[Batiyi xalasinte]
26
« “ Xa maxa muno dabari du da, xa maxa gondoma sigindi muno yi axa du da, xa maxa gidi segunte ɲa muno yi axa ɲiiɲe ke kanma, nan sujudi katta a yi, sabu inke ya ni Tunka Duumanten ŋa, axa Alla. 2 Xa da in tuumayinkootan tanga, xa na in dingira sennen daro, nke ya ni Tunka Duumanten ŋa.3 « “ Axa ga na tere in farilan killen ŋa, axa ga da in ɲaamarixannun tanga, na i dabari, 4 n wa kanmen riitini axa yi i waxatin ŋa. Ɲiiɲen na i funtifon bagandi, gunnen yittun na i renmun kini. 5 Fo funsun sanjaanen wa axa tunsini ma reesen sanjaanen ŋa ; reesen sanjaanen na axa tunsi ma tifiwaxati, axa wa axa logoman kitta nan baabuwase. Axa haqilun taaxunton na sabati axa jamaanen ŋa. 6 N na xeerin riiti jamaanen ŋa, axa na xenqe ti axa sagon ŋa, sere su nta axa kanundini. N na fonyaatun su xata bakka axa gunnen ŋa, kaafa xa ntaxa wutiini axa jamaane ke yi. 7 Axa wa axa xonnon xatana, kaafan na i yerendi axa kaane. 8 Axa karago wa kame xatana, axa kame wa wujuunu tanmi xatana. Kaafan wa axa xonnon yerendini axa kaane. 9 N wa in falle faayini axa yi, na axa jiidi, na axa gabondi, tafunde be in ga da a ro in do axa naxa, na a tinmandi. 10 Axa wa soxanfo kiiten yigana, na soxanfo xasen bagandi bakka fo kurunban kaane. 11 N wa in kuunaaren roono axa naxa, n yinme jaatin nta axa sedde. 12 N wa terene do axa noxon ŋa ; n na ɲaŋi axa da Alla yi, axa xa na ɲaŋi in da jama yi. 13 Nke ya ni Tunka Duumanten ŋa axa Alla, ke be ga da axa bagandi bakka Misira ɲiiɲen ŋa, na axa bogu i maxa komaaxun ŋa. N da komonkacen xarun xoso bakka axa yi, na axa yinmerawutunton terendi.
[Allankuteyen]
14 « “ Xa ganta, axa ga ma in terinka, axa ga ma in ku ɲaamarixannu danmon su dabari, 15 axa ga da in farilanun sedi, nan bara in kiitun ŋa ti axa yinme yi nan bara in ɲaamarixannun su dabarini, nan xosi o naxan tafunden guruja, 16 ken ken ŋa in gaa ke be ɲaana axa yi, ken ya faayi ke : n xosini xaaxantaaxun ya janbana axa yi, wattijaaranbalin do fatankumun na axa yaaxon raga, na axa yonkinun tilifi. Axa na saage axa soxoodin soxono xafu : axa xonnon ya na i yigana. 17 N wa gilli ti axa xanne maxa, na axa xoso axa xonnon da ; ku beenu ga nta axa mulla, kun ya n marene axa kanma. Axa wa wurunu na a ɲi sere su ma axa xata.
18 « “ Selli ke su kanma axa ga ma in terinka, n wa ku jiidini ti axa yangonun saabu da, taanu ɲeri. 19 N wa axa dundaraaxu xooren kan kara bakka axa yi. N na axa kanmun xotondi xo mexen kuuɲa, na axa ɲiiɲen ɲa xo kire. 20 Axa wa axa senbun ɲamana xafu, axa ɲiiɲen ntaxa i funtifon kinni axa yi, ɲiiɲe ke yitten ntaxa renme kinni axa yi.
21 « “ Axa ga na jokki do in sooxinden batte, axa ga nta in terinkana, n na masiibon danpi axa kanma taanu ɲeri, ti axa yangonun lanɲaran ŋa. 22 N wa gundufoonun walla axa yi, i na axa karankarajaaxaaxu, na axa naaburu siginton halaki, i na axa yirigeyun roxondi, axa beddun na xiidi.
23 « “ Ku fiinu kundu su kanma axa ga ma du jikkundi, axa ga na sooxiyen killen ya tera katta in ŋa, 24 nke xa na sooxiyen killen ya terana ti axa yi de, na axa sanpa taanu ɲeri ti axa yangonun lanɲaran ŋa. 25 Axa ga na tafunden guruja, n na binbaganden kaafan xayi axa xanne maxa. Hari axa ga na kafi me yi axa debun ŋa, n na taawoonen wara axa noxon ŋa, na axa ro axa xonnon kittun ŋa. 26 N na axa yiganden kontondi ma kaagunyaxaru tanmi ga saage segendindini ben baanen noxon ŋa, i do an logoman haqen na ri katta an ŋa, an na a yiga, a nta an fakka¤.
