[Kanaana gingu]
34
Tunka Duumanten daali Muusa da : 2 « Banisirayilaganko ɲaamari nan ti : “ Axa wa riini ro Kanaana ɲiiɲen ŋa, ke ɲiiɲe be gaa ɲaana axa taqe yi. Ɲiiɲe ke do i gingun faayi : 3 axa banboxun gingen na a wuttu gelli Siini gunjuran ya yi, Hedoomu kaaran ŋa. A na giri ti Sapinxaare fataaman ŋa kinbakka, 4 a na saage gilli banboxun ŋa katta Xarabiimu segendan ŋa, nan dangi katta Siini, ken falle a na giri banboxun ŋa katta Xadesi-barineeya yi, nan kare katta Hasaara-daari yi katta Hasimoona. 5 A na saage gilli Hasimoona yi non ŋa, katta Misira waranlaqen ŋa, dagana ware geeji yi.6 « “ Axa kinxennan gingen ni geeji xooren ya.
7 « “ Axa saahelinkitten gingen xa na a wutu geeji xooren ŋa, nan saxu do ken ŋa katta Hoori gide ke yi. 8 A na giri Hoori giden ŋa katta Lebo-hanmaati, a wa bakka katta Sedaadi yi. 9 Ginge ke wa dangini katta Siforoona yi, nan joofe Hasaari-heena yi. Ke ɲaana xa saahelin gingen ya.
10 « “ Xa yinmenu na gingen kutu do axa kinbakkankitten ŋa, gilli Hasaari-heena yi, katta Sefaamu. 11 Ginge ke na yanqa gilli Sefaamu yi, katta Libila yi, Heeni kinbakkan kutan ŋa. Ken falle a na yanqa nan kara Kinereetinxaare kunken ŋa kinbakkan kuta. 12 A na yille yanqana telle Yarade yi, nan daga kara sapinxaare. Ke ya n ɲaana axa ɲiiɲen ŋa, a do i gingu. ” »
13 Ken falle Muusa da Banisirayilaganko ɲaamari nan ti : « Ke ya ni ɲiiɲe be axa ga n xawa a xallaaxunu, axa na sokkun ya wuttu, xo Tunka Duumanten ga ɲaamarindi moxo be, nan ti a n kini xabiilanu ku kabi do xabiila taxande ke yi. 14 Baawo Rubeenikaarankon xabiilan do Gaadikaarankon xabiilan da i taqun kita i fonlaqun lanɲaro, kun do Manaasekaara xabiilan taxande. 15 Xabiilanu ku filli do taxanden da i taxandixallen kita Yarade ke kuta yi yere, Yeriiho kinbakkan ŋa, taŋene kiyen boguran ŋa. »
16 Tunka Duumanten daali Muusa da : 17 « Sero beenu ga n xawa ɲiiɲen taxandini axa da faabanxaye yi, i toxonun faayi : kun ni sadaxakiɲandaana Lajaari do Nuunu renme Yuusawu ya. 18 Xa na yinmanki baane baane wutu xabiila su yi, kuudo na ɲiiɲe ke taxandi axa naxa. 19 Seron toxonun faayi :
Yehuudakaarankon xabiilan ŋa, Yefunne renme Kaalebu ya ni ;
20 Simoonakaarankon xabiilan ŋa, Mihuuda renme Samuyeli ya ni ;
21 Beniyamiinakaarankon xabiilan ŋa, Kisiloona renme Yelidaadi ya ni ;
22 Daanikaarankon xabiilan ŋa, Yoogeli renme Bukki ya ni yinmanken ŋa ;
23 Yuusufukaarankon ŋa, Foodi renme Hanneli ya ni Manaaselankon xabiilan yinmanken ŋa ;
24 Hefarayimulankon xabiilan yinmanken ni Sifitaana renme Xemuyeli ya ;
25 Jebuluunukaarankon xabiilan ŋa, yinmanken ni Farinaaxi renme Licafaana ya ;
26 Yisaxaarikaarankon xabiilan ŋa, Hasaana renme Paliteeli ya ni yinmanken ŋa ;
27 Haseerikaarankon xabiilan ŋa, Seloomi renme Hayihuuda ya ni yinmanken ŋa ;
28 Mihuuda renme Fedeeli ya ni Nafutaalikaarankon xa yinmanken ŋa. »
29 Ku kundu ya ni ku be Tunka Duumanten ga da i ɲaamari ti i na Kanaana ɲiiɲen taxandi Banisirayilaganko naxa.