[Leewikaarankon debu]
35
Tunka Duumanten daali Muusa da Mowaaba ɲiiɲanbaayanmen ŋa, Yaradefanŋe yi Yeriiho jonkonmen ŋa, nan ti : 2 « Banisirayilaganko ɲaamari i na faabankutiye kini Leewikaarankon ŋa bakka i debu beenu gaa i mareyen ŋa, ken do nagaaniranu, debu ku fonkaaron ŋa. 3 Kun debu na ɲaŋi i da taaxura yi, i gunnu ku xa na ɲaŋi i daabanun do i naaburun kuttun da nagaaniranu yi. 4 Axa gaa nagaaniranu be kinni Leewikaarankon ŋa, xa na i xense wujune sogone, na a wutu deben tegeyinbinnen xoodon ŋa sellan banŋe, kinbakkan do kinxennan ŋa, a do saahelin do banboxu. 5 Ken ŋa, na a wutu kinbakka katta kinxennan ŋa, a na ɲa wujunu filli sogone. Nan giri saahelin xa yi katta banboxun ŋa, a xa na ɲa wujunu filli sogone. Deben na toxo naxaanen ŋa. Ku ya ni i debun nagaaniranun ŋa.6 « Debu ku beenu axa gaa i kinni Leewikaarankon ŋa, debun tunmi ni xaliifedebun ya, kun kiniini ya, kuudo serikallaanon na wuru dagana xaliife non ŋa. Xa wa tannaxate do debu filli tana kinni. 7 Axa gaa debinhaqe be kinni Leewikaarankon ŋa, a su ni tannaxate do debu segi ya, i do i nagaaniranu. 8 Axa gaa debu be kinni Leewikaarankon ŋa, i bakka Banisirayilaganko xallitaqun ya yi ; xabiila gaben na fo gaben kini, fo lamaanen na fo lamaanen kini. Xabiila su ɲiiɲanhaqe be gaa an maxa tannu, an kinindini na a saxu ken haqen ya kanma. »
[Xaliifedebu]
9 Tunka Duumanten daali Muusa da ken falle : 10 « Sefe Banisirayilaganko da, an nan ti : “ Axa faayi Yaradefanŋe kuttu roono Kanaana ɲiiɲen ŋa, 11 xa n xawa debu sugandini du da, kun ga ni xaliifedebun ŋa. Serikallaanan na wuru nan daga xaliife non ŋa, sere be ga na sere kari ti futuxiyen ŋa. 12 Kun na ɲaŋi axa da debu yi, kallenfutuxiyenmen gaa dagana xaliife, kuudo kallaanan wolin nan maxa karindaanan kari saado a gaa sikki jaman jon me naxa, na a kiitindi. 13 Axa gaa kun xaliifedebu beenu kinni, i ɲaana debu tunmi ya yi axa da. 14 Xa na debun sikki kini ti Yarade ken kuta yi, na debun sikki kini ti Kanaana ɲiiɲen ŋa, kun ɲaana xaliifedebun ya. 15 Ku debu tunmi ya n ɲaana xaliifedebun ŋa Banisirayilaganko da, a do mukken do taaxamaxo be gaa axa noxon ŋa, kuudo sere su ga na sere kari futuxiyen ŋa, an na wuru telle xaliife non ŋa.
16 « “ Xa selli sere ga na mexenyokke ya lifiti sere yi a ga kara, ken kaman ni serikallaanan ya. Serikallaanan nan xawa kalla ya. 17 Selli a ga da gidingullan ya wutu i kitten ŋa, ke be gaa sere karini, na a katu ti a yi, a xosi kara, ken ni serikallaanan ya. Serikallaanan nan xawa kalla ya. 18 Ma walla xa a da solle ya wutu i kitten ŋa, ke be gaa sere karini, a xosi a katu ti a yi a kara, ken kaman ni serikallaanan ya. Serikallaanan nan xawa kalla ya. 19 Furen wolin yinme ya n xawa serikallaanan karini, ken ga ni foronxirindaanan ŋa. A do a nda me wari noqu be, a na a kari.
20 « “ An ga na sere yonto, ma na fo sedi a yi, ti xonnaaxun ŋa, a xosi kara, 21 ma an ga da a xonnankatu ti an kitten ya yi, a xosi kara, an xa n xawa kalla ya tannu, serikallaanan ya ni an ŋa. Foronxirindiyenmen an karini a do an ga na me wari noqu be.
22 « “ Xa selli a ga na a yonto kundun ya yi tannu xonnaaxu kanma fe, ma a da fo ken ya sedi a yi, xa a ma a tawu, 23 ma gidingulla ya ni, a ga yere a maxa sere kanma, ken kaman xosi kara, na a ɲi a yaaxe yinme ma ɲi a kaman ŋa, xonnaaxu kanma fe, a ma fo bure xa muuru ti a yi, 24 jaman na kiiti katundaana ke do foronxirindiyenmen naxa, na a saxu ku kiitu kanma. 25 Jaman na serikallaana ke kisi bakka foronxirindiyenmen kitten ŋa, i na a saagandi katta xaliifedebe ke be a ga wuru dagana a yi, a na taaxu non ŋa, ma sadaxakiɲandaananyimanken ga na faati, ken ga ni sadaxakiɲandaananyimanke be i ga da a daari ti te sennen ŋa kuudo sadaxakiɲanden yinmankaaxun nan kini a yi. 26 Xa serikallaana ke ga wuru nan daga xaliife debe be yi, a ga na bogu ken debe gingun noxon ŋa, 27 foronxirindiyenmen xosi a kita xaliifedebe ke ɲiiɲen gingun falle, a da a kari, ken bire, foron likke nta a yi de, 28 baawo serikallaana ke n xawa toqo i xaliifedebe ke ya yi o do sadaxakiɲandaananyimanken gaa faatini. Sadaxakiɲandaananyimanken ga na faati bire be, a na saage katta i yinme deben ŋa. 29 Axa ga na ɲi taaxunu dingira su yi, ku kundu ya n ɲaana axa do axa yilleyun su farilanun kiitun ŋa.
30 « “ Sere su ga na sere kari, seedaanon seedeyen ya n sikki o gaa kaman karini, xa seedaana baane seedaaxu nta rageene serikallen ŋa. 31 Sere ke be ga n xawa kalla, axa maxa duŋe diya ragana a kaman ŋa seri yonkin batten ŋa, baawo serikallaanan nan xawa kalla baane ya. 32 Sere be ga wuru katta xaliifedebe yi, nan daga xaliife, xa maxa diya raga a kaman ŋa a gaa saagene katta i jamaanen ŋa nan taaxu non ŋa saado sadaxakiɲandaananyimanken gaa kalla.
33 « “ Axa gaa ɲiiɲe ke be yi, xa maxa a mexendi, baawo foren na ɲiiɲen ya mexendini. Foren xa ga na joxi ɲiiɲen ŋa, a ntaxa senoono xadi, ganta sere ke be ga da seren kari, ken fore. 34 Axa yinme gaa taaxunu ɲiiɲe be yi, xa maxa a sobindi, nke yinme hadarinten na a noxon ya yi. Nke ya ni Tunka Duumanten ŋa hadarini Banisirayilaganko noxon ŋa. ” »