[Sadaxanun senoye]
22
Tunka Duumanten daali Muusa da nan ti : 2 « Haaruna do i renmun diganlenmaaxu, ti i na du tanga bakka Banisirayilaganko sadaxa sennu be i gaa i xerexerene in da, kuudo i n maxa in toxo sennen mexendi. Nke ya ni Tunka Duumanten ŋa. 3 An na a koni i da, Banisirayilaganko ga na sadaxa be xerexere Tunka Duumanten da, sadaxakiɲandaanon soxoodin muuman si wo si ga na tinko ken fo senne yi na a ɲi a kaman mexenten ya ni, xoyi sariyan ga da a ko moxo be, a wa xateene bakka in jon me naxa. Nke ya ni Tunka Duumanten ŋa.4 « Sere wo sere ga ni Haaruna soxoodin ya, fatanwatten ya gaa a yi, ma yugunwatte, a ma xawa sadaxa sennun yigana, ma a ga na seno. Furen ga da sere wo sere xa sobindi, i be nda kati ken xa yi, ma sere be manin gaa bakka a yi, 5 walla xa sere ga na kati tagefo sobinte danbe su yi, ke be gaa an sobindini, ma haadamarenme, ken gaa an sobindini, a ga ɲa sobindimoxo su yi keeta, 6 an ga na kati a yi, an sobinten ya n toqo ma futuro. An nta sadaxa sennu ku yigana, ma an ga na an faten wanqi ti jin ŋa bire be. 7 Kiyen ga na samu, an xa seno. Ken falle ya ni, an na katu fo sennu ku yigana, baawo an faafon ya ni. 8 An nan maxa jiiba yiga, do fonyaatun ga da fo be kari, kun na an sobindini ya. Nke ya ni Tunka Duumanten ŋa. 9 Sadaxakiɲandaanon na in tangefon tanga, kuudo i n maxa daga yango tiŋa ti a yi, i gaa kalla. Nke ya ni Tunka Duumante, i senondindaana.
10 « Seri tana su nta sadaxa senne ke yigana. Seranmalla, sadaxakiɲandaanan mukke, do a suruga, i nta fo senne ke yigana. 11 Xa ganta, sadaxakiɲandaanan ga na i xaalisin ɲa na komo be xobo, ken do ku beenu ga saare an kan noxon ŋa, kun ra wa a naxafan yigana. 12 Sadaxakiɲandaanan ren yaxare be ga na yaxi sere kundun ŋa, ken xa nta sadaxa wutunta sennu ku yigana. 13 Sadaxakiɲandaanan ren yaxare be ga wundunbaaraaxu, ken do a ga ware, renme ga nta a maxa, a ga taaxu i faabankan ŋa, xoyi a yaxannaaxun bire, ken wa i faaba yiganden yigana. Xa sere kundu su nta a yigana.
14 « Sere nda samu na fo senne ke yiga, a kaman wa fo senne ke taxandi karagan kapa a yi, na a do a kini sadaxakiɲandaanan ŋa. 15 Banisirayilaganko gaa sadaxa senne ke be wuttu Tunka Duumanten da, sadaxakiɲandaanon nan maxa a mexendi. 16 I sobinton ga na sadaxa senne ke yiga xa, i wa Banisirayilaganko tiŋandini ti junuubun ŋa, a na xafarigeesimuuri i da, baawo inke ya ni Tunka Duumanten ŋa, i senondindaana. »
17 Tunka Duumanten daali Muusa da nan ti : 18 « Digaamu Haaruna do i renmun do Banisirayilaganko danman su da, nan ti i da : “ Sere wo sere ga ni Isirayila kaadunken ya, kafiini mukke yi ken taaxunten gaa Isirayila, a kaman ga na ɲi tekke ma walla xa yonkiliŋunsadaxa yinbidunsadaxini Tunka Duumanten da, 19 a gaa a mulla a nan rage, nan ya ga ni ma jaxen ya ga ni, ma walla xa sugo, a nan ɲa yugon ya yi, leebu su ga nta a yi. 20 Hayibeyen gaa fo wo fo yi, xa maxa ken sadaxi, baawo ken nta rageene axa da. 21 Sere be nda ɲi allatiigeyinsadaxa bagandini Tunka Duumanten da tekke yi, ma yonkiliŋunsadaxa, nan ya ga ni, ma tanmise, a kaman gaa a mulla a n rage, a nan ɲa fo sahanten ya, leebu su ga nta a yi. 22 Finkinte, xotti xosonte, jooginte, ken do fiite do buruxo, ma fatanburubulle gaa fo be yi, xa maxa ku ɲa sadaxa yi Tunka Duumanten da. Xa maxa i ɲa yinbidunsadaxa yi Tunka Duumanten da sadaxaxurumindifon kanma yi. 23 Gunbo ma tanmise be suufun kontonten ga ni, ma a fuumunten ga ni, ken ra wa ɲaana yonkiliŋunsadaxa yi, xa a nta rageene tekke yi. 24 Xa maxa xaban segente ɲa sadaxa yi Tunka Duumanten da, a do xaban tapinte, fo muusante walla xa fo booxonte. Xa maxa ken ɲa axa jamaanen ŋa. 25 Xa maxa ku fo koninto fo wo fo xobo mukkunlenme yi na a ɲa sadaxanfaafo yi axa kaman da, baawo i do i bonon ya ni. Leebun ya ni i ya, a nta i ragana axa da. ” »
26 Tunka Duumanten daali Muusa da nan ti : 27 « Nanlenme, ma jaxanlenme, walla xa sugunlenme, i nda saare, i wa bito ɲeri ɲaana i maanu wure. Na a wutu bita segundin ŋa, a yinbidunsadaxan wa rageene Tunka Duumanten da. 28 Na ma walla xa jaxe, maxa ken do i renmen xurusi in da koota baane. 29 Xa ga na ɲi xurusindifo xurusini allatiigeyinsadaxa yi Tunka Duumanten da, xa na a xurusi moxo be a gaa rageene axa da. 30 Axa na a yigana ken koota yinme su ya yi. A kutte n maxa toxo ma suxuba. Nke ya ni Tunka Duumante.
31 « Xa da in ɲaamarindixannun tanga, xa na i golli, nke ya ni Tunka Duumante. 32 Xa maxa in toxo sennen mexendi, kuudo in senontaaxun nan bange Banisirayilaganko maxa. Nke ya ni Tunka Duumanten ŋa, axa senondindaana, 33 ke be ga da axa bagandi Misira ɲiiɲen ŋa, nan ɲaŋi axa da kamane yi. Nke ya ni Tunka Duumanten ŋa. »