[Xabiilanun daaxemoxo]
2
Tunka Duumanten daali Muusa do Haaruna da nan ti : 2 « Banisirayilaganko du baananbe su n xawa taaxunu laatoyen ŋa fonne do genmanlenmaaxuntilliisen kaaron ya yi i bandeerin wure, a do i xabiilanuntaagumansu.[Kinbakkan daaxa]
3 « Ku beenu ga n xawa daaxene kiyen boguran ŋa kuŋa kinbakkan banŋe, kun ni Yehuudakaarankon kurundaaxan ya yi i bandeerin wure. Yehuudakaarankon yinmanken ni Nahasoona ya, Hamidaabu renme. 4 Ku beenu ga yirige aken kurunsapan ŋa, ken ni tanɲere do wujunu naxati ya, a do kamo tunmi yugo (74 600). 5 Ku beenu gaa daaxene kun kaaran ŋa, ken ni Yisaxaarikaarankon xabiilan ya. Ikun Yisaxaarikaaranko yinmanken ni Nataneeli ya, Suwaara renme. 6 Ku beenu ga yirige aken kurunsapan ŋa, ken ni tankarage do wujunu naxati ya, a do kamo naxati yugo (54 400). 7 Ke be gaa kun batta, ken ni Jebuluunukaarankon xabiilan ya. Kun Jebuluunukaaranko yinmanken ni Heliyaabu ya, Heloona renme. 8 Ku beenu ga yirige aken kurunsapan ŋa, ken ni tankarage do wujunu ɲeri ya, a do kamo naxati yugo (57 400). 9 Yehuudakaarankon daaxa ke kurunsapo beenu su ga yirige kundu, i jaaten ni kame do tansege do wujunu tunmi ya, a do kamo naxati yugo (186 400). Girindinden ga na ɲi ɲaana, ikun fina ya n janbandini.
[Banboxun daaxa]
10 « Banboxun banŋe, Rubeenikaarankon kurundaaxan ya ni non ŋa, i bandeerin wure. Rubeenikaaranko ku jaman yinmanken ni Licuura ya, Seduura renme. 11 Ku beenu ga yirige aken kurunsapan ŋa, ken ni tannaxate do wujunu tunmi ya, a do kamo karagi yugo (46 500). 12 Ku beenu gaa daaxene kun kaaran ŋa, ken ni Simoonakaarankon xabiilan ya. Simoonakaaranko ku yinmanken ni Selumeeli ya, Surisaada renme. 13 Ku beenu ga yirige aken kurunsapan ŋa, ken ni tankarage do wujunu kabi ya, a do kamo sikki yugo (59 300). 14 Gaadikaarankon ya na kun batta. Kun Gaadikaaranko yinmanken ni Yelisaafu ya, Lewuyeli renme. 15 Ku beenu ga yirige aken kurunsapan ŋa, ken ni tannaxate do wujunu karagi ya, a do kamo tunmi do tankarage yugo (45 650). 16 Ku beenu su ga yirige Rubeenikaarankon daaxan ŋa, i kurunkittun lanɲara, ken ni kame do tankarage do wujunu baane, a do kamo naxati do tankarage yugo (151 450). Girindinden ga na ɲi ɲaana, i ya n ɲaana fillandinun ŋa.
[Leewikaarankon janbandiye]
17 « Ku filli janbandi falle, Leewikaarankon do genmanlenmaaxuntilliisen xa na janbandi kurunsapon do me naxa. I ga daaxe moxo ke be, i bakka kundun ya : daaxa ti daaxa, baane su wa i duran bandeerin wure.
[Kinxennan daaxa]
18 « Hefarayimukaarankon kurunsapon ya na i bandeerin wure yi kinxennan ŋa. Hefarayimukaaranko ku yinmanken ni Yelisaama ya, Mihuuda renme. 19 Ku beenu ga yirige aken kurunsapan ŋa, ken ni tannaxate wujune, a do kamo karagi yugo (40 500). 20 Manaasekaarankon ya na kun batta. Kun Manaasekaaranko yinmanken ni Gamaleeli ya, Pedacuura renme. 21 Ku beenu ga yirige aken kurunsapan ŋa, ken ni tanjikke do wujunu filli ya, a do kamo filli yugo (32 200). 22 Beniyamiinakaarankon wa kun batta. Kun Beniyamiinakaaranko yinmanken ni Habidaana ya, Gidooni renme. 23 Ku beenu ga yirige aken kurunsapan ŋa, ken ni tanjikke do wujunu karagi ya, a do kamo naxati yugo (35 400). 24 Ku beenu su ga yirige Hefarayimukaarankon daaxan ŋa, i kurunsapon lanɲara, ken ni kame do wujunu segi, a do kame yugo (108 100). Girindinden ga na ɲi ɲaana i ya n ɲaana sikkandin ŋa.
[Saahelin daaxa]
25 « Saahelin banŋe, Daanikaarankon kurundaaxan ya ni i bandeerin wure. Ikun Daanikaaranko yinmanken ni Hejeeri ya, Hamisadaayi renme. 26 Ke be ga yirige aken kurunsapan ŋa, ken ni tandume do wujunu filli ya, a do kamo ɲeri yugo (62 700). 27 Ku beenu gaa daaxene kun kaaran ŋa, ken ni Haseerikaarankon ya. Kun Haseerikaaranko yinmanken ni Pagiyeli ya, Haxaraana renme. 28 Ke be ga yirige aken kurunsapan ŋa, ken ni tannaxate do wujunu baane ya, a do kamo karagi yugo (41 500). 29 Ku beenu gaa kun batta, ken ni Nafutaalikaarankon xabiilan ya. Kun Nafutaalikaaranko yinmanken ni Hiira, Yenaana renme. 30 Ke be ga yirige aken kurunsapan ŋa, ken ni tankarage do wujunu sikki ya, a do kamo naxati yugo (53 400). 31 Ke be ga yirige Daanikaarankon daaxan ŋa, ken ni kame do tankarage do wujunu ɲeri, a do kamo tunmi yugo (157 600). Girindinden ga na ɲi ɲaana ikun ya n lagarini bakka i bandeerin wure telle. »
[Daaxon kafumanto]
32 Ku ya ni Banisirayilaganko beenu ga yirige na a saxu i faabankaanun lanɲaron ŋa. Ku beenu su ga yirige daaxon ŋa, ti i kurun toxonun ŋa, ken ni kamo tunmi wujune, a do wujunu sikki do kamo karagi, a do tankarage yugo (603 550). 33 Xa ganta, xo Tunka Duumanten ga ɲaamarindi Muusa maxa moxo be, Leewikaarankon kun ma yirige kafiini Banisirayilagankon kuttun ŋa.
34 Tunka Duumanten ga ɲaamarindi Muusa maxa moxo ke be yinme yi de, Banisirayilaganko ku daaxe i bandeerinun wure yi ken moxo ya. I kurunsapon gaa moxo be, ken moxo baananne ya ni i ga janbandi bakka, baane su wa do i xabiilan do i fonlaqen ŋa.