[Tunka Duumanten sallu]
23
Tunka Duumanten daali Muusa da nan ti : 2 « An na a ko Banisirayilaganko da ti : Tunka Duumanten salli xooro be axa gaa meɲiyi xerexerenton xilli, i faayi :[Tuumayinkoota]
3 « Bito tunmi noxo, an wa gollini ; bita ɲerundin ni sibitin ya, tuumayinkoota, a do meɲikoota senne, xa maxa golle su ɲa, sibitin ya ni, ken ni Tunka Duumanten ya xalle yi axa taaxuranun su yi.
[Pesaxansalle]
4 « Ku ya ni Tunka Duumanten salli sennun ŋa, ku beenu axa gaa gangundini i waxatin ŋa. 5 Xason tanmun do naxaton koota, xasu fana, na a wutu futuron ŋa, ken ni Pesaxansallen ya yi Tunka Duumanten da. 6 Ke xaso tanmun do karagon koota, buuru lewiirintanŋen sallen yan jopeene Tunka Duumanten da : xa na buuru buukuntanbalin yigana bito ɲeri. 7 Bita fanan ŋa, xa wa meɲiyi senne dabarini : xa maxa laadangolle su dabari. 8 Axa wa yinbidunsadaxan sadaxini Tunka Duumanten da ku bito ɲeri ; bita ɲerundi ke, axa wa kafundo sennen gansini. Xa maxa laadangolle su dabari. »
[Fateyifanon salle]
9 Tunka Duumanten daali Muusa da nan ti : 10 « An na a ko Banisirayilaganko da nan ti : “ N ga da ke jamaane be kini axa yi, axa ga na ro bire be, axa ga da a fateyifano fata, xa na fateyifano ku deni katta sadaxakiɲandaanan ŋa. 11 Sadaxakiɲandaana ke na a yigi-yigi Tunka Duumanten jon me naxa, kuudo in na duŋe ti a yi. Sibitinkootan yillakaran ya ni sadaxakiɲandaana ke gaa a yigi-yigini. 12 Fatefoonu ku yigi-yigikoota, xa na jaxandiginlenme ɲa sadaxa xuruminten ŋa Tunka Duumanten da, ke be gaa i siinen ŋa, leebu ga nta a yi, 13 kafiini soxofonsadaxan ŋa, kilonu tunmi jura mullu-mulle xootinte ti ten ŋa, yinbidunsadaxa yi Tunka Duumanten da, timiliŋen ya ni, ken do xonsin liitara baane. 14 Buuru, do yilli kurunba, ken do tegense, xa maxa i yiga saado axa gaa fateyifanon sadaxini Tunka Duumanten da koota be yi. Ke ni farila duumanten ya yi axa bonsonŋun su kanma axa ga na ɲi duna noxon su yi.
15 « “ Xa na koyu ɲeri tinmanten jaate, na a wutu Sibitinkoota ke bita fillan ŋa, ken ga ni koota be axa do fatefo yigi-yiginto ku ga ri, 16 ma koyi ɲerundi ke yillakara. Axa na tankarage bito jaate, na fatefo kurunbo ku sadaxa juruminten bagandi Tunka Duumanten da. 17 Axa taaxunton gaa dingira su yi, xa do buurun na daga do du yi, sadaxa yigi-yiginten xanne maxa, ken ni buuru yinmu filli ya, baane su muudu filli fari jura mullu-mulle, a do lewiirin ya n n katiini xa. Ken ni fateyifanon sadaxan ya Tunka Duumanten da. 18 Ken do buurun ya n sadaxini doome. Siini baanan jaxanlenmu ɲeri, i tinmanto ga ni, ken do nanlen baane, gunbo ga ni, kafiini jaxandigu filli, kun ɲaana sadaxa xuruminten ya yi Tunka Duumanten da. Kafiini i soxofonsadaxan do i sadaxanjiinu be gaa kafiini i ya. Yinbidunsadaxan ya ni, kana liŋen ya ni Tunka Duumanten da. 19 Xa na sugundigi baane ɲa futuxiyinsadaxan ŋa, a do jaxandigu filli, siini baananlenmu, kun na ɲa allatiigeyinsadaxan ŋa. 20 Sadaxakiɲandaanan na i do fatefo fanon buurun yigiyigini ya, a na i yigi-yigi Tunka Duumanten jon me naxa kafiini jaxandiginlenmu ku filli yi. A ɲaana fo sennen ya yi Tunka Duumanten da, kiniini sadaxakiɲandaanan ŋa. 21 Xa wa me ɲiini ken koota baananne yi, meɲiyi sugandinte yi. Xa maxa laadangolle su dabari. Axa taaxunton gaa noqu su yi, ke ni abadanfarilan ya yi axa do axa bonsonŋun su kanma. 22 Axa jamaanen sanjaanen waxati, axa ga na ɲi sanjangollen ŋa, maxa an ten raqun fata, maxa fo yerente xa sagara. An na ku toqo non ŋa ya. Misikiinun do mukkunun ya fo ni. Nke ya ni Tunka Duumante, axa Alla. ” »
