[Rubeenikaarankon do Gaadikaarankon ɲaageye]
32
Nan gaben ɲi Rubeenikaarankon do Gaadikaarankon maxa. Bire be i ga da Yaajere ɲiiɲen do Gilaadi ɲiiɲen wari, nan ti dingira be ga ni, naaburunnoqun ya ni, 2 i ri katta Muusa do sadaxakiɲandaana Lajaari yi, a do jaman yinmanko, nan ti : 3 « Ɲiiɲo ku be Tunka Duumanten ga da i raga Banisirayilaganko jaman danŋa, kun ga ni Hatarooti ɲiiɲe, a do Dibooni do Yaajere, kafiini Nimira do Hesiboona do Heliwaata yi, a do Sabaama do Neboowa, ken do Bowuna ɲiiɲe, 4 naaburunɲiiɲon ya ni, naaburun xa wa an komon maxa. 5 O ga na ɲi o gaa an duŋeyen kitta, an na ku ɲiiɲo kini an komon ŋa xayimaxantafo yi, maxa sigi o gaa Yaradefanŋe karana. » 6 Muusa jaabi Rubeenikaaranko ku do Gaadikaaranko ku da : « Yaala axa waaxinu ku dagana gajanjannoqun ŋa ya na axakun toxo taaxunu yere yi ba ? 7 Tunka Duumanten ga da ɲiiɲe be kini Banisirayilaganko yi i gaa karene dagana, manne xa ni axa gaa i buttun roxondini ? 8 Axa faabanu da ke moxo ya ɲa bire be in ga da i xayi gilli Xadesi-barineeya yi kuudo i n daga ɲiiɲen sonsolo. 9 Bire be i ga daga ma Hasikooli waranlaqen ŋa, na ɲiiɲen sonsolo, i da Banisirayilaganko buttun roxondi kuudo Tunka Duumanten ga da ɲiiɲe be kini i ya i n maxa ro. 10 Tunka Duumanten butu ken koota nan kuna, ti : 11 “ Sero ku beenu ga bogu Misira yi, gelli tanpille siine renme segene, ɲiiɲe ke be in ga kuna ti a yi Ibirahiima do Isiyaaxa do Yaaxuba da, ikun ntaxa ken ɲiiɲe walla, baawo i do danqanaaxu ma in batu*, 12 ma ganta Yefunne renme Kaalebu, Xeniijiganke, a do Nuunu renme Yuusawu. Kun danqanaaxunton ya n da Tunka Duumanten batu*. ” 13 Tunka Duumanten butten yanganxatan xenu Banisirayilaganko yi, a da i laawandi gunjuran noxon ŋa tannaxate siine, ken sapa be ga da fo buren ɲa Tunka Duumanten jon me naxa, ma a su gaa ɲemeene. 14 Ayiwa axa faayi do axa faabanu taabattun ya yi kundu, na Tunka Duumanten butten yanganxatan tallan jiidi katta Banisirayilaganko yi xadi, ku haqiburunsero ku ! 15 Baawo axa ga na fallaware bakka Tunka Duumanten ŋa, a na yille i toqo gunjuran ŋa xadi, axa na ɲa sababu yi na ke jama su halaki. »16 I tinko Muusa yi kuŋa nan ti a da : « O wa goorun sigindini o naaburun da yere yi, na debu taga o leminun da. 17 Ayiwa ken batte su o wa o gajanyokkun wuttu nan ware Banisirayilaganko kaane, ma o ga na i joofa i dingiran ŋa. O leminun na toxo debi tanganton ŋa tagayinbinnun noxo, i na kisi ɲiiɲe ke taaxaanon ŋa. 18 O nta saagene katta o kaanun ŋa ma Banisirayilaganke su ga na i faabanɲiiɲen kita. 19 Baawo oku ntaxa xeyene do i batten ŋa Yaradefanŋe ken waxe yi, oku taqen kini o yi Yaradefanŋe kinbakkan waxen ŋa. »
