[Ɲiiɲen Tuumayinsiine]
25
Tunka Duumanten daali Muusa da Tuurisiina giden kanma yi : 2 « A ko Banisirayilaganko da nan ti : “ N gaa ɲiiɲe ke be kinni axa yi, axa ga na ro bire be, xa na ɲiiɲe ke tuumandi. Ken tuumandinde nan ɲa Tunka Duumanten ya da. 3 An ra wa an soxanteenun soxono siino tunmi, na an reesengoorun betu siino tunmi, na i fatefoonun kafume yi. 4 Xa siini ɲerundi ke kuŋa, ɲiiɲen tuumasiinen ya ni, ken tuumeye ɲaana Tunka Duumanten ya da. An nta an ten soxono, an nta an reesengooren betunu. 5 Maxa bana duranfata. Reesetinŋe be ga ma beti, maxa a renmen duranfata. Ken ɲaana ɲiiɲen tuumandisiinen ya. 6 Biraado be gaa kiteene ɲiiɲen tuumandisiinen ŋa, axa yinmenu ya fo ni, axa do axa komon do axa tunbaaru, axa surugo, kafiini axa mukkunun do axa taaxamexo be gaa do axa yi. 7 An daabanun xa be ga ni, a do gundufoonu beenu gaa an gunnen ŋa, kun kiteyu su na ɲaŋi i da yigande.[Maxawaseyen siine]
8 « “ An na siino ɲeri ɲeri jaate taanu ɲeri, ken wa genme tannaxate do siino kabi. 9 Xasu ɲerundin tanmun ŋa, Xafarigeesimuurikoota, axa wa jaxandigibennen buutun tinmi do axa ɲiiɲen noxon su yi. 10 Axa wa siina tankaragandin sugandini, na xannun hooraaxuyen xa gangu do jamaanen ŋa ɲiiɲe ke taaxaanon su da : ken ɲaana maxawaseyinsiinen ya yi axa da : axa na sere su xalli kutiyen saagandi katta a yi, be su xannen na hoore, nan saage katta i sunpun ŋa. 11 Xa na siina tankaragandi ke sugandini ya na a ɲa maxawaseyinsiine. Axa nta soxono, axa nta bana duranfatana, reesetinŋe be ga ma betu, xa nta a konbon duranfatana. 12 Baawo maxawaseyinsiinen ya ga ni, ken ɲaana fo sugandinten ya yi axa da, axa bireene ti ɲiiɲe ke funtifoonun ya yi. 13 Ke maxawaseyinsiine yi, sere su wa saageene katta i kutiyen ŋa.
14 « “ An ga na ɲiiɲe gaaga an kapanlenman ŋa wo, ma an kitten ga na ɲiiɲe xobo a maxa wo, sere su n maxa i waaxin nanbara. 15 An do an kapanlenman ga xobe me yi, ma axa ga gaage me yi bire ke be, an na kun siino ya jaatene maxawaseyinsiinen dangi falle. Siinanjaatu be ga toxo axa do maxawaseyinsiini riye sanjaanen naxa, axa na ken ya jaaten ragana xoben gaa ɲaana ti a yi. 16 Jonkon gaboono ti siinon gaboyen lanɲaran ya. Siinon roxoyen ya na jonkon xa roxondini, baawo a na a gaagana an ŋa ti sanjaanu ku jaaten lanɲaran ya. 17 Sere n maxa i kapanlenman nanbara, kanu an kaman ŋa ya yinme. Nke ya ni Tunka Duumanten ŋa, axa Alla.
18 « “ Xa da in farilanun golli, xa na in kiitun tanga. Axa ga na i tanga, axa na taaxu ɲiiɲe ke yi tangeyen noxo. 19 Ɲiiɲen na i funtifoonun kini, axa na yige nan fogu, axa na taaxu jamaane ke yi tangeyen noxo. 20 Selli axa ga na ti kuŋa : ‘ O ga ma soxo siini ɲerundi ke yi, o ga ma o kittu kafume yi sanjaanen ŋa, o na man yigana ? ’, 21 n wa siini tunmundi ke barekindini, a na ɲa siinosikkinsanjaanen ŋa. 22 Axa ga na soxo siini segundin ŋa, axa na kitayi kiitu ku ya yigana ma siini kabundin ŋa. O do siini kabundi ke sanjaanen gaa kiɲeene, axa na ken fo kiite ya yigana.
[Ɲiiɲen maxawasande]
23 « “ Ɲiiɲen nta abadangaageene, baawo inke ya fo ni ɲiiɲen ŋa, axakun ni mukkunun ya, taaxaanon ya ni axa yi in noqu. 24 Ɲiiɲe su gaa axa xallaaxun ŋa, xa na sariya taaxundi a kanma, kuudo i kamannu na katu i maxawasana katta i du yi. 25 An waaxin ga na misikiinaaxu, a xa da i ɲiiɲen gaaga xa, a waaxi tinken ya n riini a fo gaagante ke maxawasa. 26 Waaxi tinken ga nta sere be yi, a me wa du a yinme na fo kita i kitten ŋa na i ɲiiɲe ke maxawasa. 27 An na xoben siinon jaate, na jonkon kutten saaga sere ke be an ga da ɲiiɲe ke xobo a yi, an ɲiiɲen na saage katta an ŋa. 28 Selli an ga ma fo kita an kitten ŋa na a saaga du yi, an fo xobonte ke na toxo xobanlenma ke kitten ŋa ma maxawaseyinsiinen ŋa, a na saage katta an ŋa.
