Jaatu 1

Tawureeta kitaabi naxatandi

a toxon ga ni

Jaatu

[Daaxeye Tuurisiina gunjuran ŋa]

[Fonlaqun jaatu]

Banisirayilaganko bakke Misira yi siina fillandin xasu fillandin koota fanan ŋa, daali Muusa da gemmanlenmaaxun tilliisen ŋa, Tuurisiina yi gunjuran noxo, nan ti : 2 « Banisirayilaganko yugon danman su toxon nan jaate, faabankaanun do fonlaqu, yinme ti yinme, 3 na a wutu tanpille siine renme katta kanmu. Fo wo fo ra gaa roono Isirayila kuren ŋa, an do na i jaate ti i kurun lanɲaran ŋa. 4 Xabiila su yugu baane baane na ɲa kafiini an ŋa, ken na ɲaŋi i faabankan yinmen ŋa. 5 Sero beenu gaa sikki do axa batten ŋa, i toxonun faayi : Seduura renme Licuura ya na do Rubeenikaarankon ŋa. 6 Surisaada renme Selumeeli wa do Simoonakaarankon ŋa. 7 Hamidaabu renme Nahasoona wa do Yehuudakaarankon ŋa. 8 Suwaara renme Nataneeli wa do Yisaxaarikaarankon ŋa. 9 Heloona renme Heliyaabu wa do Jebuluunukaarankon ŋa. 10 Yuusufu renmu ku, Mihuuda renme Yelisaama wa do Hefarayimukaarankon ŋa, Pedacuura renme Gamaleeli xa wa do Manaasekaarankon ŋa. 11 Gidooni renme Habidaana wa do Beniyamiinakaarankon ŋa. 12 Hamisadaayi renme Hejeeri wa do Daanikaarankon ŋa. 13 Haxaraana renme Pagiyeli wa do Haseerikaarankon ŋa. 14 Duweeli renme Yelisaafu wa do Gaadikaarankon ŋa. 15 Yenaana renme Hiira wa do Nafutaalikaarankon ŋa. »

16 Ku ya n sugandi bakka Banisirayilaganko jaman ŋa, i faabankaanu ku fonlaqun yinmankon ya ni, i wujuununjaatu ku kurun yinmankon xa ya ni. 17 Ku yugu be ga sugandi ti i toxonun ŋa kundu, Muusa do Haaruna da i wutu. 18 I da jama ke su kafume yi xasu fillandin koota fanan ŋa, na i toxonun jaate ti i faabankaanun do i fonlaqun lanɲaran ŋa, yinme ti yinme, na a wutu tanpille siine katta kanmu. 19 Tunka Duumanten ga da Muusa ɲaamari moxo ke be, Muusa da i jaate ken moxo ya yi Tuurisiina gunjuran ŋa.

20 Rubeeni ya ni Isirayila sooman ŋa. A xabiilan toxonun jaate ti i faabankaanun do i fonlaqun lanɲaran ya yi. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 21 Rubeenikaarankon xabiilan jaaten ni tannaxate do wujuunu tunmi, a do kamo karagi yugo (46 500).

22 Simoonakaarankon xabiilan toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 23 Ku beenu ga jaate Simoonakaarankon xabiilan ŋa, ken ni tankarage do wujuunu kabi a do kamo sikki yugo (59 300).

24 Gaadikaarankon xabiilan toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 25 Ku beenu toxonun ga jaate Gaadikaarankon xabiilan ŋa, ken ni tannaxate do wujuunu karagi a do kamo tunmi do tankarage yugo (45 650).

26 Yehuudakaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 27 Ku beenu toxonun ga jaate Yehuudakaarankon xabiilan ŋa, ken ni tanɲere do wujuunu naxati, a do kamo tunmi yugo (74 600).

28 Yisaxaarikaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 29 Ku beenu toxonun ga jaate Yisaxaarikaarankon xabiilan ŋa, ken ni tankarage do wujuunu naxati, a do kamo naxati yugo (54 400).

30 Jebuluunukaarankon toxonun jaate ti i faabankaanun do i fonlaqun lanɲaran ŋa, yugo su wuyun gaa tanpille siine yi segene, a ra gaa bakka dagana kuren ŋa. 31 Ku beenu toxonun ga jaate Jebuluunukaarankon fonlaqen ŋa, ken ni tankarage do wujuunu ɲeri, a do kamo naxati yugo (57 400).