27 « “ Selli axa ga na ɲi axa ga ma in terinka ken su kanma, axa gaa finna in sooxini ya, 28 nke xa butunten sooxindini axa maxa ya de ; na axa sanpa taanu ɲeri, ti axa yangon lanɲaran ŋa. 29 Axa wa riini axa renyugun do axa renyaxarun tiyun yiga. 30 N na axa munubatidingira wuruginton guruja, na axa futaadinsadaxindinoqunun kara, na axa furun wara axa muno furun kanma, nke yinme na axa sedi. 31 Axa debun na ri kare, n na axa dingira sennun ɲa kaajon ŋa. N ntaxa a mulla na axa futaadi timi liŋun timen mugu. 32 N wa axa ɲiiɲen ɲaana kaajo yi, ma axa xonnon ga ri taaxu a yi nan lasame ti a yi. 33 N na axa sanqi do duna xabiilanun naxa, n na kaafan sukkandi do axa yi. Axa ɲiiɲen na ɲa fo gurujante, axa debun na lagari gurujeene.
34 « “ Ken bire, axa gaa wuce be ɲaana jikkiranxoson ŋa kun xonnanjamaanu yi, siinanjaate ke be axa ga bara ɲiiɲen tuumandini, ɲiiɲe ke xa na i tuumayinsiinon tuuma ken noxon ŋa. 35 Ku jikkiranxosekooto waxatin su noxon ŋa, ɲiiɲen na tuuma ti axa tuumayinsiina waranto ku yi bire be axa ga ɲi taaxunu a yi.
36 « “ Axa kuttu beenu ga na toxo bireene axa xonnon jamaanun ŋa, n wa xaaxantaaxun walla i sondomun ŋa, fanken ga na hari yittideren ya yonko, i wa wurunu ma i ga xenu, xo kaafan ya gaa do i batten ŋa, na a ɲi xa sere nta do i ya. 37 I yinmenu duurun na finbi me yi nan toxo xenne-xenne me kanma yi xo kaafan ya gaa do i ya, na a ɲi fo nta do i ya, axa ra ntaxa sikki axa xonnon kaane. 38 Axa wa halakiini xabiilanun naxa ; axa xonnon ɲiiɲon na axa toni. 39 Axa kuttu be ga toxo, i na toxo i garamajigingollun ŋa i xonnon ɲiiɲen kanma. I seri fanon garamajigingollun xa yinme ya na do i batten ŋa, a gaa i naqasini kafiini ikun yinme yango burun ŋa.
40 « “ Ganta i nan xiire ti i garamajigingollun do i seri fanon garamajigingollun ya yi, ti i ga da kutegollu be ɲaŋi in ŋa, ken do i ga da in sooxi ti terekillu be yi, 41 nke xa sooxindi i maxa ti ken ya yi. N wa i denne i xonnon ɲiiɲen ŋa, ma i sondon xoton ga na newo, ken bire ya ni, i garamajigingollun na tinme bakka i kanma. 42 Ken bire in na sinme in do Yaaxuba tafunden ŋa, kafiini in do Isiyaaxa tafunden ŋa a do in do Ibirahiima tafunden ŋa. N na sinme do ɲiiɲe ke yi. 43 Ɲiiɲe ke wa i fatanlenmaaxunu ke moxo yi, kuudo i na i tuumayinsiina bantanto ku tuga. I ga ɲi ga da in kiitun xa sedi na in farilanun wara, i na ken xa garamajigingollun tanbon tuga. 44 Ken do i fi su, n nta balla i ya. Nan ti i wa i xonno ku ɲiiɲen ŋa do i fi su, n nta i sedde ti ken ŋa, n nta i ɲamana bogobogo, ken ni xo in ga da tafunden guruja n do i naxan ŋa ya. N nta ken ɲaana, sabu inke ya ni Tunka Duumanten ŋa, i Alla. 45 Nke na tafunde ke du ya sinmana in do i seri fanon naxa, ku beenu in ga da i bagandi Misira jamaanen ŋa duna yaaxon ŋa, kuudo in nan ɲaŋi i da kamane yi. Nke ya ni Tunka Duumante. ” »
46 Ku kundu ya ni farilanun do kiitun ŋa a do sariyanu, ku beenu Tunka Duumanten ga da i sigindi i do Banisirayilagankon naxan ŋa Tuurisiina giden kanma yi ti annabi Muusa sooxen ŋa.