29 « “ Sere ga na ka gaaga, a taaxunten gaa tageyinbinne noxon debe yi, a maxawaseyen daganten ya ni, na a wutu a xoben koota, ma a siinen ga na n tinme. 30 Ayiwa selli a ga ma maxawase ma siinen muuman gaa tinmeene, a ntaxa bakka xobaana ke do i bonsonŋun xallaaxun ŋa, a nta maxawaseene maxawaseyinsiinen xa yi. 31 Xa deben kaanu be ga nta tageyinbinnen noxon ŋa, kun jaateene xo jamaanen gunnen ya, ken maxawaseene ya, maxawaseyinsiinen ŋa, ken ka wa bakka. 32 Ganta kaanu be gaa Leewikaarankon kun maxa i yinmenu debun noxon ŋa, ikun ra wa i maxawasana waxati su. 33 I be nda giri nan daga ka tereme Leewikaarankon foyaaxun gaa debu beenu kanma, maxawaseyinsiinen ŋa, a saageene ya, baawo Leewikaarankon ya duran fo ni ken ŋa Banisirayilagankon naxa. 34 Fo be ga ni xoyi i soxanteenun ŋa i kaanun kaaran xa yi, kun nta gaageene, baawo i abadantaqen ya ni ken ŋa.
[Banisirayilaganka misikiinen maxawasande]
35 « “ An do an maarenmen gaa taaxe yi, a kitten ga lanpu, an na a deema, a na bire do an batten ŋa xo xaliifa. 36 Maxa a goroxo, maxa a yiga. Kanu an Alla yi tannu, an waaxi ke na bire do an ŋa. 37 Maxa an xaalisin kini a yi ti goroxon ŋa, maxa an yiganden do tonon yigandi a yi. 38 Nke ya ni Tunka Duumanten ŋa, ke be ga da axa bagandi Misira ɲiiɲen ŋa, na Kanaana ɲiiɲen kini axa yi, nan ɲaŋi axa kaman ŋa.
39 « “ An maarenme ga na korintaaxu, a ga ri i du gaaga an ŋa, maxa a komonraga na a komongolliɲaŋundi xo kome. 40 An na a ragana xo musungolliɲaŋaana ya, na a raga xo suruga, a na golli do an batten ŋa ma maxawaseyinsiine. 41 Maxawaseyinsiinen ŋa, a na bogu an noqun ŋa nan daga i sunpun ŋa, a do i renmu, a na saage katta i xabiilan do i faabanɲiiɲen ŋa. 42 Nke ya komo ni i ya, n ga da i bagandi Misira ɲiiɲen ŋa. I nta komongaageene. 43 Maxa marandinxotaaxu ti a yi, kanu an Alla yi.
44 « “ Xabiilan tananu beenu gaa axa fonkaaron ŋa, an na an komon do an tunbaaru xobono bakka kun ya yi. 45 Mukke xa be yanqanten gaa an ŋa, an wa i renmun xobono, ken do i dunkoonu beenu gaa bireene do an ŋa an ɲiiɲen kanma, kun xa ga da renmu beenu saara axa nen ŋa, axa wa kun xa foyaaxunu. 46 I wa ɲaana xayen ŋa nan mare axa renmun xa yi axa falle, i na i foyaaxu, na i abadankomaaxu. Xa ganta axa yinme Banisirayilaganka duuru, sere n maxa marandinxotaaxu ti i waaxin ŋa.
47 « “ Mukken kitten ga na saage a fallen wanqini, a taaxunten gaa axa noxon ŋa, an maarenme xa xosi misikiinaaxu, ma a gaa i du gaagana mukku taaxaana ke yi axa noqu, ma walla xa mukke ke bonsonŋe yogo, 48 a gaageyen falle, a burutanden ra wa gilli ti Banisirayilagankon du baananbe yi. 49 Faabe waaxin na a buruta, ma walla xa faabe waaxin renme, ma a burutinke gelli faabankan ŋa, ma ken su ga fe xa, a yinme kitten ga na a fallen wanqi, a na du buruta. 50 I do a xobondaana ke na siinon jaate gilli a xobeye katta maxawaseyinsiine. A xobexaalisi ke jaatene ti siino ku haqen ya. A ɲaana xo surugan gaa do an batten ŋa ya, a kiyun gaa jaateene moxo be yi. 51 Selli siina gabun ya ga toxo na jaaten raqen tinmandi, i na kun siino ya xaalisin tugana a xobondaana ke yi, na a buruta. 52 Xa selli siina lamaanu ya ga toxo i do maxawaseyinsiinen naxa na a raqen tinmandi, i na i jaate na ken saaga xobondaana ke yi. 53 A nan xawa ɲaana xo musungolliɲaŋaana ya yi do a batten ŋa tannu. Siine ma a men siine, a n maxa marandinxotaaxu ti a yi axa jon ŋa. 54 Selli ku su ga ma a bagandi, maxawaseyinsiinen ŋa a do i renmun na bogu. 55 Nke yinme ya komo ni Banisirayilaganko yi, n ga da i bagandi Misira ɲiiɲen ŋa. Nke ya ni Tunka Duumante, axa kama.