32 Fo be ga ni Yuusufu renmun xa yi, Hefarayimukaarankon toxonun jaate ti i faabankaanun do i fonlaqun lanɲaran ŋa, yugo su wuyun gaa tanpille siine yi segene, a ra gaa bakka dagana kuren ŋa. 33 Ku beenu toxonun ga jaate Hefarayimukaarankon fonlaqen ŋa, ken ni tannaxate wujuune, a do kamo karagi yugo (40 500).

34 Manaasekaarankon toxonun jaate ti i faabankaanun do i fonlaqun lanɲaran ŋa, yugo su wuyun gaa tanpille siine yi segene, a ra gaa bakka dagana kuren ŋa. 35 Ku beenu toxonun ga jaate Manaasekaarankon fonlaqen ŋa, ken ni tanjikke do wujuunu filli, a do kamo filli yugo (32 200).

36 Beniyamiinakaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 37 Ku beenu toxonun ga jaate Beniyamiinakaarankon xabiilan ŋa, ken ni tanjikke do wujuunu karagi, a do kamo naxati yugo (35 400).

38 Daanikaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 39 Ku beenu toxonun ga jaate Daanikaarankon xabiilan ŋa, ken ni tandume do wujuunu filli, a do kamo ɲeri yugo (62 700).

40 Haseerikaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 41 Ku beenu toxonun ga jaate Haseerikaarankon xabiilan ŋa, ken ni tannaxate do wujuunu baane, a do kamo karagi yugo (41 500).

42 Nafutaalikaarankon toxonun jaate ti i faabankaanun do i fonlaqun lanɲaran ŋa. Yugo su wuyun gaa tanpille siine yi segene, a ra gaa bakka dagana kuren ŋa, i da a jaate. 43 Ku beenu toxonun ga jaate Nafutaalikaarankon xabiilan ŋa, ken ni tankarage do wujuunu sikki, a do kamo naxati yugo (53 400).

44 Ku ya ni yugu beenu Muusa do Haaruna do Banisirayila xabiilanun tanmi do fillon yinmankon ga da i yiriga, i dubaananbe su na duranfonlaqe ya yi. 45 Banisirayilaganke su wuyin gaa tanpille siine ma fo be ga n xasa ken ŋa, a ra gaa bakka dagana Banisirayila kuren ŋa, a kaman yirige ti i xabiilan lanɲaran ŋa. 46 Ayiwa ku fo yiriganto su jaaten ni kamo tunmi wujuune, a do wujuunu sikki do kamo karagi do tankarage yugo ya (603 550).

[Leewikaarankon xabiilan duran siga]

47 Ganta Leewikaaranko ku faabankaanun haqe, kun ma yirige kafiini i ya. 48 Baawo Tunka Duumanten ɲi ga daali Muusa da ya nan ti : 49 « Maxa Leewi xabiila ke baane ya yiriga ; maxa i wutu kafiini Banisirayilaganko kuttun ŋa xa. 50 An na Leewikaarankon xabiilan sugandini seedaaxun tilliisen ya da, kafiini a yokkun su yi. Fo wo fo ga ni tilliise ke yokke ya, a do a surumaade, ikun ya na a do kun su wuttu. Ikun daaxene do tilliise ke ya kaaron ŋa, na a gollun dabari. 51 Tilliise ke ga na ɲi xooreene gilli i batten ŋa waxati su, Leewikaarankon ya n xawa a wasana ; tilliise ke ga na ɲi sikki waxati su, ikun Leewikaaranka baanu ya na a yette. Seri tana su ga na tinko a yi, a kaman nan xawa kalla ya.

52 « Banisirayilaganko kurunkittun gaa moxo be yi, i daaxene ken moxo ya yi ; be su do i bandeerin wa i daaxan ŋa. 53 Xa ganta, Leewikaaranko ku kun nan xawa daaxene do seedaaxun batika yiranman kaaron ya yi, ken ŋa Tunka Duumanten butten yanganxatan na waase Banisirayilaganko jaman ragana. Leewikaaranko ku ya na tilliise ke gollun dabarini. »

54 Tunka Duumanten ga da Muusa ɲaamari ti fo wo fo dabarinden ŋa, Banisirayilaganko da ken yinme ya ɲa.