[Fi haraamunto]
20
Tunka Duumanten da sefen teŋandi Muusa yi ti : 2 « An na ti Banisirayilaganko da, sere wo sere Banisirayilaganken ya ga ni, ma mukke ya ga ni, a gaa Banisirayila jamaanen ŋa, a nda i renmen yinbidunsadaxi Moleexi yi, a kaman nan kara, jaman na a gididunwara. 3 Nke yinme wa taŋeene a kaman ŋa, na a booxo bakka i xabiilan ŋa na a sababun ɲa a ga da i renmen kini Moleexi yi, ken ga ɲa sababu yi na in dingira sennen sobindi, na in toxo sennen xa bonondi. 4 Sere be ga na i renmen kini Moleexi yi xa, jaman ga na i yaaxon texe, i ga ma a kaman kari, 5 nke yinme na taŋe a kaman do i kaadunkon su yi, na i booxo bakka jaman ŋa, aken do sere su do Moleexi ga da me kapanlenmaaxu.6 « Na furun juura, ken do jinnagumaaxu, sere wo sere ga na fillakafi¤ ti kun ŋa, n wa gilli a kaman xanne maxa, na a booxo bakka i xabiilan ŋa. 7 Xa da du senondi, ma axa na seno, baawo inke ya ni Tunka Duumanten ŋa, axa Alla. 8 Xa da in farilanun tanga, axa na i batu. Nke ya ni Tunka Duumante, n gaa axa senondini.
9 « Ken moxo baane ya ni : sere be ga na i ma langa, walla xa i faaba, a kaman nan kara. A foren haqen na a yinme ya yi, baawo a da i ma do i faaba langa.
10 « Sere be ga na saxu do wandi yaqen ŋa, ken kaman do yaxare ke su nan kara. 11 Sere be do i faaba yaqen ga na saxu, an da an faaba duuron wari, yugo ke do yaxare ke su nan kara, i foron haqen na i yinmenu ya yi. 12 Sere be do i ren yugon yaqen ga na saxu, i sero filli su nan kara, i foron haqen na i yinmenu ya yi, baawo i da ɲanbalin ya ɲa.
13 « Yugu filli nda me saqanlenmaaxu xo yugo do yaxare, i filli su nan kara. I foron haqen na i yinmenu ya yi, baawo i da fo haraamunten ya dabari.
14 « Sere su ga na yaxaren do i renmen wuttu, yugo ke do yaxaru ku filli su nan buyi, baawo ken ni yaagudunloxaaxu ya, a na waase duumene axa noxon ŋa.
15 « Yugo be ga na saxu do daaba yi, a kaman nan kara, axa na daaba ke xa kari. 16 Yaxare be ga na daaba kapanlenmaaxu, a kaman nan kara, axa na ken daaba xa kari. I foron haqen na i yinmenu ya yi.
17 « Yugo be do yaxare gaa saaxa baane, ma i ga faaba baane, a ga na a wutu, i ga da me duurun wari, ken ni yaagu xooren ya, i wa xateene bakka i jaman ŋa be su jon ŋa. A ga da i gidan yaxare ke duuron wari, ken saabu da, yugon ya na a yangon wutu. 18 Yugo ga na kiɲe yaxare yi a gaa laadan ŋa, na a saqanlenmaaxu, a da yaxare ke hayiba ti i foren boguran farasanden ŋa. Yaxare ke xa yinme da i foren boguran farasa na du hayiba, i filli su wa xateene bakka i xabiilan ŋa. 19 Maxa an ma gidanyaxaren lawuran farasa, maxa an faaba gidanyaxaren lawuran farasa, ken ŋa, an do ke be gaa fori baanen ŋa, an da ken ya lawuran farasa, axa su ya na ken yangon tiŋana. 20 Sere ga na saxu do i faaba waaxin yaqen ŋa, an da an faaba waaxin hayiba, axa filli su wa ken yango tiŋana, axa wa kalla boroku yi. 21 Yugo be gaa i waaxin yaqen wuttu, ken ni laxosontaaxun ya. A na i waaxin hayibeyen ya bagandini. I ɲaana rentanŋun ya.
22 « Xa da in farilanun su do in kiitun su tanga, xa nan golli ti i su yi, kuudo in ga da axa riiti jamaane ke be yi, a n maxa axa goxi. N da axa riiti ti axa n taaxu a yi ya. 23 N gaa ke jama be xatana gilli axa kaane, xa maxa i laadanun batu, baawo i da ke su ya dabari in ga tunboguntaaxu ti i ya. 24 N da a koni axa da : axa ya na i ɲiiɲe ke xayene. Nke yinme xa ya na a kinni axa yi taqe, jamaane be xattin do tamarileeman waranlaqen gaa a yi. Nke ya ni Tunka Duumanten ŋa, axa kama, ke be ga da axa sugandi bakka jamon naxa. 25 Axa na daaba sennen do fo sobinten naxan fata bakka me yi, a do yelin sobinten do fo sennen naxa, kuudo axa n maxa kabanden ro du kanma ti ku daabanu do ku yeliŋu yi, ken do fo wo fo gaa xiilini ɲiiɲen ŋa, n ga da ku beenu xerexere kuudo axa na i raga fo sobinto yi. 26 Xa ɲaŋi in da fo sennu yi, baawo inke Tunka Duumante, n sennen ya ni. N da axa xerexere bakka jamon naxa, kuudo axa na ɲaŋi in xallu yi.
27 « Yugo walla yaxare ga na furun juura, ma nan jinnagumaaxu, i gididunwareene ya, i na i kari ; i foron haqen na i yinmenu ya yi. »