[Xafarigeesimuurikoota]
23 Tunka Duumanten daali Muusa da nan ti : 24 « An na a ko Banisirayilaganko da nan ti : “ Xasu ɲerundi ke fanan ɲaana axa da tuumayinkootan ya, sinmaado ya ni do buututinmixannun ŋa, a do meɲiyi sugandinte. 25 Xa maxa laadangolle su dabari. Xa na yinbidunsadaxan bagandi Tunka Duumanten da. ” »
26 Tunka Duumanten daali Muusa da nan ti : 27 « Xasu ɲerundi ke tanmun ke, ken koota ni xafarigeesimuuriyen ya, meɲiyi sugandinten ya ni axa da, xa wa axa du maxayanqana, na yinbidunsadaxan sadaxi Tunka Duumanten da. 28 Gollen ken fo wo fo, xa maxa a dabari, baawo ken koota kundu ni xafarigeesimuurikootan ya kuudo nan xafarindi axa du da Tunka Duumanten jon me naxa, axa Alla. 29 Yonki wo yonki ga ma i du maxayanqa ke koota kundu yi, a kaman wa kutiini bakka i seron ŋa. 30 Yonki xa su ga na golle fo wo fo dabari ke koota kundu yi, n wa a kaman buruxana bakka i seron noxo. 31 Gollen fo wo fo, xa maxa a dabari, axa gaa noqu su yi, ke ni abadanfarilan ya yi axa bonsonŋun da. 32 Ke ni tuumakoota xooren ya yi axa da, xa wa du maxayanqana. Xason kabun ŋa futuron bire, gelli futuro ma a men futuro xa na axa tuumakootan tuuma. »
[Biirun salle]
33 Tunka Duumanten daali Muusa da nan ti : 34 « A ko Banisirayilaganko da nan ti : “ Ke xasu ɲerundi tanmun do karagon koota, ken ni gupun sallen ya yi Tunka duumanten da bito ɲeri. 35 Koota fanan ŋa meɲiyi sugandinten ya ni, laadangolle su xa maxa a dabari. 36 Xa na yinbidunsadaxan bagandi Tunka Duumanten da bito ɲeri. Bita segundin ni meɲiyi sugandinten ya, ken wa ɲaana axa da yinbidunsadaxon bagandinden ŋa Tunka Duumanten da, ken ni meɲiyi xoore yi. Xa maxa laadangolle su dabari. 37 Ku ya ni Tunka Duumanten sallun ŋa, axa gaa meɲiyi sugandinton gangunu ku beenu yi, kuudo na yinbidunsadaxan bagandi Tunka Duumanten da : a sadaxa xuruminten do a soxofonsadaxa, kafiini a xurusindun do a xonsi, fo be ga n xawa ɲaana koota su yi. 38 Kun do Tunka Duumanten tuumayinkooton sadaxon nta baana, i do axa kuyun nta baana, i do axa tekku nta baana, naafilanu beenu su axa gaa kinni Tunka Duumanten ŋa, i do ku xa nta baana.
39 « “ Xasu ɲerundi ke tanmun do karago, xa ga na sanjanfoonun kafume yi, axa na sallen salli Tunka Duumanten da, bito ɲeri. A koota fanan ni tuumakoota ya, a bita segundin xa ni tuumakoota ya. 40 Koota fanan ŋa, xa na yittirenmun fo sirun wutu du da, tamarikittu, yittikingi nirinto, a do waranlaqun yittu. Xa na ɲaxa Tunka Duumanten hadariyen ŋa bito ɲeri, axa Alla. 41 Xa wa ke salle sallini Tunka Duumanten da bito ɲeri siine su. Ken ni abadanfarilan ya axa bonsonŋun kanma xasu ɲerundin ŋa. 42 Xa na fode gupun ŋa bito ɲeri. Saarido su gaa Isirayila, a wa fodene gupun ŋa. 43 Ken maanan ni : axa bonsonŋun na a tu nan ti in gaa Banisirayilaganko bagandini Misira ɲiiɲen ŋa bire be, in da i fodandini gupun ŋa. Nke ya ni Tunka Duumanten ŋa, axa Alla. ” »
44 Annabi Muusa kuŋa, a da sallu ku moxon ko Banisirayilaganko da ke moxo yi.