[Tekku]
27
Tunka Duumanten daali Muusa da nan ti : 2 « A kiɲandi Banisirayilagankon ŋa nan ti sere be ga na tegu Tunka Duumanten da, an tekke ke xiiman ga ni seri siginten ya, a kiitun faayi : 3 a ga na ɲa yugon ya yi, a gaa tanpille katta tandume siine renme, a xiiman ni tanpille do godoxullu segi ya, ken gaa genme tilliisi sennen godoxullen xiiman ŋa. 4 Selli yaxaren xa ya ga ni, ken genme godoxullu tanmi do ɲeru ya. 5 Selli na a wutu siino karagi katta tanpille siine renme ya ga ni, an na yugon xiimana godoxullu tanmi do baane ya ; fo yaxare, godoxullu karagi do taxande. 6 Selli xasu baane renme katta siino karagi renme ya ga ni, an xiimandun wa ɲaana yugon kanma godoxullu sikki ; an na yaxarun xiima godoxullu baane do taxande. 7 Selli a ga na ɲa tandume siine renme ya yi ma ken kanma, a nda ɲa yugon ya, a xiiman ni an da godoxullu kabi ya ; yaxarun xiiman ni godoxullu tunmi. 8 Selli tegaana ke ga ni misikiinen ya yi tekke ke xiiman baganden danŋa xa, a na daga katta sadaxakiɲandaanan ŋa, sadaxakiɲandaana ke na a xiima haqe yi, fo be ra gaa kiteene tegaana ke kitten ŋa, sadaxakiɲandaana ke na a xiimana ken ya yi.9 « Selli daaban ya ga ni tekke ke yi, a ra gaa sadaxini Tunka Duumanten da, fo wo fo su ga kini Tunka Duumanten ken ŋa, ken ɲaana fo senne ya. 10 A n maxa a faraaxu fo sire ti fo maɲante, ma walla xa fo maɲante ti fo sire. A n maxa a noonen xa yilla. A ga na daaba faraaxu ti a me daaba yi, faraaxaado ke do faraaxundifo ke su wa xosini ɲaana fo sennu yi Alla da. 11 Tekke ke ga na ɲi daaba yi a sobinten ga ni, a ra ga nta ɲaana sadaxa yi Tunka Duumanten da, tegaana ke na daaba ke sigindi sadaxakiɲandaanan ŋa. 12 Sadaxakiɲandaana ke na a xiima, ti a siroyen do a bonoyen ŋa. A toqo ken xiima ya yi. 13 Selli an ga na a bagandi ti xoben ŋa xa, an na a xiimande ke haqen taxandi karagan kafu a jonkon ŋa.
14 « Sere be ga na i kan ya tekke yi, an ga da a sugandi Tunka Duumanten da, sadaxakiɲandaanan na a siroyen do a bonoyen xiima. Sadaxakiɲandaana ke ga na a xiima ke be yi, a toqo ken ya. 15 Selli tegaana ke ga na lafi i ka ke bagandini ti xoben ŋa, a na a xiimande ke xaalisin taxandi karagan saxu bagandindijonko ke kanma, ka ke na ɲaŋi a xallen ŋa.
16 « Ɲiiɲanbera gaa sere be maxa, a kaman ga na a tegu ti a yi Tunka Duumanten da, a xiimeene ti soxoodi be haqen ra gaa roono a yi ya, soxoodin raqen ni : kame yillinmuude su, tanpille do godoxullu segi. 17 Selli an ga tegu ti an soxanten ŋa maxawaseyinsiinen* ya yi, a ga xiime ke be yi, a toqo ken ya yi. 18 Xa selli an ga na tegu ti soxante ke yi maxawaseyinsiinen dangi falle ya yi xa, siini kuttu be ga toxo o do maxawaseyinsiini riye naxa, sadaxakiɲandaanan na a xaalisin xiimana ken raqen ya yi, ɲiiɲanbera ke jonkon na roxo. 19 Xa selli an soxante ke be ga ɲa tekke yi, an gaa a mulla na a bagandi ti xoben ya yi kuŋa, an na a xiiman taxandi karagan xaalisin ya saqa a kanma, a na ɲaŋi an xalle yi. 20 Selli an ga ma soxante ke bagandi ti xoben ŋa kuŋa, seri tana ya ga da a xobo saado an gaa a bagandini, an ra ntaxa a bagandini keeta. 21 A ga na bogu maxawaseyinsiinen ŋa, a du xosini sugandini Tunka Duumanten ya da xoyi soxanta haraamunte. Ken ɲaana sadaxakiɲandaanan ya xalle yi.
22 « Selli sere be nda wandi soxante xobo katta du yi xa nan tegu ti a yi Tunka Duumanten da, na a ɲi an xayimaxanta fo fe a gaa an maranden ŋa, 23 siinanhaqe be ga toxo o do maxawaseyinsiinen naxa, sadaxakiɲandaanan na ken ya xaalisin jaatene, an na ken fo jaatante ya kinni sadaxakiɲandaana ke yi ken koota su yi. Ken xaalisinu ni fo sennen ya yi Tunka Duumanten da. 24 Maxawaseyinsiinen ŋa, soxante ke na saage katta i kaman xasen ŋa, ɲiiɲe ke ga ɲi ke be mareyen ŋa, a ga da a gaaga seri tana yi. 25 An xiimanden su n xawa ɲaana ti tilliisi sennen godoxullen xiiman ya yi : godoxullu baane genme sekkelinu filli me ya.
26 « Ren fano be axa daabanun ga joŋa i saarana, sere su n maxa tegu ti kun ŋa, Tunka Duumanten ya fo ni. Ken ga ɲa na ya yi ma tanmise ya ga ni, Tunka Duumanten ya xalle ni. 27 Selli daaba sobinten ya ga ni, an ga na a maxawasa, an na a xiiman jonkon taxandi karagan saxu a kanma. Selli an ga ma a maxawasa xa, sadaxakiɲandaanan na a gaaga ti a xiima ke yi.
28 « Fo wo fo su ga ni tegufon ya, sere ga da a tegu Tunka Duumanten ya da, ken ga ɲa fo wo fo danbe su yi a kaman maxa, ken ga ɲa sere ya yi ba, ma daaba ya ga ni, walla xa soxante, ken gaa a foyaaxun ŋa, a ra ntaxa a gaagana, a nta bakka ti xobe xa yi. Tegufon su sugandinten ya ni ; ken ɲaana fo senni sennen ya yi Tunka Duumanten da. 29 Tegufo su, haadamarenmen ya ga ni, ken nta maxawaseene, a n xawa kalla baane ya.
30 « Ɲiiɲen funtifoonun taxandi tanmundi, a do a yittirenmun taxandi tanmundi, i su ni Tunka Duumanten ya fo yi. Fo sennun ya ni Tunka Duumanten da. 31 An ga na lafi fo bagandini ti xoben ŋa bakka taxandi tanmundinu ku yi, an na a jonkon taxandi karagan ya saqa a kanma. 32 Nan do tanmise, Tunka Duumanten ya fo ni a taxandi tanmunden ŋa, ken sugandini a ya da. 33 Maxa jaabandi fo siren do fo buren naxa, maxa a faraaxu xa : selli an ga na a faraaxu xa, faraaxaado ke do fo faraaxunte ke su ɲaana fo sugandinto ya yi Tunka Duumanten da, i nta maxawaseene xa. »
34 Ku ya ni ɲaamarindixannun ŋa, Tunka Duumanten ga ɲaamarindi annabi Muusa maxa ti i ya Tuurisiina giden kanma yi, katta Banisirayilagankon ŋa.