[Teleŋontaaxu]
19
Tunka Duumanten daali Muusa da nan ti : 2 « Banisirayilaganko jaman danman su diganlenmaaxu nan ti i danŋa : “ Xa ɲa senonto yi, baawo inke Tunka Duumante, n sennen ya ni, axa Alla. 3 Sere su n kanu i ma do i faaba yi, tuumayinkoota, xa na a tanga. Nke ya ni Tunka Duumanten ŋa, axa Alla. 4 Xa maxa axa falle faayi muno xafunun ŋa. Xa maxa sawura su dabari ti mexen ŋa muno yi axa du da. Nke ya ni Tunka Duumanten ŋa, axa Alla.5 « “ Axa ga na ɲi allatiigeyinsadaxa sadaxini inke Tunka Duumante da, axa na a sadaxini moxo be a gaa rageene ya. 6 A yigeene a xurusikoota ya, a do a bitafilla. Xa fo be ga na toxo bita sikkandin ŋa, a buyini yinben ya. 7 A ga na yige bita sikkandi ke yi kuŋa, ken ɲaana fo sobinte ya, ken nta rageene. 8 A yigaana su wa a yangon tiŋana, baawo ke be ga sugandi Tunka Duumanten da, a da ken ya sobindi, ken kaman wa booxeene bakka i xabiilan ŋa.
9 « “ Axa jamaanen sanjangollen biren ŋa, xa maxa an ten raqun fata, xa maxa fo yerenton xa yaara. 10 Maxa an reesengooren su fata, maxa an reesengallen reese yerenton xa yaara ; an na i toqo misikiinun do tuŋaarankon ya da. Nke ya ni Tunka Duumanten ŋa, axa Alla.
11 « “ Xa maxa fayi, xa maxa gaara, xa maxa me nanbara. 12 Xa maxa kuna ti in toxon ŋa gaaren kanma, an nan maxa daga an kaman toxon battaraaxu. Nke ya ni Tunka Duumanten ŋa. 13 Maxa an kapanlenman yiga, maxa a fayi xa. An ma xawa musugume muson toqo du maxa ma yillen ga na n kare. 14 Maxa lungunte diganburu, maxa fo ballu finkinte xa kaane. Kanu an kaman ŋa. Nke ya ni Tunka Duumante.
15 « “ Maxa miileye dabari kiitikutiyen ŋa : maxa misikiinun yaaxon faayi, maxa fogumun xa yaaxon faayi. An na an kapanlenman kiiti ti teleŋontaaxun ŋa. 16 Maxa munaafaxaaxu kille tera an sunpun naxa. Maxa an kapanlenman yonkin toxindi ti gaaren ŋa. Nke ya ni Tunka Duumanten ŋa. 17 Maxa an waaxin xoni ti an sondomen ŋa, xa an na a jalagi ken ke, kuudo an nan maxa yango kita do a batten ŋa. 18 Maxa tanbo tuga an maarenmen ŋa, maxa butte mara katta a yi ; an seri tinken xanu ya du, xoyi an yinme moxo.* Nke ya ni Tunka Duumanten ŋa.
19 « “ Xa da in farilanun tanga. Xa maxa daabannoonu filli jogaadi me yi i ga n nta baana. Maxa soxoodin xabiilanu filli tifi an ten ŋa. Maxa yiraame rondi, a mirinten ga ni ti gaarin xabiilanu filli yi.
20 « “ Yugo nda saxu do tunbaari yaxare yi, yugo tana ya yaqen ga ni, na a ɲi kiina ke ma a maxawasa, a ma a xannen hooro, ken ɲaana yelumaanen ya yi tannu, i nta kalla, baawo yaxare ke ma hoore. 21 Yugo ke do jaxandige ya n xawa dagana genmanlenmaaxuntilliisen raqen ŋa na a ɲa senoyinsadaxan ŋa Tunka Duumanten da. 22 A ga da junuubu ke be dabari, sadaxakiɲandaanan na xafarigeesimuuri a danŋa ti jaxandige ke yi Tunka Duumanten jon me naxa, a junuubun na xafari.
23 « “ Axa ga na ro jamaane ke yi, axa nda yitti renmaana su lori, axa na i yittirenmun raga xo fo sunnantanbali, siino sikki, xa maxa i yiga. 24 Siini naxatandin xa yi, a yittirenmun sugandini ya nan ɲa tiigandifon ŋa Tunka Duumanten da. 25 Siini karandi ke ya ni axa gaa a yittirenmun yigana, axa sanjaanen kugunu ken moxo ya. Nke ya ni Tunka Duumanten ŋa, axa kama.
26 « “ Xa maxa fo wo fo do foren yiga. Xa maxa faayindi, xa maxa dabarindi. 27 Maxa an yinmen nafaadisiyi. Maxa an kankanbaaron siyi. 28 Maxa an faten joogi do furen batten ŋa. Maxa an faten soxo. Nke ya ni Tunka Duumanten ŋa. 29 Maxa an ren yaxaren wara jeeniyen ŋa, an gaa a maxayanqana, ken nan maxa ɲa sababu yi jamaanen gaa roono fillakapen ŋa¤, a gaa xosini fakka ti fi buren ŋa.
30 « “ Xa da in tuumayinkootan tanga, xa na in dingira sennen daro. Nke ya ni Tunka Duumanten ŋa. 31 Maxa furun juura, maxa an falle faayi do jinnagumun ŋa, baawo ken na an sobindini ya. Nke ya ni Tunka Duumanten ŋa, axa kama. 32 Sikkine yintinxullugumen jon ŋa, an nan darondindi seri xasen jon ŋa. An nan kanu an kaman ŋa, nke ya ni Tunka Duumanten ŋa. 33 Mukke nda yanqa an ŋa mukkaaxun ŋa an jamaanen noxo, maxa a nanbara. 34 Xa an na a raga xo saarido, an na a xenu xa xoyi an yinme moxo, baawo axakun yinmenu ɲi mukkaaxun ya yi Misira jamaanen ŋa. Nke ya ni Tunka Duumanten ŋa, axa kanma.
35 « “ Xensendun kiitun noxon ŋa, maxa nanbara kittirasetundi, xensendun noxo : muudu, a do meetaranu. 36 Miiju tinmanten nan ɲi axa maxa a do xensendigidi tinmanto, a do muudu tinmanten do meetara tinmante. Nke ya ni Tunka Duumanten ŋa, axa Alla ke be ga da axa bagandi Misira ɲiiɲen ŋa. 37 Xa da in kiitun do in farilan su tanga. Nke ya ni Tunka Duumanten ŋa. ” »