Jaatu 33

[Girindindu Misira yi katta Yarade]

Banisirayilaganko girindindun ya faayi ku, i jamon ga bogu Misira yi kure ti kure, Muusa do kandan noxo. 2 Xo Tunka Duumanten ga ɲaamarindi moxo ke be, Muusa da i girindindu ku safa ken moxo ya yi, daaxa ti daaxa. I girindindimoxon faayi : 3 Banisirayilaganko bogu Ramuseesi yi xason tanmun do karagon koota ya, ken ga ni xasu fanan ŋa, Pesaxansallen kootan yillankara. Banisirayilaganko bogu xo jarinto, Misira su siginten jon ŋa, 4 ken bire Misiranko do i ren yugu fanon bulunden wa me yi, Tunka Duumanten ga da i su kari, kuudo na i munonun kiiti. 5 Banisirayilaganko girindindi Ramuseesi yi, nan ri daaxe Sukkoti.

6 I girindindi Sukkoti, nan ri daaxe Yetaamu be gaa gunjuran raqen ŋa. 7 I ga girindindi Yetaamu yi, i yille katta Pi-hayirooti be gaa Baali-sefoona teŋon ŋa, nan daaxe Migidoole jonkonmen ŋa. 8 I girindindi Pi-hayirooti jonkonmen ŋa, na Xulunjuumu fanŋen kutu taŋene gunjuran ŋa. I da bito sikki tera Yetaamu gunjuran ŋa, nan ri daaxe Maara yi. 9 Ken falle i girindindi Maara yi, nan ri daaxe Yelima. Jinyaaxo tanmi do fillo do tanɲere tamaritinŋe wa non ŋa. 10 I girindindi Yelima, nan ri daaxe do Xulunjuumu fanŋen ŋa. 11 I girindindi Xulunjuumu fanŋen ŋa, nan ri daaxe Siini gunjuran ŋa. 12 I girindindi Siini gunjuran ŋa, nan ri daaxe Dofuxa. 13 I girindindi Dofuxa yi, nan ri daaxe Luusa. 14 I girindindi Luusa, nan ri daaxe Lefidiimu, noqu ke be jin ga nta no seron gaa minni. 15 I girindindi Lefidiimu, nan ri daaxe Tuurisiina gunjuran ŋa.

16 I girindindi Tuurisiina gunjuran ŋa, nan ri daaxe Kiborooto-hataawa. 17 I girindindi Kiborooto-hataawa, nan ri daaxe Haceroota. 18 I girindindi Haceroota, nan ri daaxe Litima. 19 I girindindi Litima, nan ri daaxe Limooni-pereti. 20 I girindindi Limooni-pereti, nan ri daaxe Libina. 21 I girindindi Libina, nan ri daaxe Liisa. 22 I girindindi Liisa, nan ri daaxe Xeelata. 23 I girindindi Xeelata, nan ri daaxe Sefeeri giden ŋa. 24 I girindindi Sefeeri giden ŋa, nan ri daaxe Harada. 25 I girindindi Harada, nan ri daaxe Maxaloota. 26 I girindindi Maxaloota, nan ri daaxe Taaxata. 27 I girindindi Taaxata, nan ri daaxe Teera. 28 I girindindi Teera, nan ri daaxe Mitixa. 29 I girindindi Mitixa, nan ri daaxe Hasimoona. 30 I girindindi Hasimoona, nan ri daaxe Moseera. 31 I girindindi Moseera, nan ri daaxe Ben-ɲaxaani. 32 I girindindi Ben-ɲaxaani, nan ri daaxe Hoori-gidaadi. 33 I girindindi Hoori-gidaadi, nan ri daaxe Yotiiba. 34 I girindindi Yotiiba, nan ri daaxe Haboroona. 35 I girindindi Haboroona, nan ri daaxe Cooni-gebeeri. 36 I girindindi Cooni-gebeeri, nan ri daaxe Siini gunjuran ŋa Xadesi yi.

37 I ga girindindi Xadesi yi, i ri daaxe Hoori yi giden ŋa, Hedoomu ɲiiɲen raqe. 38 Sadaxakiɲandaana Haaruna sege Hoori giden kanma yi non ya yi Tunka Duumanten ɲaamariyen kanma, nan faati, ken gemu siina tannaxatendin ya yi Banisirayilaganko bakken falle Misira ɲiiɲen ŋa, siinen xasu karagandin koota fana. 39 Haaruna gaa faatini Hoori giden kanma koota be, a wuyin wa kame do tanpille do siino sikki. 40 Haraadi tunkan da Banisirayilaganko riyen mugu, ken ni Kanaanaganken ya, a gaa taaxunu Kanaana ɲiiɲen banboxun ŋa.

41 I girindindi Hoori giden ŋa xadi, nan ri daaxe Salimoona. 42 I girindindi Salimoona, nan ri daaxe Punoonu. 43 I girindindi Punoonu, nan ri daaxe Wobooti. 44 I ga girindindi Wobooti, i ri daaxe Yee-bariimu noxon ŋa, Mowaaba ginge. 45 I girindindi Yee-bariimu, nan ri daaxe Dibooni-gaadi. 46 I girindindi Dibooni-gaadi, nan ri daaxe Mon-dibila. 47 I girindindi Mon-dibila, nan ri daaxe Bariimu gidun ŋa Neebo giden taŋon ŋa. 48 I ga girindindi Bariimu gidun ŋa, i ri daaxe Mowaaba ɲiiɲanbaayanmen ŋa do Yaradefanŋe yi, Yeriiho jonkonmen ŋa. 49 I daaxe do Yaradefanŋe ya yi gilli Beeti-yesimooti yi, ma Haabila-sitiimu gaa Mowaaba ɲiiɲanbaayanmen ŋa.

[Kanaana taxandinde]

50 Tunka Duumanten daali Muusa da Mowaaba ɲiiɲanbaayanmen ŋa, xannen ŋa Yeriiho jonkonme, nan ti : 51 « A ko da ti : “ Axa ga na dangi Yaradefanŋe yi, axa royinton ŋa Kanaana jamaane, 52 axa na non seren su xata bakka du kaane, axa na i gidinmunonun su sankundi, axa na i mexensawura dabarinton su bonondi, na i allanbatira yinginton su guruja. 53 Axa na jamaanen raga nan taaxu a yi, baawo in da ke jamaane kini axa ya yi, ti axa na a xallaaxu.

54 « “ Axa na sokkun wutu na a taxandi me naxan ŋa, fonlaqe su do i xallitaqe. I ga n xoora me yi moxo be, taxanden xa ɲaana ken moxo ya : ke be jaman gaben ga ni, ken na fo gaben wutu ; ke be jaman roxen ga ni, ken na fo roxen wutu. Sere su taqen na ɲa an sokken ga xenu noqu be yi. Axa na a xeye xabiila ti xabiila. 55 Xa, axa ga ma jamaanen seron su xata bakka du kaane, axa ga na i toxo no, i wa ɲaana axa noxon ŋa saasu yi, i gaa axa sufana axa yaaxon ŋa, nan ɲa kagen ŋa axa faton kanma. I na axa liixi jamaanen noxon ŋa, hari axa gaa taaxunu noqu be. 56 Ken bire, n ga ɲi xawa ke be ɲaana i ya, n na ken ɲaana axakun ya yi keeta. ” »