[Sadaxakiɲandaanon senoye]
21
Tunka Duumanten daali Muusa da : « A ko sadaxakiɲandaanon danŋa, Haaruna renmu ku, nan ti i danŋa i n maxa du sobindi ti i maaren furun meemenden ŋa, 2 ma a ganta i seri tinki-tinken de, xoyi saaxe, ma faabe, a do ren yugon do ren yaxare, do gidanyugo. 3 A gidanyaxarin xuso xa, burutinke ga ni, ke be ga nta yugo maxa, a ra wa du sobindini ti ken xa furen ŋa. 4 Sadaxakiɲandaanan¤ ni yinmanken ya yi i jaman noxo, a n maxa du sobindi kuŋa. 5 I n maxa i yinmun nafaadisiyi, i n maxa i kankanbaaron siyi, i n maxa i faton joogi-joogi.6 « I n ɲa senoyenmu yi katta i kaman ŋa, i n maxa i kaman toxon mexendi, baawo ikun ya ni Tunka Duumanten yinbidunsadaxan dabarini, i kaman faafo. I n xawa senoono ya. 7 Yaxarin jeenaana, ma toxo bononte, i nta ken wuttu. Yaxarin warante, i nta ken xa wuttu, baawo sadaxakiɲandaanan sennen ya ni katta i kaman ŋa. 8 An na a raga fo senne yi, baawo a na an kaman ya faafon kiɲandini a yi, ken nan xawa senoono an maxa yi ya, baawo inke sennen ya ni, nke ya ni Tunka Duumanten ŋa in gaa axa senondini. 9 Sadaxakiɲandaanan ren yaxaren ga na jeeni na du mexendi, a da i faaba xa mexendi. Ken buyiini ti yinben ya yi.
10 « Sadaxakiɲandaananyinmanke be ten ga joxi a yinmen ŋa na a daari, a sigan ga ro a kitten ŋa kuudo a na sadaxakiɲandiyiraamun rondi, ken nta i yinmen jaxafitanten toqo, a nta i yiraamun booxono xa nan ti i suno. 11 A nta dagana katta yonki fure yi. Hari a ma do a faaba, a n maxa du sobindi, 12 kuudo a n maxa i kaman dingira sennen sobindi, a n maxa bogu dingira sennen ŋa, baawo a kaman sugandinditen ya daarinte na a yi. Nke ya ni Tunka Duumante. 13 Ayiwa a na yaxarin xuson ya wuttu yaqe. 14 Fo be ga ni xo wundunbaare, yaxarin warante, yaxarin toxo bononte, jeenaana, a nta ku kundu wuttu, ganta a na i yinme fonlaqen xusu fonnanxaye ya wuttu. 15 Ken moxo yi a nta i funtifoonun mexendini. Nke ya ni Tunka Duumanten ŋa, a senondindaana. »
16 Tunka Duumanten daali Muusa da nan ti : 17 « A ko Haaruna da ti : “ An si wo si, leebun gaa a yi, a n maxa tinko ti i wa i kaman faafon sadaxini. 18 Sere wo sere, leebun ya gaa a yi, finkinte ya ga ni, jogooninte ya ga ni, ma woroomen gaa giyan ŋa, walla xa suufu kontonte, a kaman ma xawa tinkoono. 19 Ma sere be ga ɲa ta baanen ya, walla xa kitti baane, 20 walla xoxomagume, a do xooɲo-xooɲonte, ma yaaxanwatte gaa sere be yi, ken do banboroso, ma xaba, a do xaban karante, 21 sere su leebun ya gaa a yi sadaxakiɲandaana Haaruna bonsonŋen ga ni, a nta tinkoono ti i wa yinbidunsadaxa sadaxindini Tunka Duumanten da na leebun toxo a yi. A nta tinkoono ti i wa i kaman faafon sadaxini. 22 Xa ganta a ra wa i kaman Alla faafu sennen yigana, ken do fo sennun fo senne. 23 A nta kiɲeene yirankutaade ke ya yi, a nta tinkoono sadaxindinoqu ke xa yi, a gaa in dingira sennen mexendini, baawo leebun ya ni a yi. Nke ya ni Tunka Duumanten ŋa, i senondindaana. ” »
24 Ke moxo ya ni annabi Muusa ga digaamu katta Haaruna do i renmun do Banisirayilaganko danman su yi.