[Yaxarun roye xeyen ŋa]
36
Gilaadinko, kun ga ni Maxiirilankon ŋa, nan bogu Yuusufu renme Manaase xabiilan ŋa, i faabankan yinmankon ri katta Muusa do Banisirayilaganko faabankan yinmankon ŋa, 2 nan ti : « Kamanyugo, Tunka Duumanten da an ɲaamari ti an na taqiɲiiɲe kinni o yi kafiini Banisirayilagankon ŋa ti sokkun wutunden ŋa. Kamanyugo, an da ɲaamariyen kita Tunka Duumanten ŋa ken falle, nan ti an na o waaxi Selofaadi xallitaqen kini a ren yaxarun ŋa. 3 Ken kuŋa, i gaa yaxiini Banisirayilaganko xabiila tana be renmun du baananbe yi, i xallitaqen kutiini bakka oku faabankan xallitaqen ya yi nan daga kafi ken xabiila xallitaqen ŋa, a gaa ɲaana kun xalle yi bakka sokkun ga da taqe be kini oku yi. 4 Ken ŋa maxawaseyinsiinen ga na ri Banisirayila yi, ikun xallu ku telle kafi i kiinankaanu ku xabiilan faabantaqun ya yi. Ken na oku xabiilan faabantaqun naqasini ya ! »5 Muusa xosi Banisirayilaganko ɲaamari na a saxu Tunka Duumanten daalen kanma, nan ti : « Yuusufukaaranko ku digaamen ni tonŋun ya. 6 Tunka Duumanten ga ɲaamarindi ti ke be yi Selofaadi ren yaxarun xibaaren ŋa, a ya faayi ke : “ I yaxiini yugo ya yi, ke be ga n liŋa i da, xa, i xabiilan fonlaqun baane ya na i yaxini de. 7 Faabantaqe ntaxa yilleene gilli xabiila yi katta xabiila tana yi Banisirayilaganko taqun ŋa ; Banisirayilaganke su faabantaqen nan toxo a maxa, ken ni waajibin du ya yi. 8 Banisirayilaganko ren yaxare su ga da taqe xaye ti xabiila su yi, a n xawa yaxiini i faabanka ke xabiilan fonlaqun du baananbe ya yi, ken moxo, Banisirayilaganke su na i faabantaqen xaye. 9 Taqe nta yilleene gilli xabiila yi katta xabiila tana yi ; waajibin ya ni Banisirayilaganko xabiilanun maxa, baane su nan toxo ti i taqen ŋa. ” »
10 Tunka Duumanten ga da Muusa ɲaamari moxo be, Selofaadi ren yaxarun da a ɲa kundun ya yi. 11 Mahala do Tirica, a do Haagila do Milika, kafiini Noowa, ku ya ni Selofaadi ren yaxaru ku yi. I lagari yaxiini i faaba waaxinun renmun ya yi. 12 Yuusufu renme Manaasekaara fonlaqu ku, i lagari yaxiini kun ya yi ; i taqiɲiiɲo ku toxo i xabiilan do i faabankan fonlaqun maxa.
13 Ku ya ni ɲaamarindixannun do kiitun ŋa, ku be Tunka Duumante ga da Banisirayilaganko ɲaamari ti i ya, Muusa kandan noxon ŋa Mowaaba ɲiiɲanbaayanmen ŋa Yaradefanŋe yi Yeriiho jonkonmenŋa.