20 Muusa ti i da kuŋa : « Selli axa ga na ku fiinu ɲa, nan yille axa gajanyokkun wutu, nan gaja Tunka Duumanten jon me naxa, 21 axa kurayugon su ga da Yaradefanŋe kuta Tunka Duumanten jon me naxa, ma aken Tunka duumante yinme ga n nda i xonnon xata bakka i jon me naxa, 22 ɲiiɲen ga mare Tunka Duumanten jon me naxa, ken falle axa na baari Tunka Duumanten do Banisirayilaganko maxa, nan saage ; ɲiiɲe ke na ɲaŋi axa xalle yi Tunka Duumanten jon me naxa. 23 Xa, axa ga ma ke ɲa, ken bire axa da yangon kita katta Tunka Duumanten ŋa de, ayiwa axa na a tu xa, nan ti axa yangon na axa kitta ya de. 24 Ken ya ga ni, xa da debun taga axa leminun da, a do gallu, axa tanmison da. Xa ke be ga bogu axa raqun ŋa, xa da ken ɲa de ! »
25 Gaadikaaranko ku do Rubeenikaaranko ku ti Muusa da kuŋa : « Kamanyugo, an ga ɲaamarindi moxo be, an komon wa a dabarini ken moxo yi. 26 O leminu, o yaqu, a do naaburun su, kafiini o daaban kutten su, i wa toqo debun noxon ŋa Gilaadi yi yere. 27 Xa an komo ku kun yinmenu, fo wo fo ga ni kurayugon ya, o wa karene, nan gaja Tunka Duumanten jon me naxa, xoyi an ga da a ko moxo be. »
28 Muusa da ɲaamariyen kini sadaxakiɲandaana Lajaari do Nuunu renme Yuusawu do Banisirayilaganko faabankan fonlaqun yinmankon ŋa i xibaaren kanma. 29 A ti i danŋa : « Gaadikaarankon do Rubeenikaarankon ga na Yaradefanŋe kutu do axa batten ŋa gajanŋen xanne maxa Tunka Duumanten jon me naxa, kurayugun danmon su, ɲiiɲen ga na xenu axa kitten ŋa, ken bire axa na Gilaadi ɲiiɲen kini i yi faabanxaye. 30 Xa ganta, i ga ma i gajanyokkun wutu do i nan kare, i na i faabanxeyen kitana Kanaana ɲiiɲen ya yi nan taaxu kafiini axa yi. » 31 Gaadikaarankon do Rubeenikaarankon da a jaabi kuŋa nan ti : « Tunka Duumanten ga da ke be ko an komon da, o na ken ya dabarini. 32 Oku yinmenu do o gajanyokkun wa dangini dagana Kanaana jamaanen ŋa Tunka Duumanten jon me naxa, xa oku xallitaqe be o gaa a xayene, a gaa ɲaana o xalle, ken ni Yaradefanŋe ke kuta ya yi. »
33 Muusa da Hamoorikaarankon tunka Sihoona tunkaaxun kini Gaadikaarankon do Rubeenikaarankon ŋa, a do Manaasekaara fonlaqi taxande, Yuusufu renme ke. Muusa da Basaani tunka Wooga tunkaaxun xa kini i ya, jamaanen do debu beenu gaa a noxo, a do jamaanen do debu be gaa gingini. 34 Gaadikaarankon da Dibooni taga xadi, a do Hatarooti do Haroweera, 35 kafiini Hatarooti-sofana yi, a do Yaajere do Yaagibe, 36 ken do Beeti-nimira, do Beeti-haraana. I da ku debu taga tageyinbinnun noxon ya, na gallun dabari i naaburun da. 37 Rubeenikaarankon da Hesiboona taga xadi, a do Heliwaata do Xiriyatiimu, 38 kafiini Neboowa do Baali-mawuna yi, i da debu ku toxonun faraaxu. I da Sibima taga. I ga da debu be taga, i da i toxonun faraaxu.
39 Manaase renme Maxiiri, ken renmun daga Gilaadi, na a raga ; Hamoorikaaranko be gaa non ŋa, a da a boosi i ya. 40 Muusa da Gilaadi kini Maxiiri fonlaqe ke yi kuŋa, Manaase renme ke, aken taaxu non ŋa. 41 Manaase renme Yahiiri, Hamoorikaarankon debe be toxon ga ni Haboota, aken daga ken raga, a da a toxora Haboota-yahiiri. 42 Nooba daga Xaanata raga, a do i debinlenmu, na a xiri i yinme toxon ŋa, Nooba.