[Jayituunante laabante do buuru senne]
24
Tunka Duumanten daali Muusa da nan ti : 2 « Banisirayilaganko ɲaamari, i na jayituunanten riiti katta an ŋa, a tetunten laabante, kuudo nan duume fitillun kunmu 3 seedaaxun waxanden yirankutaaden sellan ŋa, gemmanlenmaaxun tilliisen noxo. Haaruna na i meerabatundi Tunka Duumanten jon me naxa, gelli futuro ma suxuba, fi duumante ya ni, abadanfarilan ya ni axa bonsonŋun kanma. 4 Fitillinxari senne ke kanma, a na duume kumo ku meerabatundi me yi Tunka Duumanten jon me naxa.5 « An na fari jura mullu-mullen wutu, na buuru yinmu tanmi do fillo katu, yin baane su nan ɲa muudu filli. 6 An na i tereme Taabali sennen kanma yi Tunka Duumanten jon me naxa, kacu filli, tunmu tunmu. 7 An na lubaaninfutaadi sennen ro kace su kanma, ken na ɲa sinmefo yi buuru ke kanma yi. Yinbidunsadaxan ya ni Tunka Duumanten da. 8 Abada-abada ya ni i gaa i saxundini Tunka Duumanten jon me naxa, tuumayinkoota su ya ni. Abadantafunden ya ni ken ŋa Banisirayilaganko kanma. 9 Ken na ɲa Haaruna do i renmun taqen ŋa. I na a yigana dingira sennen ya yi, baawo ken ni Haarunanu da fo sennun fo sennen ya bakka Tunka Duumanten yinbidunsadaxon ŋa. Ken ni abadantafunden ya. »
[Binbaganden sariya]
10 Banisirayilagankayaxarin renme yogo bogu roono Banisirayilaganko daaxan ŋa, a faaba ni Misiranken ya. A do Banisirayilaganka yugo yogo xosi gaja. 11 Banisirayilagankayaxarin renme ke da Tunka Duumanten toxon battaranko ti diganburun ŋa. I do a xosi daga katta Muusa yi. Fooyaxarin renme ke ma toxon ni Selumata, Diibiri renyaxaren ya ni bakka Daani fonlaqen ŋa. 12 I da a kaso noqu yi, saado Tunka Duumanten daalen gaa riini i ya. 13 Tunka Duumanten daali Muusa da kuŋa nan ti : 14 « Xa da battaransefekonnaana ke bagandi daaxan falle ; ku beenu su ga da a mugu, i na i kittun saxu a yinmen ŋa, jama ke su na a gididunwara. 15 An na a ko Banisirayilaganko da ti : “ Sere wo sere ga na i Alla battaraaxu, a kaman wa i yangon tiŋana. 16 Na Tunka Duumanten toxon battaraaxu, ken ni kallen ya, a kaman kalla ya. Banisirayilaganko jaman danman su ya na a kaman gididunwalla. Ken ga na ɲa mukken ya ma saaridon ya ga ni, a kalla ti Alla toxo ke battarankonnen sababun ya yi. ”
17 « Haadamaren yonkinte su, sere ga na a katu na a kari, a kaman xa kalla ya. 18 Na daaba biranten katu na a kari, a tugeene daaba yonki ti daaba yonki ya. 19 Sere nda i kapanlenman leebu, a ga da a ɲa moxo ke be yi de, ken ya n ɲaana a xa yi : 20 xoseye tugeene ti xoseye ya, yaaxe ti yaaxe, kanbe ti kanbe ; a ga da leebu ke be ɲa sere ke yi de, ken me ya n ɲaana a xa yi*. 21 An ga na daaban kari, an na a tugana ya ; an ga na seren kari, an kalla ya. 22 Kiiten ɲaana baane ya yi axa maxa, ken ɲaana mukken do saaridon su ya yi, baawo inke ya ni Tunka Duumanten ŋa, axa Alla. »
23 Muusa jaabi ti ken ŋa Banisirayilaganko da. I da battaransefekoŋnaana ke bagandi katta daaxan falle, na a gididunwara ti gidinlenmun ŋa. Tunka Duumanten ga da Muusa ɲaamari moxo ke be yi, Banisirayilaganko da ken ya dabari.