Tawureeta kitaabi karagandi
a toxon ga ni
Fillantafunde
Roraqe
Ke kitaabe kundu, moxotakonŋun ya na a noxon ŋa nan giri annabi Muusa yi. Aken Muusa do Alla jaman kiɲe Mowaaba jamaanen ŋa. Fon ma toxo ma i n ro Kanaana jamaanen ŋa, xa Alla ɲi ga da a ko nan ti i ga da jamaane ke be laayidun wutu Banisirayilaganko da, annabi Muusa ken nta roono. Ken kuŋa Muusa faati, a maxa ro. Saado Muusa gaa faatini, a da digaamen wutu.
Banisirayilaganko ga da tannaxate ke siinen ɲa laaweyen ŋa do gunjuran noxo, Alla ga da i geesu, na i koroosi, annabi Muusa sefe ken kanma, nan ti i n duntenŋaaxu Alla da ti ken ŋa.
Ken falle, Alla ga da ɲaamarixannun tanmi do sariyanu be kini Banisirayilagankon ŋa, Muusa saage a su yi i da. Xa a ma xenpe na sariyanu ku batu baane de, Banisirayilaganko n xawa Alla xanna ti i sondomun su ya yi. Tunka Duumanten ga da laayidu be tafu i do i naxa, i n tuuge ti ken xa yi. I nda toxo tuugene ti ke tafunde yi, Alla wa xeerin ɲaana i da. Xa i nda tafunde ke guruja, i xonnon wa i niini. Kitaabe ke toxon saxu ke ya kanma, ken ga ni « Fillantafunde » baawo tafunden fille i danŋa ya ke noqu yi, ma an na ti a da i sinmandi do tafunden ŋa.
Annabi Muusa ga da i moxo sirondi katta kallen ŋa, na Yuusawu sugandi ti an sigi jaman da ike Muusa batten ŋa, kitaabe ke lagaren sefene kun ya kanma. Ken do Muusa ga da Alla tiigandisuuge be suugu, ken ga ni Alla fonnansiraaxun xesiidan ŋa, kafiini a ga duwa Banisirayila xabiilanu ku tanmi do fillon da, nan faati, kitaabe ke lagaren sefene ken su ya kanma. A wa kitaabe ke yi kuŋa nan ti Muusa me annabinyinme ma demu riini Banisirayila yi : A do Alla sefene yaaxe ti yaaxen ya. Soora tanjikke do naxatandin aayi tanmundin wa sefene ken kanma. Ke Muusa ya n da lasameyen fon xooren girindi Banisirayilagankon kanma :
Terinke, Isirayila ! Tunka Duumanten ni Tunka Duumanta baane ya, o Alla. An na Tunka Duumanten xanu ti an sondomen su yi, an Alla, na a xanu ti an yonkin su yi, na a xanu ti an senben su yi*.