi. 27 Baawo ɲiiɲe ke dunkoonu beenu gaa axa kaane, i da ku fi sobinto kundu su ɲa ya, ɲiiɲen xosi sobi. 28 Axa ga na ɲiiɲe ke sobindi, a nta axa ficana ya xoyi jama ke be ga ɲi axa kaane a ga da a fica moxo be ba ? 29 Baawo sere be ga na ku fi sobinto fo wo fo dabari, an wa booxeene bakka an jaman noxon ŋa. 30 Xa da in farilanun tanga, kuudo ku killi buru beenu gaa ɲaana axa kaane, axa n maxa daga i fo wo fo dabari, axa n maxa daga du sobindi ti i ya. Nke ya ni Tunka Duumanten ŋa, axa Alla. ” »